Rita Tveiten (A): Eg vil gjerne stilla følgjande spørsmål
til kyrkje- utdannings- og forskingsministeren:
«Høgskulen i Narvik gjev
utdanningstilbod til russiske studentar. Dei har kapasitet til å ta
imot 120 utanlandsstudentar, men «får berre» 90,
dette trass i at Statens lånekasse for utdanning har midlar
att til formålet.
Korleis kan dette ha seg, og kva kan gjerast
for at Høgskulen i Narvik får høve til å ta
imot ytterlegare 30 studentar til hausten?»
Statsråd Jon Lilletun: Kyrkje-, utdannings- og forskingsdepartementet
fordeler kvart år plassar i den såkalla kvoteordninga
for studentar frå utviklingsland og Aust-Europa etter søknader
frå alle universiteta og høgskulane i Noreg.
Studentane får støtte frå Statens lånekasse
for utdanning på line med norske studentar. Når
studentane vender attende til heimlandet etter avslutta utdanning,
vert lånet gjort om til stipend.
Kor mange plassar departementet har til fordeling, vert
fastsett i statsbudsjettet for kvart år. Studieåret 1998-99
var det i alt 900 studentar som fekk plass. 300 av plassane gjekk
til studentar frå Aust-Europa.
I statsbudsjettet for 1999 har Stortinget løyvt
pengar til ytterlegare 100 plassar til studentar frå Aust-Europa og
100 plassar til studentar frå utviklingsland. Institusjonane
har frist til 15. februar for å søkje om plassar,
og departementet har som målsetjing å handsame
søknadene før påske.
Det er om lag 40 høgre utdanningsinstitusjonar
som kan søkje om kvoteplassar. Talet på søknader
har dei siste par åra vore ein god del større
enn talet på plassar som står til rådvelde.
Dette gjeld i særleg grad plassar for studentar frå Aust-Europa.
Departementet har derfor vore nøydd til å redusere
talet på plassar for dei fleste institusjonane.
Mange av dei institusjonane som i dag berre
har nokre få plassar, ynskjer å ta opp fleire
studentar frå Aust-Europa. Ikkje minst gjeld dette Universitetet
i Tromsø og dei andre høgskulane i Nord-Noreg,
m.a. som ein del av samarbeidet i Barentsregionen.
Etter mi meining er det viktig at flest mogleg
av institusjonane kan ha utanlandske studentar for å fremje
internasjonaliseringa av universitet og høgskular. Til
skilnad frå norske studentar, som kan ta med seg støtta
si til utlandet, er studentar frå utviklingsland og Aust-Europa ofte
avhengige av å få støtte frå Noreg
til livsopphald. Kvoteordninga er derfor til vanleg den einaste
opninga institusjonane har for å ta opp studentar frå desse
delane av verda.
I studieåret 1998-99 fekk Høgskulen
i Narvik 90 plassar, dvs. nær ein tredel av dei disponible
plassane for studentar frå Aust-Europa. Departementet
meiner at det ikkje er rettferdig overfor dei andre universiteta
og høgskulane å tildele Høgskulen i Narvik
endå fleire plassar. Departementet har tvert om varsla
Høgskulen i Narvik om at dei ikkje kan rekne med å behalde
så mange plassar i framtida.
I spørsmålet sitt nemner
representanten Tveiten at det står att pengar på Lånekassa
sitt budsjett til kvoteordninga. Dette er ikkje rett. Alle dei
900 plassane vart fordelte mellom universiteta og høgskulane
våren 1998. For studieåret 1999–2000
er det ei ny løyving over statsbudsjettet for inneverande år.
Dei 1100 plassane som denne løyvinga finansierer, vil
som nemnt verte fordelte før påske.
Rita Tveiten (A): Eg vil fyrst få takka statsråden
for eit klargjerande svar.
Eg er glad for at alle dei 900 studieplassane
er i bruk.
Dei russiske ingeniørstudentane som
dette dreier seg om, er ein viktig del av studiemiljøet
ved Høgskulen i Narvik. Det som gjer at dei kjem litt
ille ut på Høgskulen, er at skulen tilbyr eit
eittårig forkurs der studentane får høve
til å læra seg norsk og få kunnskap om
norsk samfunnsliv. Og når skulen har 90 studieplassar,
fører det til at det etter tre år vert eit hol
i tilbodet, noko som gjer at skulen står i fare for å mista
dei lærarkreftene som er nytta i dette tilbodet.
Det er òg viktig å sjå på Aust-Europa
som ein svært interessant marknad for ulike næringsgreiner
i Noreg, og at desse studentane på eit seinare tidspunkt
kan verta uvurderlege kontaktar for det same næringslivet.
Mitt spørsmål vert difor: Kva kan statsråden
gjera for å sikra kontinuiteten i eit slikt tilbod som òg
inneheld eit forkurs?
Statsråd Jon Lilletun: Eg er takksam for at representanten Tveiten
ser samanhengen i måten ein her tildeler på, ut
frå dei 400 plassane ein har til disposisjon.
Eg har òg lyst til å gje
uttrykk for at Høgskulen i Narvik er ein av dei institusjonane
som har organisert dette best, med veldig gode opplegg som desse
studentane frå aust heilt opplagt har hatt stor nytte av.
At ein får eit problem med dette mellomåret,
ser eg. Eg er innstilt på å vere fleksibel når
det gjeld organisering. Dersom vi kan finne ein måte,
er eg innstilt på at vi kan ta ei drøfting med
Høgskulen i Narvik om dette. Å love fleire plassar ville
vere urett i forhold til alle dei andre institusjonane. Men å få ein
fleksibilitet i måten å organisere det på er
eg open for å diskutere.
Rita Tveiten (A): Eg er spesielt fornøgd med svaret som
statsråden kom med no, for det som er viktig, er å koma
fram til ordningar som gjer at ein kan ha kontinuitet i eit slikt
tilbod. Det er òg av stor verdi for Høgskulen i
Narvik.
Eg synest det er viktig ved tildelinga av desse
plassane å sjå på om det er skular som
er så sårbare at dei i større grad enn
andre er avhengige av å kunna gje eit slikt studietilbod.
Det er nyttig for tilbodet til dei norske studentane, og det er
nyttig for tilbodet til dei utanlandske studentane. Eg føler
meg difor trygg på at saka er i dei beste hender.
Presidenten: Spørsmål 25 er
allerede behandlet.