Samferdselsdepartementet legg i proposisjonen fram
eit forslag om delvis bompengefinansiering av trinn 1 av miljøpakke
for transport i Trondheim.
Det lokale forslaget til miljøpakke for transport
i Trondheim er basert på eit forlik mellom seks parti i bystyret.
Miljøpakka inneheld ei rekke tiltak som mellom anna har som mål
å redusere CO2-utsleppa med 20 pst. innan 2018, auke delen som reiser
med miljøvennleg transport (gang-, sykkel-, og kollektivtransport)
og redusere reisene med privatbil.
For å nå desse måla blir det satsa på ei rekke ulike
tiltak. Det er prioritert å vidareføre utbygginga av eit hovudvegnett
som mellom anna skal avlaste biltrafikken rundt dei sentrale byområda. I
dette vegnettet inngår utbygging av E6 Sluppen–Stavne som også inkluderer
bygging av ny Sluppen bru. I tillegg er det lagt opp til utbygging
av E6 Jaktøyen–Tonstad. Som ein del av utbygginga av eit avlastande
hovudvegnett blir det lagt opp til å bygge naudsynte lokale tilknytingsvegar
og gang- og sykkelvegar. I tillegg er det prioritert kollektivtrafikktiltak,
utbygging av hovudruter for sykkeltrafikk, trafikktryggleikstiltak
og miljøtiltak. Kommunen og fylkeskommunen ønskjer i tillegg å styrke
kollektivtransporten gjennom å bruke bompengar til drift av kollektivtransporten
i Trondheim. Kommunen vil også vidareføre ein areal- og parkeringspolitikk
som har som mål å redusere transportbehovet.
Den lokalpolitiske behandlinga er nærare omtalt i
kapittel 3 i proposisjonen.
Det lokale forslaget til miljøpakke inneheld
omtrentlege rammer for investeringar innafor ulike sektorar. I tillegg
er det lagt til grunn ekstra driftsmidlar til kollektivtransport.
Den samla økonomiske ramma i det lokale forslaget som blei vedteke
av Trondheim kommune 29. januar 2009, er på om lag 6,7 mrd. kroner.
Som grunnlag for finansieringa har Trondheim kommune rekna med inntekter
frå ei lokal miljøavgift på drivstoff, bompengeinntekter, statlege
tilskot frå belønningsordninga for kollektivtransport og riksvegmidlar.
Halvparten av kostnadsramma er føresett å gå
til tiltak for å betre miljøforholda, trafikktryggleikstiltak og
til alternative transporttilbod til bil. Her inngår tiltak på både
statleg, fylkeskommunalt og kommunalt vegnett. Den andre halvparten av
midlane er føresett å gå til utbygging av hovudvegnettet.
Sør-Trøndelag fylkeskommune slutta seg til innhald
og målsetjing i miljøpakka for Trondheim i fylkestinget sitt møte
29. januar 2009. Fylkeskommunen la til grunn i sitt vedtak at midlar
frå belønningsordninga for kollektivtransport blir halde utafor
inntektssida i miljøpakka.
Det er fleire element i finansieringsplanen
som er vedteke lokalt som gjer at det ikkje er mogleg å legge fram
ei pakke med ei samla ramme på 6,7 mrd. kroner. Det er i dag ikkje
heimel til å krevje inn ei lokal avgift på drivstoff for å finansiere mange
av dei tiltaka som er føresette i det lokale forslaget. For å kunne
bruke ei lokal drivstoffavgift som verkemiddel, er det naudsynt
å skaffe eit lovgrunnlag for ei slik innkrevjing.
I St.meld. nr. 16 (2008–2009) Nasjonal transportplan
2010–2019, er det lagt til grunn 700 mill. kroner til prosjekt og
tiltak i Trondheim innafor ramma til riksveginvesteringar for tiårsperioden.
Fylkeskommunane tek over ansvaret for øvrige riksvegar frå 1. januar
2010.
