Høyringsinnspel frå Nynorsk forum til Meld. St. 23 S (2020-2021) Musea i samfunnet.

Nynorsk forum takkar for høvet til å kome med høyringsinnspel til museumsmeldinga.

Vi ønskjer at komiteen stadfester at musea bør halde seg til føremålsparagrafen i språklova. Og har elles nokre innspel til korleis den språklege dimensjonen i kulturarven kan følgjast opp.

Vi viser til Innst. 253 L (2020-2021) om språklova der komiteen har samla seg om merknadene:

«Komiteen viser til at det er eit mangfald av museum som arbeider med blant anna samiske språk, kvensk, romani, nynorsk og teiknspråk. Komiteen meiner desse musea kan samarbeide tettare for å formidle språkleg mangfald og å vere ressursar for språkdimensjonen av museumsarbeidet elles. Komiteen viser til at regjeringa har varsla at det kjem ei ny museumsmelding der den språklege dimensjonen i kulturarven kan følgast opp av komiteen.»

«Komiteen viser til at både Sunnfjord kommune og Nynorsk kultursentrum har teke initiativ til nettverk for å styrkje nynorsk kulturformidling i til dømes bibliotek, kulturhus, museum og scenekunstinstitusjonar. Komiteen er positive til samarbeid som er med på å styrkje den språkpolitiske dimensjonen av kulturpolitikken på lokalt, regionalt og nasjonalt nivå.»

Meld. S. 23 (2020-2021) innleier med å seie at musea spelar ei viktig rolle i vår eiga tids forståing av oss sjølve – både kven me har vore, kven me er og kven me vil vere. Det står vidare at musea er med på å forme grunnleggjande samfunnsverdiar. Språket er ein viktig identitetsmarkør og måten vi i Noreg handterer språklege konfliktar på, heng saman med samfunnsverdiane våre. Nynorsk forum ser fram til å høyre meir om korleis Kulturdepartementet vil følgje opp ambisjonen om å «styrke norsk språk [...] som grunnleggjande kulturberarar» gjennom musea.

I Språklova, Innst. 253 L (2020-2021) kapittel 1.2 slår Stortinget fast at «det offentlege har eit særleg ansvar for å fremje nynorsk som det minst bruka språket». Museumsforbundet skreiv i sitt høyringsinnspel til språklova:

Synlege og språkbevisste museum kan vere med på å nå dei overordna måla for det nynorske skriftspråket. [...]  Musea kan ha ein særleg rolle i å dokumentere nærveret av to skriftspråk i Noreg. Dei har også ein viktig rolle i å bruke og utvikle eit nynorsk fagspråk.

Nynorsk forum stiller seg bak dette og meiner det bør framhevast at fleire museum enn dei som brukar nynorsk aktivt i dag, bør auke bruken av nynorsk, for at musea skal vere med på å nå desse måla. Vi ønskjer at komiteen stadfester at musea bør halde seg til føremålsparagrafen i språklova.

Familie- og kulturkomiteen har forplikta seg i språklov-innstillinga til å gå vidare med den språklege dimensjonen i kulturarven i denne meldinga. Institusjonar og organisasjonar som representerer mindretalsspråka etablerer no på eige initiativ fleire samarbeidsplattformer seg i mellom, mellom anna gjennom nettverket for språkmuseum. Andre nettverk kryssar andre språkgrenser, som t.d. Litteraturnettverket som i 13 år har utvikla eit godt fagleg samarbeid mellom bokmåls- og nynorskinstitusjonar.

Den språklege dimensjonen i kulturarven kan elles følgjast opp gjennom desse innspela: 

Kapittel 5 Solid kunnskapsproduksjon

• Det er positivt at språk er trekt fram som eige delkapittel.
• Musea er tett på samfunnet og røynda. Dei har derfor eit viktig utgangspunkt for å drive språkdokumentasjon og -forsking. Det er viktig at språk, som immaterielt emne, får like vilkår som andre emne.
• Språk i samfunnet er eit viktig emne som i liten grad er dekt av UH-sektoren. Som kunnskapsinstitusjonar kan musea styrkje kunnskapen om språk i samfunnet og forvalte og formidle kunnskapen til ulike brukargrupper.

Kapittel 6 Relevant formidling

• Mangfaldsperspektivet er avgjerande for at musea skal fylle samfunnsrolla si.
• Språk er ein del av mangfaldsprofilen, og tilbodet på og for mindretalsspråka må auke. Dersom nynorsk skal vere reelt jamstilt, slik språklova føreset, må fleire museum i det nasjonale museumsnettverket medvite auke bruken av nynorsk.
• Nynorsk kultursentrum kan ta ei særleg rolle som kompetansesenter for formidling av og på nynorsk.

Kapittel 7 Heilskapleg samlingsutvikling

• Gjenstandar i alle samlingar kan ha ein språkleg dimensjon. Dette bør dokumenterast og kome fram i samlingsstrukturen. Ansvaret bør vere både i museumssektoren, hjå Nasjonalbiblioteket og Arkivverket.
• Meldinga legg vekt på at musea skal ha digitale fellesløysingar for registrering av samlingar. Den språklege dimensjonen må ivaretakast ved oppdatering og utvikling av data- og informasjonssystem og digital infrastruktur. Det er viktig at både tilsette i museumssektoren og brukarane av tenestene til musea får bruke og møte eige språk gjennom den digitale samlingsforvaltninga.
• Ein heilskapleg innsamlingsplan som sikrar samisk og kvensk er på plass. Det er viktig at det vert sett av midlar også til ein liknande plan for nynorsk skriftkultur.

Kapittel 9 Aktiv samhandling

• Folkebiblioteka er ikkje nemnd som ein aktør musea bør samarbeide meir med. Musea og folkebiblioteka vender seg til mykje av det same publikummet med ein del typar arrangement, som samtalar og bokkafear. Eit samarbeid med biblioteksektoren kan mellom anna derfor få større plass enn i meldinga.
• Nasjonalbiblioteket er nemnd som ein viktig samarbeidspartnar for musea når det gjeld samlingsforvaltning, digitalisering og trygg lagring. Nasjonalbiblioteket er også ein stor ressurs for musea når det gjeld formidling. Nasjonalbiblioteket låner ut unikt materiale til skiftande utstillingar, og kan også hjelpe musea å skaffe materiale til permanente utstillingar, forfattarjubileum og andre markeringar.

 

Nynorsk forum er eit samarbeidsorgan for nynorske institusjonar, organisasjonar og bedrifter. Forumet drøftar viktige spørsmål om nynorsk i kulturlivet og samfunnet. Medlemer i forumet er BUL i Oslo, Dag og Tid, Det Norske Samlaget, Det Norske Teatret, Jærmuseet/ Garborgsenteret, Kringkastingsringen, Landssamanslutninga av nynorskkommunar, Nasjonalt senter for nynorsk i opplæringa, Noregs Mållag, Noregs Ungdomslag, Norsk Barneblad, Norsk Målungdom, NRK Nynorsk mediesenter, Nynorsk avissenter, Nynorskfylket Vestland, Nynorsk kultursentrum og Nynorsk pressekontor.