Begrunnelse

I innstillinga til St. Meld. 21 (2012-2013) Terrorberedskap, Innst. 425 S (2012-2013), tok Høyre og Fremskrittspartiet opp behovet for eit beredskaps- og sikkerheitselement som «har til oppgave å koordinere og følge opp» beredskapsarbeidet hjå dei ulike departementa og underliggande etatar som har eit beredskapsansvar. Det er òg gjenteke i Sundvolden-erklæringa, og Statsministeren sjølv har lyfta fram eit slikt tiltak som ei styrking av sikkerheits- og beredskapsarbeidet ved fleire høve.
I spørjetimen 6. november spurte eg Statsministeren mellom anna kva oppgåveportefølje ho såg for seg at eit slikt element skulle ha, i kva grad det kom til å overlappe med justis- og beredskapsministeren sitt konstitusjonelle ansvar, og om faren for å byråkratisere beredskapsarbeidet med ytterlegare eit ledd. Eg merka meg at Statsministeren i sitt svar sa at ho ikkje hadde teke stilling til kven som «eventuelt» skulle utgjere dette elementet. I formuleringa ligg det ei opning for at det ikkje kjem eit slikt element, noko som er nytt frå tidlegare.
Statsministeren seier òg i sitt svar at det ikkje er slik at justis- og beredskapsministeren må rapportere til «byråkrater eller ansatte på Statsministerens kontor». I dette ligg det at beredskaps- og sikkerheitselementet både kan vere ein byråkrat eller ein politikar, og det kan framstå som Statsministeren ikkje har teke stilling til kva nivå elementet skal ha ansvar på.
Vidare gjev Statsministeren ikkje eit klårt svar på kva elementet skal gjere på Statsministerens kontor, altså kva oppgåveportefølja er, og kva tangeringspunkt eller overlapping det vil innebere med justis- og beredskapsministeren sitt område. Det sentrale er å få fram i ljoset kva elementet skal gjere og ha myndigheit til å avgjere, før, under og etter ei krisesituasjon.