Olje- og energidepartementet (OED) legg i proposisjonen
fram budsjettkonsekvensar knytt til restruktureringa av det statlege
engasjementet i petroleumsverksemda og for staten sitt direkte økonomiske
engasjement i petroleumsverksemda (SDØE). Proposisjonen
omfattar òg andre forslag til endringar på statsbudsjettet
for 2002 under OED, samt ei omtale av endringar i eigarstruktur
i det norske gasstransportsystemet.
Olje- og energidepartementet har i 2001 og 2002
på vegne av staten selt eigardelar i alt tilsvarande om
lag 21,5 pst. av verdien av opphavleg SDØE-portefølje. Salet
vart gjennomført etter ein bodprosess, og eigardelar tilsvarande
om lag 6,5 pst. av SDØE vert selde.
Ein føresetnad for salet var at ein
skulle oppnå prisar tilsvarande salet av 15 pst. av SDØE
til Statoil. Det vart lagt til grunn eit anna skatteopplegg enn
ved salet til Statoil. Dette er reflektert i den oppnådde
prisen på 8 456 mill. kroner. Når ein tek omsyn
til skilnader i rammevilkåra mellom dei to transaksjonane,
er prisane som vart oppnådde ved dette salet på nivå med
det som vart oppnådd ved salet til Statoil.
Samla nettoinntekter frå sal/kjøp
av eigardelar mellom staten og kjøparane er dermed om lag
8 700 mill. kroner.
Over budsjetta for 2001 og 2002 har Olje- og
energidepartementet så langt totalt utgiftsført
om lag 87,5 mill. kroner under kap. 1801 post 21 Omstrukturering av
statens petroleumsengasjement i samband med førebuing og
gjennomføring av sal av SDØE-eigardelar.
Utgiftene til provisjon til finansielle rådgjevarar/tilretteleggjarar
har vore på om lag 38,7 mill. kroner. Utgiftene til juridisk
og strategisk ekspertise, revisjonsfagleg ekspertise og geofagleg
ekspertise utgjer om lag 27,1 mill. kroner. Utgifter til datarom
utgjer hovuddelen av dei andre utgiftene. Andre utgifter utgjer
om lag 21,6 mill. kroner.
Utgifter til førebuing og sal av SDØE-eigardelar
var estimert til 60 mill. kroner. For 2002 er det samla utgiftsført
om lag 57 mill. kroner så langt, inkludert provisjon. Olje-
og energidepartementet rår over overførte midlar
frå 2001 på om lag 44,7 mill. kroner under kap.
1801 post 21. På bakgrunn av ovannemnde ber Olje- og energidepartementet
difor om ei tilleggsløyving på 13 mill. kroner
på kap. 1801 Omstrukturering av statens petroleumsengasjement,
post 21 Spesielle driftsutgifter.
Forslag til ny løyving er mellom anna
basert på oppdatert prognose for 2002 frå forretningsførar
Petoro AS etter tredje kvartal 2002, jf. tabell 2.1 i proposisjonen.
Overslaget for kap. 2440 post 22 Fjerningsutgifter
er auka med 10 mill. kroner, frå 90 til 100 mill. kroner.
I 2002 er det gjennomført fjerning i samsvar med gjeldande
lov på Frøy, Øst-Frigg, Statpipe, Frostpipe
og Ekofisk.
Det er foreslått ei løyving
på 1 850 mill. kroner for 2002 på kap. 2440, ny
post 25 Pro et contra-oppgjør.
Endringane som er omtala i proposisjonen fører
til at kap. 5440 post 24 Driftsresultat samla viser ein reduksjon
på om lag 11 300 mill. kroner, frå 68 500 til
57 200 mill. kroner.
På bakgrunn av oppgjer for skadar som
har funne stad og forventa skadeutbetalingar for resten av året, vert
det foreslått ei løyving på 600 mill.
kroner under kap. 5440, ny post 50 Overføring frå Statens
petroleumsforsikringsfond.
Endringane medfører samla sett at netto
kontantstraum frå SDØE blir auka med 95 mill.
kroner i forhold til gjeldande løyving, frå 74
610 til 74 705 mill. kroner.
Dei totale investeringane for utbygginga av
Skirne og Byggve blir i plan for utbygging og drift rekna til 1,7
mrd. 2001-kroner. Utbygginga er planlagte under vatn med oppkopling
til Heimdalplattforma, og vil for SDØE i 2002 medføre
om lag 155 mill. kroner i investeringar og om lag 5 mill. kroner
i kalkulatoriske renter.
Dei totale investeringane i plan for utbygging
og drift av Kollsnes NGL-anlegg blir rekna til om lag 2932 mill.
2002-kroner. Utbygginga av Kollsnes NGL-anlegg medfører
om lag 378 mill. kroner i investeringar, om lag 3,5 mill. kroner
i driftskostnader og om lag 13,5 mill. kroner i kalkulatoriske renter
for SDØE i 2002.
Dei totale investeringane i plan for utbygging
og drift av Visund gasseksport er rekna til om lag 2,7 mrd. 2002-kroner.
Utbygginga av Visund gasseksport vil for SDØE i 2002 medføre
om lag 12,5 mill. kroner i investeringar, om lag 0,5 mill. kroner
i driftskostnader og om lag 0,5 mill. kroner i kalkulatoriske renter.
