Fiskeri- og kystdepartementet fremmar i proposisjonen to forslag
til endringar i lov 26. mars 1999 nr. 15 om retten til å delta
i fiske og fangst (deltakerloven).
Det vert gjort framlegg om å endre deltakerloven § 21
om årlige avgrensingar i adgangen til å delta
i fiske og fangst mv. Formålet med endringa er å opne for
at alle fartøy under ein viss storleik, og som er registrert
i eit avgrensa geografisk område, kan få adgang
til å delta i fangst av kongekrabbe.
Det vert vidare gjort framlegg om å endre ordlyden i
deltakerlova § 25 om gebyr, slik at nevninga "gebyr"
vert endra til "avgift" for så vidt gjeld det årlege
gebyret som ein fartøyeigar må betale for at fartøyet
skal stå registrert i Merkeregisteret. Denne endringa skjer
i tråd med nye retningslinjer som er utarbeidde av Finansdepartementet
om kva som skal reknast som eit gebyr og kva som skal
reknast som ei avgift.
Regjeringa går inn for at alle merkeregistrerte fartøy
under 11 meter som er registrert i Aust-Finnmark, inkludert kommunane
Nordkapp og Porsanger, skal få høve til å delta
i fangsten av kongekrabbe.
Forslaget er lagt fram, diskutert og nærmare grunngjeve
i Stortingsmelding nr. 40 (2006-2007) Forvaltning av kongekrabbe.
Det er deltakerlova § 21 som er heimel for å setje vilkår
for å delta i ulike fiskeri, for å avgrense talet
på fartøy som deltek. Slike avgrensingar kan ein
innføre når "hensynet til ressursforvaltningen,
avviklingen av fisket eller lønnsomheten i fisket" gjer
det naudsynt. Fangst av kongekrabbe er mellom dei verksemdene som
er underlagt slike vilkår.
Dei vilkåra som gjeld for ulike fiskeri i dag, skiller
ikkje mellom fartøya ut frå kvar dei er registrert. Dette
har også vore tilfellet for vilkåra for å delta
i kongekrabbefangsten. Forslaget om å gjere unntak frå adgangsvilkåra
for fartøy som er registrert i eit visst geografisk område,
er såleis eit av dei nye tiltaka i stortingsmeldinga om
forvaltning av kongekrabbe.
Deltakerloven § 21 gjev i dag ikkje heimel
for å skilje mellom fartøy etter kvar fartøyet
er registrert. Det vert difor gjort framlegg om eit tillegg til
andre ledd i deltakerloven § 21, som skal gjeve
heimel til å unnta fartøy registrert i eit visst
eller visse geografiske område frå dei vilkår
for å delta i fangst av kongekrabbe som vert fastsett med
heimel i § 21 første ledd. Heimelen vil
berre kunne nyttast til å gjere generelle unntak i forskrift.
I nye retningslinjer for gebyr og avgiftsfinansiering, R-112/2006,
har Finansdepartementet klargjort skilnaden mellom eit gebyr og
ei avgift, og kva vilkår som bør gjelde for offentlege
gebyr- og avgiftsordningar.
I deltakerloven § 25 går det fram
at "[d]epartementet kan bestemme at det skal betales
et gebyr ved innføring i merkeregisteret og et årlig
gebyr så lenge fartøyet står i merkeregisteret".
Vidare følgjer det av andre punktum i same føresegn
at "[g]ebyret er tvangsgrunnlag for utlegg."
Bakgrunnen for å innføre desse gebyra var todelt. For
det første skal gebyret dekkje kostnader med drifta av
merkeregisteret og bruken av registeret til statistikk- og samordningsformål.
For det andre skal gebyret medverke til at fartøyeigarane
stryk ikkje-aktive fartøy frå registeret.
I høve til retningslinjene nemnt ovanfor, er dermed
det gebyret som vert betalt ved innføring i merkeregisteret
fortsatt å rekne som eit gebyr. Det årlege gebyret
er derimot ikkje direkte knytt til handsaminga av ei enkelt sak.
I samsvar med retningslinjene skal dette difor kallast ei avgift.
Det vert difor gjort framlegg om å endre formuleringa
"[...] og et årlig gebyr" til "[...] og
en årlig avgift" i deltakerloven § 25.
Vidare må omgrepet "avgift" takast inn i andre punktum
i føresegna for å sørgje for at også denne
vil vere tvangsgrunnlag for utlegg.
Forslaget fører ikkje til materielle endringar for næringa.
Lovforslaget har ikkje vore sendt på høyring,
då dette vert ansett for openbert unødvendig. Forslaget
har ikkje nemnande økonomiske eller administrative konsekvensar.