Helsedepartementet gjer i proposisjonen framlegg om endring av løyvingane for 2003 under kap. 2711 post 70 Refusjon spesialisthjelp og post 71 Refusjon psykologhjelp, under kap. 2755 post 62 Tilskot til fastlønnsordning fysioterapeutar, post 70 Refusjon allmennlegehjelp og post 71 Refusjon fysioterapi og under kap. 732 Regionale helseføretak, postane 71-75. Auken på i alt 42,5 mill. kroner har samanheng med reviderte avtalar med Den norske lægeforening, Norsk Fysioterapeutforbund og Norsk Psykologforening om takstar, basistilskot og driftstilskot. Det er sett av reservar til dekking av meirutgiftene ved oppgjeret under kap. 2309 Tilfeldige utgifter (Ymseposten). Denne løyvinga vil det seinare bli gjort framlegg om å setje ned.
Det blir òg gjort framlegg om ei tilleggsløyving under kap. 2790 post 72 Sjukebehandling i utlandet på 65 mill. kroner som følgje av at fleire pasientar enn rekna med vil få behandling i utlandet under Prosjekt - kjøp av helsetenester i utlandet. Til inndekking av meirutgiftene tilrår departementet at løyvingane under kap. 701 Forskings- og forsøksverksemd, post 21, kap. 743 Statlege stimuleringstiltak for psykisk helse, postane 73 og 75, kap. 2600 Trygdeetaten, post 01 og kap. 2661 Grunn- og hjelpestønad, hjelpemiddel mv., post 75, blir sette ned med i alt 65 mill. kroner.
I St.prp. nr. 65 (2002-2003) har Regjeringa gjort framlegg om at eigendelane skal aukast med 10 prosent i staden for 4 prosent frå 1. juli 2003. For røntgenundersøkingar er det gjort framlegg om 20 prosent auke i eigendelen. Som følgje av dette er det gjort framlegg om nedsetjing av refusjonsløyvingane i proposisjonen. Auken i honorartakstane som følgje av dei nye avtalane får difor full verknad i refusjonsutgiftene.
Da ordninga med driftstilskot for legar, fysioterapeutar og psykologar blei innførd i 1984, var føresetnaden at driftstilskotet skulle utgjere om lag 40 prosent av gjennomsnittleg omsetnad for dei ulike gruppene. For legespesialistar og psykologar utgjer driftstilskotet no 20 til 25 prosent. For å auke desse prosentdelane noko er det avtala ei omfordeling frå takstar til driftstilskot for desse to gruppene. Som følgje av dette blir det gjort framlegg om å auke overføringane til dei regionale helseforetaka med 48 mill. kroner, mot tilsvarande reduksjon i refusjonsløyvingane. Medrekna påslaga som følgje av takstoppgjera blir refusjonsløyvingane difor samla foreslått sett ned med 5,5 mill. kroner.
I forhandlingsmøte 3. juni 2003 blei
Den norske lægeforening, staten, Kommunenes Sentralforbund
og dei regionale helseføretaka samde om eit tilrådd
framlegg til revidert avtale om basistilskot for allmennlegar, driftstilskot
for legespesialistar og takstar for tidsrommet 1. juli 2003-30.
juni 2004. Det tilrådde framlegget inneber at gjeldande
basistilskot, driftstilskot, takstar og fondsavsetningar samla blir
auka med 1,0 prosent frå 1. juli 2003. Innanfor denne ramma
er det avtala at driftstilskota blir auka med 25 prosent, eller
om lag 90 mill. kroner på årsbasis. Partane vil
snarast komme saman for å dele ramma på dei einskilde
takstane, driftstilskota og fonda.
Mindreutgiftene for folketrygda til refusjonar
og fondsavsetningar i 2003 er rekna til 15,0 mill. kroner, delt
med ei mindreutgift på 35 mill. kroner på kap
2711 post 70 Refusjon spesialisthjelp og ei meirutgift på 20 mill.
kroner på kap 2755 post 70 Refusjon allmennlegehjelp. Til
inndekking av meirutgiftene for dei regionale helseføretaka
som følgje av den ekstraordinære auken i driftstilskota,
tilrår departementet at kap. 732 Regionale helseføretak
postane 71-75 blir auka med 43 mill. kroner i alt.
I forhandlingsmøte 3. juni 2003 blei
Norsk Fysioterapeutforbund, Kommunenes Sentralforbund og staten samde
om eit tilrådd framlegg til revidert avtale om driftstilskot
og takstar for fysioterapeutar. Avtalen skal gjelde for tidsrommet
1. juli 2003-30. juni 2004. Avtalen føreset ei regulering
av takstar og driftstilskot med 1,2 prosent per 1.juli 2003. Takstar
og driftstilskot aukar med same prosentsats. Folketrygda skal som tidlegare
setje av 1,5 prosent av utbetalte refusjonar til fond for etter-
og vidareutdanning.