Dei totale investeringane for prosjektet gassbehandlingsanlegget
på Kårstø er i plan for anlegg og drift rekna
til 1130 mill. 2001-kroner. Utbygginga vil for SDØE i 2002
medføre om lag 152 mill. kroner i investeringar, om lag
5 mill. kroner i driftskostnader og om lag 5 mill. kroner i kalkulatoriske
renter.
Under post 21 Spesielle driftsutgifter blir
tilsyn med petroleumsverksemda foreslått auka med 2 mill.
kroner i forhold til gjeldande løyving for 2002. Ein tilsvarande auke
i inntektene under kap. 4810 post 3 Refusjon av tilsynsutgifter
vil bli foreslått i revidert budsjett 2003.
Oppdrags- og samarbeidsverksemd blir foreslått auka
med 14 mill. kroner i forhold til gjeldande løyving for
2002. Utgiftsauken blir motsvara av ein tilsvarande inntektsauke
under kap. 4810 post 2 Oppdrags- og samarbeidsvirksomhet.
Løyvinga til undersøkingar
vert foreslått auka med 0,3 mill. kroner i forhold til
gjeldande løyving for 2002.
Samla blir det foreslått å auke
løyvinga under kap. 1810 post 21 Spesielle driftsutgifter
med 16,3 mill. kroner, frå 66,8 til 83,1 mill. kroner.
Samla blir det foreslått å redusere
løyvinga under kap. 1820 post 21 Spesielle driftsutgifter
med 2,4 mill. kroner, frå 48,7 til 46,3 mill. kroner.
Gjennom kgl. res. 11. oktober 2002 vart det
gitt samtykkje til at løyvinga under kap. 1820 post 22
Forebyggingsarbeider og oppryddingstiltak kan overskridast med 4
mill. kroner for å gjennomføre nødvendige strakstiltak
i eit skredfarleg område i Meråker kommune.
Vidare blir det foreslått å auke
løyvinga med 2 mill. kroner som følgje av auka
distriktsbidrag frå kommunane. Utgiftsauken blir motsvara
av ein tilsvarande inntektsauke under kap. 4820 post 40.
Samla blir det foreslått å auke
løyvinga under kap. 1820 post 22 Forebyggingsarbeider og
opprydningstiltak med 6 mill. kroner, frå 59,35 til 65,35
mill. kroner.
Det blir foreslått å redusere
løyvinga med 1 mill. kroner på post 75 Tilskudd
til sikringstiltak i forhold til gjeldande løyving for
2002.
For 2002 er det motteke krav på om
lag 90 mill. kroner i fjerningstilskot, og det er venta at selskapa
totalt vil krevje om lag 200 mill. kroner i tilskot i 2002. Departementet
foreslår å auke post 70 Tilskudd med 60 mill.
kroner, frå 140 til 200 mill. kroner.
Det blir foreslått at løyvinga
blir auka med 2 mill. kroner på post 45 Større
utstyrsanskaffelser og vedlikehold i forhold til gjeldande løyving
for 2002. Auken har samanheng med at NVE sine anleggsmaskiner må oppgraderast
eller bytast ut for å tilfredsstille HMS-krav med omsyn
til førarmiljø, støy og utslepp av avgassar.
Løyvinga over post 2 Oppdrags- og samarbeidsvirksomhet
blir foreslått auka med 17,5 mill. kroner i forhold til
gjeldande løyving for 2002.
Departementet foreslår at budsjettoverslaget
vert redusert med 5 mill. kroner, til 0 kroner. Dette vart òg gjort
i budsjettet for 2002, jf. St.prp. nr. 24 (2001-2002).
Løyvinga over post 2 Oppdrags- og samarbeidsvirksomhet
blir foreslått redusert med 3,4 mill. kroner i forhold
til gjeldande løyving for 2002, jf. tilsvarande endring
under kap. 1820 post 21.
Løyvinga over Post 40 Forebyggingsvirksomhet
blir foreslått auka med 2 mill. kroner i forhold til gjeldande løyving
for 2002 mot ein tilsvarande auke under kap. 1820 post 22.
Pr. i dag reknar ein med renteinntekter for
2002 på 86 mill. kroner, det vil seie 7 mill. kroner meir
enn i revidert budsjett 2002, og departementet foreslår å auke løyvinga
for 2002 med 7 mill. kroner, frå 79 til 86 mill. kroner.
Departementet viser til at etableringa av interessentskapet
Gassled inneber ei omstrukturering av eigardelar i transportsystemet
for gass utan særlege endringar i venta inntekt for eigarane.
Dette gjeld òg for SDØE.
Petoro har på vegne av SDØE
forhandla fram eigardelar i Gassled og Norsea Gas AS. Løysinga
inneber ein direkte statleg eigardel i Gassled på 38,293
pst. i 2003-2010 og 47,982 pst. frå 2011. Vidare vil Norsea Gas
AS vere ein av eigarane i Gassled. Den direkte statlege eigardelen
i Norsea Gas AS vil vere 40,006 pst. Når ein tek omsyn
til staten sin direkte eigardel i Norsea Gas AS vil staten gjennom
SDØE ha 39,5 pst. i 2003-2010 og 49 pst. frå 2011
i Gassled.
Den nye eigarstrukturen er planlagt å verke
frå 1. januar 2003, og ein legg til grunn at departementet
i samband med etableringa av Gassled forlenger løyva til
anlegg og drift for aktuelle innretningar fram til 2028. Den nye
eigarstrukturen er planlagt å verke frå 31. desember
2028.