Komiteen hadde spesielt teke initiativ til å drøfte med nasjonale parlament korleis ein kan styrke kontrollen med dei europeiske institusjonane. Til diskusjonen i møtet var det lagt fram eit arbeidsdokument frå Mercedes Bresso (Italia, S&D) og Elmar Brok (Tyskland, EPP) om korleis Lisboa-traktaten bidreg til at EU fungerer betre.

– Temaet på møtet i dag gjekk rett i diskusjonen om tilhøvet mellom subsidiaritet og europeiske løysingar. Dette er ein svært aktuell diskusjon og gjeld problemstillingar som også er relevante for Noreg, sjølv om Noreg ikkje er medlem i EU, seier Tetzschner.

Medan mange i Europaparlamentet ynskjer å styrke si rolle, var fleire parlamentarikarar frå nasjonale EU-parlament kritiske til tilnærminga i arbeidsdokumentet. Jamvel om Europaparlamentet har ei sentral kontrollrolle mellom anna i høve til Europakommisjonen og i høve til ulike politikkområde, framheva mange at dei nasjonale parlamenta også har og skal ha viktige kontrollfunksjonar.