Arne Haukvik (Sp):
« Dei som bur i
Hellerud bydel får nattesvevnen øydelagd av store sprengingsarbeid i
Gardermotunnelen. NSB svarar at fagrørsla har forhandla seg fram til
arbeidstidene. NSB burde òg ta omsyn til dei som bur i området.
Vil statsråden syte for at det ikkje
blir utført sprengingsarbeid mellom kl. 23.00 og kl. 06.00 slik
bydelsutvalet krev? »
Statsråd Gunnar Berge:
Det har vore
sprengingsarbeid i tunnelen under Hellerud bydel sidan årsskiftet 1995/96.
I denne perioden er det totalt sprengt 156 salver. Av desse er 20 sprengde
etter kl. 23.00, og dei fleste av desse i tida mellom kl. 23.00 og 23.30.
Sidan staden der ein skyt, stadig blir flytta framover, har den einskilde
ibuande ikkje ulemper ved alle sprengingane.
Alle arbeidsplanar legg opp til at
sprenging skal skje i god tid før kl. 23.00. Tidspunktet for lading og
sprenging er knytte til skiftordninga. Når ein ved nokre høve har sprengt
etter kl. 23.00, har dette si årsak i uventa problem etter at lading av
salva er starta opp. I hovudsak kjem dette av svært variabel fjellkvalitet
og innsig av vatn. Under slike høve er det av omsyn til tryggleiken for dei
som arbeider i tunnelen, direkte uforsvarleg å vente med avfyring av salva
til neste dag. Dette ville òg vere i strid med gjeldande lovgjeving, lov om
eksplosive varer.
Om ei veke passerer arbeidet i
tunnelen bydelsgrensa mot Austmarka. Ulempene blir difor stadig mindre
etter kvart som arbeidet kjem inn i område med færre busette.
Ut frå dei arbeidsplanar ein arbeider
etter, og det avgrensa omfanget ein har hatt av sprenging etter kl. 23. 00,
finn Samferdselsdepartementet det ikkje rimeleg å endre rutinane for
sprenging.
Arne Haukvik (Sp):
Eg takkar for
svaret. Eg skjønar at det er uforsvarleg å vente med å fyre av salva dersom
ein har gjort den klar. Men eg skulle tru at dei som arbeider der, ikkje er
nybegynnarar. Dei burde kunne rekne ut kor lang tid det tar å fyre av og
lage hola. Det ville vere merkeleg om det var slike hobbyamatørar som dreiv
der. Det trur eg ikkje at det er.
Det var eit litt svakt svar. Dette er
i grunnen nok eit prov på det hastverksarbeid som heile Gardermo-utbygginga
og Gardermobanen er bygt på. Ein måtte jo rekne med at det tar litt tid når
ein skal skyte og lage ein så lang tunnel. Det har heller ikkje vore noka
løysing for NSB frå Etterstad og ned til Oslo S. Dette er nok eit prov på
hastverksarbeidet til Regjeringa og statsråden for å gjennomføre dette.
Det er bra at arbeidet nå nærmar seg
ein annan kommune. Da vil vel arbeidet skje under skogen, og da er det
kanskje ikkje så farleg.
Dette er nok eit eksempel på kor
lettvint statsbanane og departementet handterer naboane der dei fer fram.
Statsråd Gunnar Berge:
Det er jo slik
som representanten Haukvik nå sa, at dette blir et stadig mindre problem
etter hvert som en kommer lenger bort fra de områdene hvor det bor folk.
Men jeg vil også minne om at dette problemet er av begrenset omfang. Som
jeg nevnte i mitt svar, er det altså 20 sprengninger som er utført etter kl.
23, og de aller fleste av disse i tidsrommet kl. 23 til kl. 23.30. Jeg syns
ikke en skal overdrive omfanget av dette problemet.
Arne Haukvik (Sp):
Eg takkar for
svaret. Det er klart at me ikkje skal overdramatisere. Men for dei som bur
der, har det vore dramatisk. Lokalavisene har side opp og side ned om at
NSB trassar forbod, dagmulkter til NSB og arrogante statsbanar. Det er den
salva NSB får for den oppførselen dei har hatt. For oss som ikkje bur
akkurat der, er det ikkje noko stort problem, sikkert ikkje for statsråden
heller. Men for dei som bur der, har det vore eit problem. Me får håpe NSB
og statsråden lærer av dette.