May-Helen Molvær Grimstad (KrF):
Eg
tillèt meg å stille følgjande spørsmål til samferdselsministeren:
Vegdirektoratet har sløyfa rabatt for
honnørreisande og militære ved fastsetjing av takstar på bomveg for
Skålavegen og Krifast i Møre og Romsdal. Dette inneber prisauke for desse i
høve til tidlegare fergetakstar.
Vil departementet revurdere
standpunktet i denne saka?
Statsråd Kjell Opseth:
Vegdirektoratet
si takstgodkjenning for Krifast, Skålavegen og andre nye prosjekt, er basert
på takstretningslinene, seinast gitt i brev frå Samferdselsdepartementet av
21. april 1992. Retningslinene byggjer på St.meld.nr.46 (1990-1991) « Om
endring i rammebetingelser for bompengeprosjekter », jf.
Innst.S.nr.16
(1991-1992).
Retningslinene opnar for at det ved
ferjeavløysingsprosjekt kan leggjast til grunn ei forenkla utgåve av
ferjerabattordninga, knytt til talet på passeringar. Retningslinene legg
likevel ikkje opp til ekstra rabatt for eldre og militære, og
Vegdirektoratet kan såleis ikkje godkjenne slike ordningar for nye prosjekt.
Enkelte eldre bompengeprosjekt har framleis unntaksordningar som ikkje er i
tråd med dei nye retningslinene som gjeld for nye prosjekt.
Eg gjer òg merksam på at
honnørreisande som nyttar bil, ikkje generelt får rabatt på bilen når dei
reiser med ferje.
I
Innst.S.nr.232
(1992-1993), NVVP 1994-97, har samferdselskomiteen bede departementet om ei
ny vurdering av honnørrabattspørsmålet for personbillett.
Eg kjem tilbake til Stortinget med ei
orientering så snart departementet har denne vurderinga klar.
May-Helen Molvær Grimstad (KrF):
Eg
takkar statsråden for svaret.
Honnør- og militærrabatt er ein vel
innarbeidd og landsomfattande rabatt for alle offentlege rutegåande
transportmiddel som buss, båt, ferje, fly, jernbane, T-bane og trikk. Det
kom derfor overraskande på mange at Vegdirektoratet fjerna ein innarbeidd
landsomfattande rabattordning sjølv om statsråden her har forklart
bakgrunnen.
Følgjande premiss vart lagt fram frå
samferdselskomiteen ved godkjenning av Krifast i Innst.S.nr.233 (1984-1985):
Bompengetakstene skal
være lik ferjetaksten i åpningsåret med tillegg på 1 pst. pr år. Det skal innføres
rabattordninger på samme måte som etter ferjetakstregulativet.
Er ikkje dette eit brot med
føresetnaden for Stortinget sin aksept av at honnørreisande og vernepliktig
personell skal betale vaksen billett og ikkje barnebillett?
Statsråden viste til at det vil bli
ein ny gjennomgang av honnørrabattspørsmålet. Synest ikkje statsråden det
er rimeleg at militære og funksjonshemma eldre igjen kan få rabatt?
Statsråd Kjell Opseth:
Eg registrerer
at representanten Molvær Grimstad har lese bompengeproposisjonen. No skal
ein vere klar over at Stortinget har gitt retningsliner for takstar etter
den tid. Når ein opnar nye prosjekt, prøver både departementet og
Vegdirektoratet å halde seg til det nye regulativet.
Når komiteen no har bede om ein ny
gjennomgang av dette spørsmålet, blir det høve til det. Og kva statsråden
meiner er rimeleg i ein slik samanheng, det er ein skål for seg. Statsråden
held seg til det som Stortinget til ei kvar tid pålegg han i denne
samanhengen. Eg meiner at det har òg departementet og direktoratet gjort.
May-Helen Molvær Grimstad (KrF):
Eg
takkar igjen for svaret frå statsråden.
Meiner statsråden at for å sikre
økonomien i eit bompengeprosjekt er det pensjonistar, dei funksjonshemma og
dei som avtener verneplikta som skal vere med å betale meir enn kva dei
normalt elles gjer? Desse er dei einaste som har fått auka sin betalingssats
i forhold til ferjetakstane, noko eg synest er djupt urettferdig. Ved at
desse gruppene ikkje får rabattordningar som dei har hatt tidlegare, kan det
òg verke hemmande på trafikken.
Statsråd Kjell Opseth:
Eg noterer meg
at representanten Molvær Grimstad meiner at Stortinget har gitt
retningsliner som er djupt urettvise. Det får vi ta med oss i den vidare
debatten om desse gruppene skal ha rabatt eller ikkje.