Komiteen, medlemene frå Arbeidarpartiet,
Alf E. Jakobsen, Rolf Terje Klungland, Torgeir Micaelsen, leiaren Reidar
Sandal, Eirin Kristin Sund og Marianne Aasen, frå Framstegspartiet, Gjermund
Hagesæter, Ulf Leirstein, Jørund Rytman og Christian Tybring-Gjedde,
frå Høgre, Svein Flåtten, Linda C. Hofstad Helleland og Jan Tore
Sanner, frå Sosialistisk Venstreparti, Magnar Lund Bergo og Heikki
Holmås, frå Kristeleg Folkeparti, Hans Olav Syversen, frå Senterpartiet,
Per Olaf Lundteigen, og frå Venstre, Lars Sponheim, viser
til at Regjeringa i St.meld. nr. 2 (2008–2009) legg fram meldinga
om Revidert nasjonalbudsjett for 2009.
Komiteen viser til forretningsordenen
§ 19 sjuande ledd som lyder:
"Ein eventuell kongeleg samleproposisjon om endringar
i statsbudsjettet skal leggjast fram seinast den 15. mai i budsjettåret,
saman med stortingsmelding om Revidert nasjonalbudsjett. Finanskomiteen
gjev innstilling om desse (Budsjett-innst. S. II) seinast den andre
fredagen i juni."
Komiteen viser til at Regjeringa
har lagt fram forslag om tilleggsløyvingar og omprioriteringar i
statsbudsjettet 2009 i St.prp. nr. 67 (2008–2009) og forslag til
endringar i skatte- og avgiftslovgivinga mv. i Ot.prp. nr. 95 (2008–2009),
jf. Innst. S. nr. 355 (2008–2009) og Innst. O. nr. 125 (2008–2009),
som blir avgitt samstundes med denne innstillinga.