Sigvald Oppebøen Hansen (A): Eg skal tillate meg å stille følgjande
spørsmål til kyrkje-, utdannings- og forskingsministeren:
«Ifylgje Aftenposten Aften 12. mars
1999 vurderer Ullern videregående skole i Oslo å utestenge
dei dårlegaste elevane frå allmennfagleg studieretning.
Bakgrunnen er påstand om at det er nokre elevar som ikkje
har kunnskap nok til å ta imot undervisning.
Er dette eit tiltak som statsråden
stør?»
Statsråd Jon Lilletun: Ein av hovudintensjonane med Reform 94 var å gje
lovfesta rett til eit vidaregåande opplæringstilbod
til alle som har gjennomgått grunnskulen. Det vil seie
at det ikkje kan stillast krav om at eleven har tileigna seg ein
viss kunnskap eller dugleik, eller at opplæringa eleven
har fått i grunnskulen, har lege på eit visst
nivå. Den vidaregåande opplæringa skal
ta sikte på å gje dokumentert delkompetanse til
dei elevane som ikkje har føresetnader for å nå yrkes-
eller studiekompetanse.
Inntaksforskrifta har derfor ikkje reglar som
gjev høve til å utestengje dei karaktersvake elevane
eller dei som ikkje har vurdering med karakterar frå grunnskulen,
frå inntak til studieretning for allmenne, økonomiske
og administrative studieretningar. Forskrifta har derimot reglar om
inntaksvilkår og om inntaksrekkjefylgja når det
til eit kurs som fylkeskommunen tilbyr, er fleire søkjarar
enn talet på elevplassar.
Utfordringa for fylkeskommunane ligg i å kunne
gje alle eit kurstilbod som passar den enkelte, og som i størst mogleg
grad kan gje kompetanse til yrkesutøving. Eg vil her få understreke
fylkeskommunen sitt ansvar for at elevane får nødvendig
rådgjeving om utdannings- og yrkesval, slik at dei kan
velje det kurstilbodet som høver best ut frå deira
evner og føresetnader.
Formålsregelen i opplæringslova
slår òg fast at opplæringa skal tilpassast
evnene og føresetnadene til den enkelte eleven og lærlingen.
På dette punktet vil eg få vise til evalueringa
av Reform 94. Den syner at ei av dei største utfordringane
for den vidaregåande opplæringa nettopp ligg i å differensiere
og leggje til rette opplæringa i dei ordinære
klassane på ein slik måte at ho femner flest mogleg
av elevane. Evalueringa syner også at dei aller fleste
elevane med behov for særskild tilrettelagd opplæring
går i dei yrkesfaglege studieretningane. Men av dei elevane
som Fafo har fylgt i forskingsprosjektet sitt, og som hadde særskild
tilrettelagd opplæring i studieretning for allmenne, økonomiske
og administrative fag, oppnådde 51 pst. studiekompetanse
og 35 pst. delkompetanse etter fire år. Dette
er svært positive tal, som syner at det nyttar å leggje
til rette opplæringa også i denne studieretninga
for elevar som ein i utgangspunktet kanskje ikkje trudde ville kunne
oppnå studiekompetanse. Dessutan syner det at
det er rett å gje eit tilbod til alle, same kva grunnlag
dei har å byggje vidare på.
Dersom eg skulle gje eit råd til skulane
og fylkeskommunane ut frå denne evalueringa, må det
verte ei oppmoding om å ta fatt i den utfordringa det er å differensiere og
leggje til rette opplæringa også for allmenne, økonomiske
og administrative fag.
Sigvald Oppebøen Hansen (A): Eg takkar statsråden for svaret.
Eg er veldig glad for at statsråden nå presiserer
og konkretiserer at han til liks med meg vil slå ring om
einskapsskulen og intensjonen i Reform 94.
Når det er fleire søkjarar
til eit tilbod, er det å rangere etter reglar om karakterpoeng
ein akseptert måte å gjere det på, men
det er noko heilt anna å sette ei nedre sperregrense.
Eg har i forkant av dette spørsmålet
motteke ein faks frå rektoren på Ullern, der det
blir hevda at dei aldri har uttrykt eller meint det som er intensjonen
i spørsmålet mitt. Han seier likevel at det kunne
vere klokt å sette ei nedre sperregrense for opptak til
allmennfagleg studieretning, og det tolkar eg faktisk ikkje på annan
måte enn at det er snakk om å utestenge dei som
er under den nedre sperregrensa. Spørsmålet mitt
til statsråden er om han tolkar det på same måten.
Statsråd Jon Lilletun: Eg skal vere forsiktig med å kommentere
eit brev eg ikkje har sett, men eg vil uttrykkje meg generelt – og
då vil eg uttrykkje meg likt med representanten Oppebøen
Hansen.
Når det gjeld vidaregåande
opplæring, er opplæringslova slik at alle har
rett til plass, og då er det ikkje mogleg å setje
ei nedre grense for å kome inn. Korleis ein fylkeskommune
skal organisere på kva skule ein skal få denne
retten, er ikkje noko eg som statsråd kan leggje meg opp
i. Men det er heilt opplagt at det ikkje er høve for ein
fylkeskommune til å seie nei til retten til vidaregåande
opplæring i allmennfag ut frå karakterar.
Sigvald Oppebøen Hansen (A): Det var ikkje mi meining å ansvarleggjere
statsråden i forhold til eit brev som var sendt til meg,
med ein kopi til departementet, så det vil vel snart ligge
på statsråden sitt bord.
Men eg har eit lite tilleggsspørsmål:
Kan eg tolke statsråden slik at ein eventuell søknad
frå Oslo om dispensasjon frå inntaksforskrifta
ikkje vil verte imøtekomen av denne statsråden?
Statsråd Jon Lilletun: Om søknaden skulle gå ut
på at ein skulle kunne utestengje nokre elevar ut frå svake karakterar,
så vil ikkje denne statsråden gje ein slik dispensasjon.