Spørsmål

Alfred Jens Bjørlo (V): Kva konkret er det som har endra seg mellom 12. mai og 6. juni i år som gjer at regjeringa no likevel ikkje vil utsetje bygginga av Ocean Space Center, og korleis vil regjeringa finansiere det ekstra løyvingsbehovet dette utløyser i 2022 utan å auke oljepengebruken?

Begrunnelse

Regjeringa foreslo i Revidert Nasjonalbudsjett 12. mai å utsetje bygginga av Ocean Space Center i Trondheim, eitt av verdas mest avanserte anlegg for forsking og undervising knytt til havet og havnæringane. I ein pressekonferanse 6. juni varslar regjeringa at dei har endra syn i saka, og no vil bygge Ocean Space Center likevel og løyve midlar til prosjektet utover det som ligg inne i RNB 2022. I følge Fiskeriministeren er bakgrunnen for dette at regjeringa har «iverksatt tiltak for å sikre kostnadskontroll» og at «vi kan få til en styring av prosjektet».

Svar

Bjørnar Skjæran: Regjeringa har sidan revidert nasjonalbudsjett vart lagt fram hatt ein ny gjennomgang av Ocean Space Centre-prosjektet, på bakgrunn av auka materialkostnader og usikkerheiter i prosjektet. Regjeringa har vidare vurdert styringssystemet for prosjektet og kostnader ved utsetjing. Den 1. juni mottok Nærings- og fiskeridepartementet ei førebels kutteliste frå Statsbygg, som gjorde greie for moglegheita for å halde prosjektet innanfor vedteken kostnadsramme. Regjeringa valde på bakgrunn av dette å gå vidare med prosjektet. Som eg omtalte i brev til Stortinget 6. juni: Ei førebels kuttliste indikerer store moglegheiter for kutt, men også endringar som tek ned kostnadene utan å redusere funksjonalitet ved senteret. Kuttlista skal kvalitetssikrast før ho sendast til Nærings- og fiskeridepartementet 7. juli.
Regjeringspartia på Stortinget har sagt seg villige til å drøfte naudsynte endringar i løyvingar for 2022 i forhandlinga med Sosialistisk Venstreparti. Regjeringa vil i statsbudsjettet for 2023 komme tilbake til Stortinget med ei nærare vurdering av saka, mellom anna om naudsynte endringar og kostnadsreduksjonar i prosjektet.