Komiteen, medlemene frå Arbeidarpartiet,
Alf E. Jakobsen, Rolf Terje Klungland, Torgeir Micaelsen, leiaren Reidar
Sandal, Eirin Kristin Sund og Marianne Aasen, frå Framstegspartiet, Gjermund
Hagesæter, Ulf Leirstein, Jørund Rytman og Christian Tybring-Gjedde,
frå Høgre, Svein Flåtten, Linda C. Hofstad Helleland og Jan Tore
Sanner, frå Sosialistisk Venstreparti, Magnar Lund Bergo og Ingunn
Gjerstad, frå Kristeleg Folkeparti, Hans Olav Syversen, frå Senterpartiet,
Per Olaf Lundteigen, og frå Venstre, Lars Sponheim, viser
til forslag frå Regjeringa om endringar i statsbudsjettet for 2009
for å motverke arbeidsløyse og dempe verknadene av den internasjonale
finansuroa på norsk økonomi. Regjeringa har tidlegare gjennomført
tiltak retta spesielt mot finansnæringa og penge- og kredittmarknaden,
og Regjeringa har lagt fram nye tiltak 9. februar for å betre tilgangen
på kreditt for føretak og hushald.