Justisdepartementet gjer i proposisjonen framlegg om endringar
i aksjelova og allmennaksjelova.
Allmennaksjelova kapittel 13 har reglar om fusjon. Eit vedtak
om fusjon blir gjort ved at generalforsamlinga i kvart selskap som
tar del i fusjonen, godkjenner ein felles fusjonsplan. Det følgjer
av allmennaksjelova at uavhengige sakkunnige skal utarbeide ei utgreiing
om fusjonsplanen. I proposisjonen foreslår Justisdepartementet at
krava om utgreiing ikkje gjeld dersom alle aksjeeigarane er samde
om det. Endringsforslaget får verknad også for fisjon.
Framlegget har bakgrunn i Europaparlaments- og rådsdirektiv 2007/63/EF,
som gjer endringar i tredje selskapsdirektiv (78/855/EØF) om fusjon
og sjette selskapsdirektiv (82/891/EØF) om fisjon.
Tredje og sjette selskapsdirektiv gjeld berre for allmennaksjeselskap.
Justisdepartementet gjer likevel framlegg om endringar også i aksjelova,
då det ikkje er grunn til å ha andre reglar for aksjeselskapa enn
for allmennaksjeselskapa på dette punktet.
Lovforslaget inneber ei forenkling av reglane om fusjon og fisjon
og vil såleis ha positive økonomiske og administrative konsekvensar
for næringslivet.
Lovforslaget gjeld privatrettslege reglar og vil ikkje ha nemnande
økonomiske eller administrative konsekvensar for det offentlege.