Begrunnelse

Regjeringa skriv i Hurdalsplattformen at ein vil «Satse på en kraftig forbedring av mobildekningen i hele landet» og «Sørge for at ingen mister fasttelefonen før de har mobildekning eller andre telefonløsninger med minst like god dekning som fasttelefon.»
Kråkenes ytst i Nordfjord (nord-delen av Kinn kommune, tidl. Vågsøy kommune), er ei av bygdene som i mange år har engasjert seg for å få på plass skikkeleg mobildekning i bygda. Dei har tatt opp saka med Telenor anten direkte eller via kommunen tallause gonger, utan å kome vidare. Dei har fleire gonger fått utsett nedstenging av koparnettet på grunn av manglande alternativ for telefoni – men har no nyleg fått ei «endeleg melding» om at noverande feil på koparnettet ikkje blir retta.
Mobildekninga i Kråkenes er dårleg og ustabil, og bygda har ved gjentatte høve vore utan mobildekning i dagevis. Telenor er klar over problemet, som heng saman med at signala kjem frå ein sendar langt unna (Kjerringa på Stadlandet) og må krysse eit langt havstykke for å nå Kråkenes – noko som gir svake og ustabile signal.
Bygda ligg i eit område med mykje røft veir, og stor tilstrøyming av turistar i alle veir-forhold («storm-turisme», Kråkenes fyr). Beredskapssituasjonen når ein frå no av verken har fasttelefoni eller stabil mobiltelefoni i området, er ut frå dette under ein kvar kritikk.
Eg vil ut frå dette på det sterkaste be Kommunal- og distriktsministeren om å gå i dialog med Telenor for å finne ei løysing som sikrar mobildekning og ein trygg kvardag for folk i Kråkenes-bygda, og å sikre at formuleringa i Hurdals-erklæringa om å «Sørge for at ingen mister fasttelefonen før de har mobildekning eller andre telefonløsninger med minst like god dekning som fasttelefon» blir følgd opp.