Erling Sande (Sp): Kva vil samferdsleministeren gjere for å sikre at Statens Vegvesen brukar skjønn for å løyse trafikale utfordringar, når både areal og topografi tilseier at ein får klart betre samla løysingar for samfunnet ved å gje aksept for minnelege løysingar, og kommunen også ønskjer det?
Begrunnelse
På Lund i Stad kommune ønskjer selskapet Nordfjord Vegservice å ta i bruk eit næringsareal ved Riksveg 15. Geografien langs Nordfjorden tilseier at det ofte kan vere krevjande å finne passande næringsareal som ikkje kjem i konflikt med andre statlege mål og krav for arealbruk. I dette tilfelle har selskapet lukkast å finne areal som ligg høveleg til og har lite andre arealkonfliktar. Kommunen har gjeve tilslutnad til plasseringa, men statens vegvesen har motsegn mot planen på grunn av avkøyringsløysing mot RV 15. SSV har oppretthalde denne motsegna etter mekling med kommunen. Den konkrete saka skal avgjerast av KDD, difor er spørsmålet til Samferdsleministeren av generell karakter.
Landskapet langs fjordane våre er ofte kjenneteikna av kort avstand mellom fjellet og fjorden, og på denne stripa skal det meste av infrastruktur leggjast. Det gjer at dei statlege vegane både fungerer som gjennomgåande vegar og i stor grad lokalvegar. Ein har ikkje på lik linje med andre stader i landet høve til å ha fleire vegar paralellt og det kan tale for å tillate nokre fleire avkøyrsler på riksvegane enn det ein gjer der ein har meir areal å bruke.
Saka på Lund er ei av fleire saker det Statens Vegvesen ser ut til å legge seg på ein meir rigid praksis for å godta avkøyrsler, enn det som vert oppfatta som fornuftig med tanke på å finne samla gode løysingar for transport og arealbruk.