1.1 Framlegg til endringar i løyvingar under kapittel og postar i 2011

1.1.1 Kap. 1100 Landbruks- og matdepartementet

Post 45 Store utstyrskjøp og vedlikehald

I Prop. 120 S (2010–2011) blei det lagt til grunn inntekter under kap. 4100 post 40 på 1,190 mill. kroner, og ei tilsvarande justering av kap. 1100 post 45. Inntektene er no justert ned med 610 000 kroner, og løyvinga over kap. 1100 post 45 blir dermed foreslått redusert tilsvarande.

1.1.2 Kap. 1115 Mattilsynet

Post 71 Tilskott til erstatningar

Posten omfattar utgiftene Mattilsynet har til nødhjelp til dyr der utgiftene ikkje kan drivast inn frå eigar. Staten skal i medhald av lova dekkje slike utgifter, og løyvinga over posten er ei overslagsløyving. For å sikre ei realistisk budsjettering, foreslår Landbruks- og matdepartementet å auke løyvinga over posten med 2 mill. kroner til 3,131 mill. kroner.

1.1.3 Kap. 1150 Til gjennomføring av jordbruksavtalen m.m.

Post 71 Tilskott til erstatningar m.m.

Løyvinga over posten er ei overslagsløyving. Det har i år blitt framsett langt større krav enn det som var føresett i Prop. 126 S (2010–2011) som følgje av skadar frå flom og nedbør. Landbruks- og matdepartementet foreslår derfor å auke løyvinga over posten med 40 mill. kroner til 73 mill. kroner.

Post 73 Pristilskott

Løyvinga over posten er ei overslagsløyving, og tilskott blir gitt i tråd med fastsette satsar. Prognosen frå Statens landbruksforvaltning viser eit mindreforbruk på 33,610 mill. kroner for 2011. Landbruks- og matdepartementet foreslår derfor å redusere løyvinga over posten i tråd med dette.

1.1.4 Kap. 4100 Landbruks- og matdepartementet

Post 40 Sal av eigedom

I Prop. 120 S (2010–2011) blei det lagt til grunn inntekter på 1,190 mill. kroner frå sal av tre setre i Dovrefjellsregionen. Landbruks- og matdepartementet foreslår å redusere inntektene over posten med 610 000 kroner.

1.1.5 Kap. 4115 Mattilsynet

Post 1 Gebyr m.m.

Gebyrinntektene under Mattilsynet for 2011 ser ut til å bli lågare enn budsjettert i Prop. 1 S (2010–2011). For å sikre ei realistisk budsjettering, foreslår Landbruks- og matdepartementet å redusere inntekten over posten med 14,8 mill. kroner til 115,5 mill. kroner.

1.1.6 Kap. 4150 Til gjennomføring av jordbruksavtalen m.m.

Post 70 Tilbakebetalt tilskott til reguleringsanlegg

I samband med jordbruksavtalen blei det lagt til grunn at det kunne budsjetterast med 2,025 mill. kroner i tilbakebetalt tilskott for reguleringsanlegg i 2011. Nye anslag tyder på at inntektene blir høgare, og Landbruks- og matdepartementet foreslår derfor å auke inntektene over posten med 1,633 mill. kroner.

Nye anslag tyder på at inntektene frå ordninga blir høgare, og Landbruks- og matdepartementet foreslår derfor å auke inntektsløyvinga over posten med 32 mill. kroner.

1.1.7 Kap. 5576 Sektoravgifter under Landbruks- og matdepartementet

Post 70 Avgifter i matforvaltninga

Nye prognoser tyder på auka inntekter frå avgifter i matforvaltninga på 32 mill. kroner. Landbruks- og matdepartementet foreslår i tråd med dette å auke inntektene på posten med 32 mill. kroner.

1.1.8 Kap. 5651 Aksjar i selskap under Landbruks- og matdepartementet

Post 85 Utbytte

Inntektene på posten blei auka med 11,830 mill. kroner i Prop. 120 S (2010–2011). Endelig avrekning frå Veterinærmedisinsk oppdragssenter AS viser noko større inntekter. Det er også utbetalt utbytte frå Graminor AS. Landbruks- og matdepartementet foreslår derfor å auke inntektene over posten med 870 000 kroner.

1.1.9 Kap. 5652 Innskottskapital i Statskog SF

Post 80 Renter

I samband med kjøpet av Borregaard Skoger AS, Borregaard Vafos AS og Børresen AS frå Orkla ASA, jf. Prop. 11 S (2010–2011), fekk Statskog SF eit ansvarleg lån på 475 mill. kroner frå staten. I 2011 er det venta at Statskog SF vil betale 24,710 mill. kroner i renter på lånet. I tråd med dette foreslår Landbruks- og matdepartementet å opprette ein ny post 80 under kap. 5652 med inntekter på 24,710 mill. kroner for 2011.

1.2 Andre saker

1.2.1 Auka tilsegnsfullmakt, naturskade, kap. 1148 post 71

Landbruks- og matdepartementet foreslår å auke tilsegnsfullmakta for 2011 med 36 mill. kroner til 66 mill. kroner.