Departementet tilrår at løyvinga
for 2003 under kap. 2755 post 71 Refusjon fysioterapi blir auka
med 8 mill. kroner.
Fastlønnstilskotet til kommunar med
fysioterapeutstillingar var 131 000 kroner i 2002. Departementet tilrår
at fastlønnstilskotet blir regulert til 134 300 kroner
for 2003, og at kap. 2755 post 62 Tilskot til fastlønnsordning
fysioterapeutar blir auka med 3 mill. kroner. Det er teke omsyn
til framlegget til auke i eigendelane frå 1.juli 2003 ved
reguleringa av fastlønnstilskotet.
I forhandlingsmøte 2. juni 2003 blei
Norsk Psykologforening, staten og dei regionale helseføretaka
samde om eit tilrådd framlegg til revidert avtale om driftstilskot
og takstar for spesialistar i klinisk psykologi. Avtalen skal gjelde
for tidsrommet 1. juli 2003-30. juni 2004. Avtalen føreset
ei samla regulering av takstar, driftstilskot og avsetning til fondet
for vidare- og etterutdanning med 2,0 prosent per 1. juli 2003.
Innanfor denne ramma er det avtala at driftstilskotet blir auka
med 12 prosent, eller 12 mill. kroner på årsbasis.
Departementet tilrår at kap 2711 post 71 Refusjon psykologhjelp
blir sett ned med 1,5 mill. kroner. Til inndekking av meirutgiftene
for dei regionale helseforetaka som følgje av den ekstraordinære
auken i driftstilskota tilrår departementet at kap. 732
Regionale helseføretak postane 71-75 blir auka med 5 mill. kroner
i alt.
Kap. 2790 post 72 Sjukebehandling i utlandet
inneheld to ordningar: Bidrag etter folketrygdlova § 5-22
til behandling i utlandet og Prosjekt - kjøp av helsetenester
i utlandet. Bidragsutgiftene er i St.prp. nr. 1 (2002-2003) budsjetterte
med 18 mill. kroner. Som følgje av Stortinget si handsaming
blei det for begge ordningane til saman løyvd 98 mill.
kroner, og Prosjekt - kjøp av helsetenester i utlandet
blei dermed tildelt 80 mill kroner. I tillegg blei det løyvd
5 mill. kroner til administrasjon av ordninga, jf. kap. 2600 Trygdeetaten.
I St.prp. nr. 65 (2002-2003) Tilleggsbevilgninger
og omprioriteringer i statsbudsjettet medregnet folketrygden 2003
er det gjort framlegg om ei gjenløyving på 60
mill. kroner til Prosjekt - kjøp av helsetenester i utlandet.
Dette svarer om lag til mindreforbruket i 2002 i høve til
prosjektet si tildelte ramme dette året, og blei sett som
naudsynt for å kunne betale utgifter til behandling av
pasientar i siste halvdel av 2002.
Nye rekneskapstal frå Rikstrygdeverket
viser at prosjektet har eit meirforbruk i 2003 ut over det som er lagt
til grunn i St.prp. nr. 65 (2002-2003). Meirforbruket har ifølgje
Rikstrygdeverket mellom anna si årsak i at dei regionale
helseføretaka har sendt fleire pasienter til behandling
i utlandet gjennom prosjektet på slutten av fjoråret
enn det Rikstrygdeverket la til grunn.
Helsedepartementet ser det som naudsynt at staten innfrir
sine plikter overfor dei pasientane som allereie er tilbode behandling
i utlandet gjennom prosjektet. Det trengst ei tilleggsløyving
for å få til dette. Meirutgiftene er rekna til
65 mill. kroner. Departementet gjer framlegg om ei tilleggsløyving
på 65 mill. kroner under kap. 2790 post 72, og at denne
blir dekt inn ved tilsvarande nedsetjing av følgjande løyvingar:
– Kap. 701
Forskings- og forsøksverksemd post 21 Spesielle driftsutgifter
blir tilrådd nedsett med 7 mill. kroner.
– Kap. 743 Statlege stimuleringstiltak
for psykisk helse post 73 Tilskot til psykososialt arbeid for flyktningar
blir tilrådd nedsett med 2,5 mill. kroner.
– Kap. 743 Statlege stimuleringstiltak
for psykisk helse, post 75 Tilskot til styrking av psykisk helsevern
blir tilrådd nedsett med 2,5 mill. kroner.
– Kap. 2600 Trygdeetaten post
01 Driftsutgifter blir tilrådd nedsett med 33 mill. kroner.
– Kap. 2661 Grunn- og hjelpestønad,
hjelpemiddel mv. post 75 Betring av funksjonsevna, hjelpemiddel
blir tilrådd nedsett med 20 mill. kroner.