Oddbjørg Ausdal Starrfelt (A):
Eg vil
få stilla følgjande spørsmål til kyrkje-, utdannings- og
forskingsministeren:
Mange psykologistudentar i Noreg
ventar på plass i embetsstudiet, nokre har venta inntil 3 år. Samstundes er
det fleire hundre ledige psykologstillingar i Noreg.
Kva initiativ har statsråden teke for
å auka kapasiteten på embetsstudiet frå komande studieår, og kva tiltak ser
statsråden som aktuelle på kort og lengre sikt?
Statsråd Kjell Opseth:
Departementet
er vel kjent med problema med dei lange ventelistene for å kome inn på
psykologistudiet og med dei mange ledige psykologstillingane. Ein har difor
arbeidd med tiltak for å avhjelpe situasjonen.
Departementet kalla før jul inn
psykologimiljøa i Oslo og Bergen til møte for å drøfte korleis
psykologistudia kunne organiserast på ein annan og meir effektiv måte.
Det var semje om å setje ned eit
nasjonalt utval med representantar frå dei fire universiteta og studentane.
Utvalet har fått i oppdrag å greie ut dei problema som er knytte til køen av
søkjarar til profesjonsstudiet i psykologi, og å vurdere omorganisering og
effektivisering av psykologistudiet.
Hovudpunkta i det utvalet sitt mandat
var å
- utarbeide
forslag til korleis køen for å kome inn på psykologistudiet kan avviklast så
raskt som mogleg,
- gjennomgå
organiseringa av studiet med sikte på ei meir effektiv organisering, og
- vurdere
nasjonal dimensjonering av psykologutdanninga.
Departementet har den 1. mars i år
motteke ein førebels rapport, der utvalet har vurdert ulike alternativ for
utviding av opptakskapasiteten til psykologistudiet i Noreg og bruk av
studieplassar i utlandet for å minske køen.
Den årlege opptakskapasiteten var i
1993 148 studentar. Departementet vil på bakgrunn av utvalet sitt førebels
forslag, vurdere følgjande tiltak:
- Om
det er mogleg for universiteta i Oslo og Bergen å samarbeide om ei førebels utviding
av opptakskapasiteten på 18 studentar.
- Utvide
opptak i Tromsø med 4 studentar. I kva grad desse tiltaka let seg realisere,
avheng av om det er mogleg å rekruttere kvalifisert personale. Det må også sjåast
på økonomien i eit slikt opplegg.
- Avtalar
med utanlandske institusjonar. Slike avtalar kan vere eigna til å avhjelpe situasjonen
på kort sikt. Utvalet har undersøkt med institusjonar i Europa og USA, og det
er sjansar for å sende ut studentar alt frå studieåret 1994/95. Det ligg ikkje
føre konkrete avtalar, men både Universitetet i Gøteborg, Åbo Akademi i Finland
og Universitetet i Trier i Tyskland er interesserte i ei slik ordning, dersom
ein kan bli samd om avtalar som er praktisk og økonomisk akseptable. På noko
lengre sikt vil ein kunne få i stand avtalar med fleire institusjonar enn dei
ein no ser på som dei mest aktuelle. Departementet vil be utvalet halde fram
arbeidet med å få til avtalar med institusjonar i utlandet.
Utdanningsministeren har også teke
initiativet til å få greidd ut ei meir rasjonell organisering av
psykologistudiet. Dette vil kunne gje rom for å auke opptaket endå meir, og
vil medverke til at dei som tek til på studiet, kan få kortare studietid og
dermed ein lengre periode som yrkesaktiv.
Edvard Grimstad:
hadde her overtatt
presidentplassen.
Oddbjørg Ausdal Starrfelt (A):
Eg
takkar statsråden for svaret. Eg er glad for at det tykkjest vera arbeid i
gang for å få fleire studieplassar allereie frå hausten. Men så veldig
mange er det ikkje, og det monnar då ikkje så mykje. Det er faktisk 300-400
ledige stillingar for psykologar i Noreg, og det er etter mi vurdering eit
stort potensial for nye stillingar, for eksempel i barnevernet. I tillegg
er det mange hundre motiverte og kvalifiserte studentar som ynskjer å
studera psykologi.
Ut frå dette håper eg at utvalet i
neste omgang kjem fram til fleire tiltak, og vil i den samanheng stilla eit
tilleggsspørsmål: I budsjettproposisjonen vart det nemnt at det vart arbeidd
med å gjera studiet kortare, i fyrste omgang i Trondheim. Komiteen støtta
dette. Så vidt eg veit, er det norske psykologistudiet det lengste i verda.
I tillegg er det eit omfattande system for vidareutdanning, for eksempel i
klinisk psykologi, så nivået skulle vera rimeleg godt sikra. Kva er skjedd
i forhold til kortare studietid i Trondheim, og er denne problemstillinga
tatt med i det pågåande utgreiingsarbeidet som eit meir generelt mål?
Statsråd Kjell Opseth:
Eg vil på nytt
få nemne at det utvalet som er sett ned, er blitt bedt om å sjå på
spørsmålet om kortare studietid. Dessutan er Universitetet i Trondheim
blitt bedt om å vurdere dette heilt spesielt.
Det er det einaste eg no finn grunn
til å gje som svar på dette tilleggsspørsmålet, men eg skal love å bringe
det også over til min kollega Hernes og spørje om han vil utdjupe det for
representanten Starrfelt.