Dersom ein legg til grunn at dei statlege midlane til
miljøpakka er avgrensa til føreslåtte riksvegløyvingar i perioden
2010–2019 og at det ikkje er lovheimel for å krevje inn ei lokal miljøavgift
på drivstoff, blir den økonomiske ramma til miljøpakka om lag 4,8
mrd. kroner. I denne ramma er vidareføring av dagens kommunale og
fylkeskommunale løyvingar til lokale vegar inkludert.
Trondheim kommune og Sør-Trøndelag fylkeskommune
ønskjer likevel å fremje miljøpakka med ei redusert ramme. Dei har
derfor bedt om å få fremje pakka i to trinn, der trinn 1 tilsvarar
den økonomiske ramma som per i dag er avklart.
Miljøpakka omfattar vidare utbygging av eit
avlastande hovudvegsystem rundt Trondheim og vidare utbygging av
E6 sør for Trondheim. I tillegg vil det bli gjennomført tiltak for
å legge forholda til rette for kollektivtransport og syklande og
gåande, samt tiltak for å fremje trafikktryggleik og miljø.
Det er eit mål å fullføre riksvegringen rundt Trondheim
slik at byen får eit tilfredsstillande hovudvegnett som kan avlaste
dei sentrale byområda for gjennomgangstrafikk. I dette vegnettet
inngår prosjekta Sluppen bru og E6 Sluppen–Stavne. Det er lagt opp
til at Sluppen bru byggast med fire felt. For E6 Sluppen–Stavne
er det vurdert alternativ med to og fire felt.
E6 sør for Trondheim mellom Jaktøyen og Tonstad
har låg standard i forhold til trafikkmengda. Kombinasjonen av mykje
trafikk, tofeltsveg, sterk stigning og for liten kapasitet på kryssa, fører
til dårleg framkomst og relativt mange ulykker på strekninga. Det
er lagt opp til at vegen byggast med motorvegstandard, dvs. minimum fire
felt, midtrekkverk og planskilte kryss.
Den økonomiske ramma for trinn 1 av miljøpakka
er på om lag 4,8 mrd. kroner. Kostnadsgrunnlaget for mange av tiltaka
som er omtalt, er i hovudsak henta frå prosjektarbeidet med E6-sør
og Sluppen bru/Oslovegen, samt transportplanen for Trondheim som
blei vedtatt i februar 2007. Nærare planavklaring er naudsynt for mange
av tiltaka. Departementet vil kome tilbake til Stortinget med nærare
tidspunkt for oppstart av dei einskilde riksvegprosjekta i pakka
så snart det ligg føre godkjente planar og kvalitetssikra kostnadsoverslag.
Prosjekta i trinn 1 av miljøpakka er nærare
omtala i kapittel 4 i proposisjonen, m.a. er det lagt opp til at
E6 skal byggast om til 6 felt mellom Sentervegen og Tonstadkrysset
og E6 Sluppen–Stavne, inkludert ny Sluppen bru, blir bygd ut som
ein del av trinn 1.
Det største prosjektet på det lokale vegnettet
er Byåsentunnelen.
I tillegg er det lagt opp til ei sterk satsing
på kollektivtrafikktiltak, utbygging av gang- og sykkelvegar, miljøtiltak
og trafikktryggingstiltak.
Trondheim kommune og Sør-Trøndelag fylkeskommune
har lagt til grunn at bompengar kan nyttast til drift av kollektivtransport
i Trondheim.
Departementet vil kome tilbake til Stortinget med
ei samla framstilling som viser heilskapen i pakka, og som i tillegg
viser kva type driftstiltak inntektene frå bompengepakka skal nyttast
til. Det er ein føresetnad at bruk av bompengar til driftstiltak
for kollektivtrafikken skal gi ei reell styrking av kollektivtilbodet.
Finansieringa av miljøpakke for transport i Trondheim
er basert på innkrevjing av bompengar og statlege, fylkeskommunale
og kommunale midlar. Eventuell brukarbetaling i form av ei lokal
avgift på omsetjing av drivstoff må departementet kome tilbake til
i samband med trinn 2 av miljøpakka. I tråd med vanleg praksis skal dei
ulike forvaltningsnivåa finansiere tiltak innafor eige ansvarsområde.
