Ved EØS-komitéavgjerd nr.
150/1999 av 5. november 1999 blei rådsforordning
(EF) nr. 925/1999 innlemma i EØS-avtala.
Rådsforordninga har nemninga: "registrering
og bruk i Fellesskapet av visse typer sivile subsoniske jetfly som
er blitt ombygd og omsertifisert for å oppfylle standardene
i del II kapittel 3 i bind 1 av vedlegg 16 til konvensjonen om internasjonal
sivil luftfart, 3. utgave (juli 1993).»
Rådsforordninga er teken inn i vedlegg
XIII (transport) til EØS-avtala.
Europakommisjonen starta å gi lover
om støy frå fly for nærare 20 år
sidan. Føremålet med rådsforordninga er å hindre
at den totale støybelastninga frå støyombygde
fly blir forverra i framtida.
Regelverket blir rekna som eit vernetiltak for å hindre
forverring av støynivået rundt lufthamnene i Fellesskapet
og for å redusere drivstofforbruket og ureine utslepp.
Eldre flytypar som er bygde om for å nå eit
betre nivå med omsyn til støysertifisering, har
eit vesentleg høgare støynivå enn moderne
flytypar med same masse som opprinneleg er sertifiserte for å stette
standardane i del II kapittel 3 i bind 1 av vedlegg 16 til konvensjonen
om internasjonal sivil luftfart, 3. utgave (juli 1993).
Rådsforordninga innfører eit
forbod mot å føye til desse eldre, støyombygde
flytypane i medlemsstatane sine registre frå den datoen
då denne forordninga blir teken i bruk. Forordninga fastset òg
eit bruksforbod med overgangsperiodar, føresegner for omsertifiserte sivile
subsoniske fly som er registrerte i ein tredjestat og reglar for
mellombels unntak for sivile subsoniske fly. Dette vil det bli gjort
nærare greie for i odelstingsproposisjonen som skal gjennomføre
avgjerda.
USA har reagert negativt på rådsforordninga
med tilvising til uheldige konsekvensar for handelen med omsertifiserte
fly.
Avgjerda til EØS-komiteen blei teken
med atterhald om Stortinget si godkjenning ettersom gjennomføringa i
norsk rett gjer det nødvendig med ei lovendring. Samferdselsdepartementet
vil fremje ein eigen odelstingsproposisjon med dei nødvendige
lovendringane som vil gi den nødvendige heimelen til å krevje
luft- og miljødugleiksbevis som grunnlag for registrering.
Ein reknar ikkje med at forordninga vil få vesentlege administrative
eller økonomiske konsekvensar.
Utkast til innstilling har vore lagd fram for
utanrikskomiteen, som ikkje har merknader til saka.
Komiteen har ingen
merknader, viser til proposisjonen og rår Stortinget til å gjere
slikt
vedtak:
Stortinget samtykkjer i godkjenning av EØS-komitéavgjerd
nr. 150/1999 av 5. november 1999 om endring av vedlegg
XIII (transport) til EØS-avtala.
Oslo, i samferdselskomiteen, den 5. juni 2000
Oddvard Nilsen
leiar |
Eirin Faldet
ordførar |
May Britt Vihovde
sekretær |