Avgjerd i EØS-komiteen nr. 39/2000
av 11. april 2000 gjeld innlemming i protokoll 31 (om samarbeid på særlege
område utanfor dei fire fridommane) til EØS-avtala
av fellesskapshandlingsprogrammet om førebyggjande tiltak
for å kjempe mot vald mot barn, ungdom og kvinner (Daphne-programmet).
Programmet vart skipa ved eit vedtak i Rådet 24. januar
2000 og gjeld for perioden 1. januar 2000 til 31. desember 2003.
EU har tidlegare gjennomført Daphne-initiativet
som starta tidleg i 1997 og vart avslutta i desember 1999. Noreg
har ikkje teke del i dette initiativet. Initiativet var eit svar
på Kommisjonen si aukande uro over vald mot barn, ungdom
og kvinner i Europa.
Med det nye programmet har EU ønskt å utvide
programmet på tre område. Under initiativet kunne
berre frivillige organisasjonar søkje stønad.
Under Daphne-programmet vil for det første styresmakter òg
verte oppmoda til å sende inn søknader. Det vert
særleg oppmoda til tverrnasjonalt samarbeid mellom NGO-ar
og nasjonale, regionale og lokale styresmakter. For det andre vil
den geografiske spreiinga aukast då EFTA/EØS-landa
no er inviterte til å ta del i programmet, saman med sentral-
og aust-europeiske land, Kypros, Malta og Tyrkia. For det tredje
vert det opna for fleirårige prosjekt som vil evaluerast
kvart år. Daphne-initiativet støtta berre eittårige
prosjekt.
Då Noregs deltaking i handlingsprogrammet
vil gjere det naudsynt å gje løyvingar i fleire år
framover, er Stortinget sitt samtykke til deltaking naudsynt i medhald
av Grunnlova § 26, andre leddet.
Daphne-programmet tek mål av seg til
– å medverke
til å auke trygginga av fysisk og psykisk helse, for det
første ved at barn, ungdom og kvinner vert verna mot vald
(medrekna seksuell vald og mishandling), for det andre ved å hindre vald
og for det tredje ved å gje støtte til valdsofra slik
at dei ikkje vert utsette for vald att i framtida,
– å støtte og
oppmuntre NGO-ar og andre organisasjonar, medrekna offentlege styresmakter,
som arbeider mot vald.
Tiltaka skal medverke til at det vert etablert
samarbeid over landegrensene (tverrnasjonale tiltak) og tverrfaglege
nett, og at det vert utvikla god praksis og samarbeid på lokalt
nivå for å sikre utveksling av informasjon. Vidare
skal det gjennomførast tverrnasjonale tiltak for å auke
den allmenne kjennskapen og tilgangen til tilleggstiltaka, som gjer
det mogleg for Kommisjonen m.a. å nytte seg av sakkunnige
og arrangere møte og seminar for dei.
Det totale budsjettet for dette fireårige
programmet (2000-2003) er 20 millionar euro, og budsjettet for 2000
er 5 millionar euro.
Av den finansielle ramma på 20 millionar
euro vil Noreg sin del utgjere om lag 1,7 pst. Etter gjeldande kurs
vil dette utgjere om lag 2,8 mill. kroner for heile programperioden.
Det er sett av midlar til deltaking i programmet for 2000 over budsjettet
til Barne- og familiedepartementet, kap. 857, post 79.
Deltakinga i handlingsprogrammet krev ikkje
endringar i lover eller forskrifter.
Utkast til innstilling vart sendt til Utanrikskomiteen 6.
juni 2000. Utanrikskomiteen opplyser i brev 7. juni 2000 at komiteen
ikkje har merknader til utkastet.
Komiteen viser til merknader
frå partia i komiteen si budsjettinnstilling for år
2000, jf. Budsjett-innst. S. nr. 2 (1999-2000).
Komiteen har ellers ingen merknader,
viser til dokumentet og rår Stortinget til å gjere
slikt
vedtak:
Stortinget samtykkjer til godkjenning av avgjerd
i EØS-komiteen nr. 39/2000 om endring av protokoll
31 til EØS-avtala om EFTA/EØS-statane
si deltaking i fellesskapshandlingsprogrammet om førebyggjande tiltak
for å kjempe mot vald mot barn, ungdom og kvinner (Daphne-programmet)
(2000 - 2003), i samsvar med St.prp. nr. 71 (1999-2000).
Oslo, i familie-, kultur- og administrasjonskomiteen, den 8. juni 2000
Oddbjørg Ausdal Starrfelt
fung. leiar og sekretær |
Frank Willy Larsen
ordførar |