Sigbjørn Gjelsvik (Sp): Korleis vil statsråden sikre at prosessar hos Statens vegvesen og andre statlege instansar og aktørar ikkje bidreg til å forsinke prosjektet rv. 22 Ny Glommakryssing, som er eit av dei aller høgast prioriterte prosjekta frå Senterpartiet og Arbeiderpartiet i Nasjonal Transportplan 2025 - 2036?
Begrunnelse
Ny Glommakryssing har vore jobba med over lang tid, det var eit av dei høgast prioriterte prosjekta i Nasjonal Transportplan 2025 -2036 som Senterpartiet og Arbeiderpartiet i regjeringa la fram i fjor vår og det står også høgt på prioriteringslista som Statens vegvesen offentleggjorde for nokre dagar sidan.
I Statens vegvesen si pressemelding i samband med deira framlegg av rekkefølgen av prosjekta i deira portefølje, heiter det m.a. at «Modenhet er viktig for rangeringen. Det vil si at alle planprosesser og prosedyrer for kvalitetssikring er gjennomført. Vegvesenet prioriterer prosjekter der vi er sikre på at vi har funnet de beste økonomiske og tekniske løsninger.»
I utgangspunktet var reguleringsplanen frå Statens vegvesen klar til å sendast til Lillestrøm kommune før sommeren, men kan no verte utsett i tid. Ein av sakene som gjer at framdrifta i prosjektet nok ein gong kan verte påverka, mellom anna omtalt i Romerikes blad 8. april i år, er Akershus fylkeskommune sitt avslag på Statens vegvesen sin søknad om dispensasjon frå Lov om kulturminner for bygging av brutårna på den nye Glommakryssingen, som no ligg til handsaming hos Riksantikvaren. Eit anna spørsmål som har vore omtalt i lokalmedia den seinare tid, mellom anna gjennom ein artikkel i Indre Akershus blad 21. april i år, er materialbruk og farge på den nye brua.
Det er avgjerande at gjenståande spørsmål i planprosessen vert avklart raskt, slik at prosjektet ikkje risikerer å bli skuva ut i tid nok ein gong.