Petter Løvik (H):
Eg tillet meg å
stille følgjande spørsmål til kirke-, utdannings- og forskingsministeren:
Kva er årsaka til at 20 elevar i andre
studieåret ved Norsk Musikkteater & Ballettakademi er innvilga statsstøtte
først frå skuleåret 1998-99, medan støtta til dei andre 70 elevane er gitt
frå og med studieåret 1997-98?
Statsråd Jon Lilletun:
Norsk
Musikkteater & Ballettakademi fekk i vedtak datert 17. april 1997
godkjenning med rett til tilskot for fyrste og andre årstrinn på
ballettlinja, og for eitt årstrinn på musikkteaterlinja. Skulen fekk
godkjenning for 70 elevar, fordelte på dei tre årstrinna.
Skulen fekk godkjent andre årskurs ved
musikkteaterlinja i vedtak datert 12. januar 1998, med rett til statstilskot
frå 1998-99.
Eg viser elles til at skulen har klaga
over vedtaket når det gjeld tidspunktet for utbetaling av tilskotet, og saka
er såleis til behandling i departementet. Eg ynskjer av den grunn ikkje å
kommentere den delen nærare no før vi er ferdige med den saksbehandlinga,
men grunnen til ulikskapen er at andre året ved musikkteaterdelen ikkje vart
godkjent av den forrige regjeringa, men vart godkjent no, så seint som 12.
januar dette året.
Petter Løvik (H):
Eg takkar
statsråden for svaret. Det er vel forhistoria og heile gangen i denne saka
som gjer at eg har reist dette spørsmålet. Dei 90 studentane er i gang med
studiet, og skulen er i ein vanskeleg situasjon. Men eg aksepterer
sjølvsagt det som statsråden seier om at her er ei klagesak på gang.
Tidlegare i dag vart det kommentert
frå denne talerstolen at Lilletun sitt departement generelt ikkje er av dei
raskaste og mest kundevennlege. Eg håpar og trur at Lilletun vil gjere sitt
beste for å rette på desse litt dårlege tradisjonane. Eg har òg eit visst
inntrykk av at saker som gjeld privatskular, er spesielt utsette for sein
behandling.
Meiner statsråden at
saksbehandlingstida i departementet i privatskulesaker er akseptabel? Dersom
svaret er nei eller tja, kva vil statsråden gjere for å rette på dette?
Statsråd Jon Lilletun:
Det er heilt
opplagt at denne statsråden tidlegare har kritisert saksbehandlingstida og
saksbehandlingsmåten i Kyrkje-, utdannings- og forskingsdepartementet i
forhold til privatskulane. Det var det òg grunn til. Departementet tok
dette ad notam og sette ned eit utval, Høybråten-utvalet, til å gjennomgå
privatskulefeltet. Dei hadde ei innstilling, og Stortinget bad om at den
skulle kome som stortingsmelding til Stortinget når vi hadde fremja
budsjettet. Det kjem til å skje i løpet av våren.
Eg trur at vi med denne innstillinga
og med dei nye rutinane som ein har innført i forhold til behandlinga av
privatskulesaker, skal kunne vedkjenne oss måten vi behandlar desse sakene
på. Eg skal derfor gjere mitt beste. Eg kan ikkje love å seie ja alltid,
men eg lover at det skal verte ei ryddig behandling, så langt det strekk
til.