Bompengane kan i prinsippet nyttast til tiltak på riksvegar, fylkesvegar og
kommunale vegar så lenge bruken av bompengar skjer i samsvar med
dei rammer som veglova § 27 gir.
Finansieringsopplegget er nærare omtala i kapittel
5 i proposisjonen.
Lokalt er det lagt til grunn innkrevjing i sju
bomstasjonar som er plasserte i tre ulike snitt i Trondheim.
Det er lagt til grunn parallellinnkrevjing i
automatiske, ubemanna stasjonar. Bomstasjonane er basert på Autopass-systemet
og vil ha tilsvarande teknologiske løysingar som eksisterande bomstasjonar
i Oslo, Bergen og Tønsberg.
Registreringar av årsdøgntrafikken gjennom eller
i nærleiken av dei tre bomstasjonssnitta er grunnlaget for å rekne
ut bompengeinntektene i miljøpakka.
Det er ikkje lagt inn trafikkvekst i perioden
i grunnlaget for å rekne ut bompengeinntekter. Dette samsvarer med
målet om at den delen av trafikantane som reiser med privatbil,
skal reduserast frå 58 til 50 pst. Målet er at fleire trafikantar
vil bruke buss, sykle eller gå i staden for å bruke bil.
Kommunen og fylkeskommunen har lagt til grunn
at innkrevjinga av bompengar kan starte opp 1. januar 2010. Det
er meir realistisk at innkrevjinga kan starte opp i løpet av første
halvår 2010. Statens vegvesen meiner at det vil ta om lag åtte månader
frå Stortingets vedtak til innkrevjinga kan starte opp.
Trondheim kommune og Sør-Trøndelag fylkeskommune
har i sine vedtak 29. januar 2009 lagt til grunn nokre prinsipp
for utarbeiding av eit takstsystem, jf. kapittel 5.3 i proposisjonen.
Bomstasjonane er plasserte slik at alle dei
som betaler, får nytte av eit eller fleire av tiltaka. Legg ein
til grunn at E6 Jaktøyen–Tonstad blir bygd ut som ein del av miljøpakka,
er samanhengen mellom betaling og nytte godt ivaretatt i det skisserte
opplegget.
Finansieringsplanen som er lagt til grunn, er
vist i tabell 5.1 i proposisjonen.
Tabell 5.1 Finansieringsplan.
| 2010–2013 | 2014–2019 | 2020–2024 | SUM |
Statlege midlar | 200 | 500 | | 700 |
Kommunale midlar | 40 | 60 | 50 | 150 |
Fylkeskommunale
midlar | 20 | 30 | 25 | 75 |
Bompengar | 1040 | 1560 | 1300 | 3900 |
Sum | 1300 | 2150 | 1375 | 4825 |
Det er i utgangspunktet ikkje føresett at bompengeselskapet
må ta opp lån for å finansiere tiltaka i miljøpakka. Det er derfor
ikkje rekna med finansieringskostnader knytt til låneopptak.
For å få gjennomført naudsynt planlegging og prosjektering
av tiltaka i miljøpakka, er det lagt opp til at bompengeselskapet
kan finansiere inntil 15 mill. kr i planleggingsmidlar i 2009 gjennom
låneopptak.
Basisføresetnader som er lagt til grunn for
bompengeutrekninga er elles omtala i kapittel 5.4 i proposisjonen.
Bompengepakker er meir fleksible enn bompengeinnkrevjing
for enkeltprosjekt. Det blir lagt til grunn at omfanget av utbygginga
i miljøpakka blir tilpassa den økonomiske ramma.
Det vil bli etablert eit kontaktutval som skal
ha som oppgåve å sjå til at alle tiltak som blir starta opp, lar
seg finansiere innafor dei økonomiske rammene i miljøpakka og i
tråd med dei føringar som er gitt i proposisjonen.
I trinn 2 av miljøpakka vil heilskapen i pakka
bli omtalt. Det inneber også at den endelege prioriteringa av prosjekt
og tiltak i miljøpakka skal leggjast fram i trinn 2. Grunnlaget
for prioriteringa vil mellom anna vere handlingsprogrammet til Nasjonal
transportplan for perioden 2010–2013, og handlingsprogrammet for
fylkesvegane i Sør-Trøndelag.
Departementet legg vidare til grunn at fylkeskommunen
må avklare om dei vil auke det fylkeskommunale bidraget til miljøpakka
som følgje av at dei overtar ansvaret for øvrige riksvegar frå 1. januar
2010. Det kan også vere aktuelt å vurdere takstnivået i bomstasjonane.
Samferdselsdepartementet viser til at det er
tverrpolitisk semje om å etablere ei miljøpakke for transport i
Trondheim. Departementet er samd med lokale styresmakter i at det
er viktig å starte opp bompengeinnkrevjinga i Trondheim for å kunne
kome i gang med utbygginga av dei viktigaste tiltaka så snart som
mogleg. Departementet støttar derfor opplegget med å fremje trinn 1
av miljøpakka i denne omgangen.
Det lokale forslaget til takstsystem er ei omlegging
i forhold til dagens system når det gjeld flat rabatt ved bruk av
autopassbrikke, og avvik frå dei generelle takstretningslinene.
Føringane dei lokalt har lagt på takstsystemet, inneber i praksis at
dei går inn for eit system som tilsvarar det takst- og rabattsystemet
som er innført i Oslo, jf. St.prp. nr. 40 (2007–2008) Om Oslopakke
3 trinn 1. Departementet sluttar seg til konklusjonane lokalt og
går inn for eit takstsystem med flat rabatt ved bruk av autopassbrikke.
Departementet har merka seg at kommunen ønskjer
at taksten på bomstasjonen i Okstadbakken skal settast til 5 kroner
og ikkje vere omfatta av tidsdifferensieringa. Departementet har
også merka seg at fylkeskommunen ikkje har ønska å redusere taksten
i Okstadbakken. Departementet har valt å legge vekt på ønska frå
kommunen i denne saka og aksepterer at det blir sett ein lågare
takst utan ytterlegare rabatt på bomstasjonen i Okstadbakken.
Departementet har merka seg at Trondheim kommune
ønskjer å innføre tidsdifferensiering av takstane slik at dei er
høgare i rushtida og lågare på kveldane og i helga enn elles på
dagen. Grunngjevinga frå kommunen for å innføre ei slik ordning
er at innkrevjingsordninga skal ha ein trafikkregulerande effekt.
I tillegg gir ein slik innkrevjingsmodell ein betre framkomst for
alle trafikantar med same samla økonomiske belasting for bilistane.
Departementet går inn for eit opplegg med tidsdifferensierte
takstar som ein del av finansieringsgrunnlaget for miljøpakke for
transport i Trondheim fordi ei slik ordning gjer at dei trafikkantane
som belastar vegsystemet mest, må betale mest. Dette gir den mest
rettferdige fordelinga av betalingsplikta og inneber ein viss trafikkregulerande
effekt.
Departementet sluttar seg til at bompengeselskapet
kan finansiere inntil 15 mill. kroner i planleggingsmidlar i 2009
gjennom låneopptak.
Departementet vil kome tilbake til oppstart
av dei prosjekta det er aktuelt å starte opp i 2010 i samband med
framlegginga av statsbudsjettet for 2010. Departementet vil også
kome tilbake til trinn 2 av miljøpakka når naudsynte avklaringar ligg
føre. Trinn 2 vil innehalde ein heilskapleg plan og endelege prioriteringar
av prosjekt og tiltak i miljøpakka der også omsynet til arealbruken
er vurdert.
Etter at Stortinget har gjort vedtak om delvis bompengefinansiering
av trinn 1 av miljøpakke for transport i Trondheim, vil det bli
inngått avtale mellom Vegdirektoratet og bompengeselskapet i tråd
med gjeldande standardavtale og dei føresetnadene som er lagt til
grunn i proposisjonen.