Til Stortinget
Grunnlova § 57 seier at stortingsmandata si fordeling mellom
dei ulike valdistrikta skal gjerast kvart åttande år. Fylka i Noreg
er valdistrikta. Kommunal- og regionaldepartementet offentleggjorde
7. mai 2012 fordelinga som skal gjelda for stortingsvala i 2013
og 2017. Til grunn for denne fordelinga av stortingsmandat ligg
innbyggjartalet i fylket og arealet av fylket. Neste endring blir
gjeldande frå stortingsvalet i 2021.
Etter Grunnlova kan berre norske borgarar verta valde som stortingsrepresentantar,
og berre norske borgarar kan røysta ved stortingsval. Men ved utrekninga
av mandatfordelinga til Stortinget blir derimot òg utanlandske borgarar
registrerte som busette i Noreg tekne med i utrekningsgrunnlaget.
Talet på utanlandske borgarar og fordelinga av dei mellom valdistrikta
påverkar slik mandatfordelinga mellom distrikta. Forslagsstillarane
meiner det er prinsipielt galt at personar utan røysterett ved stortingsval
påverkar mandatfordelinga mellom valdistrikta berre ved å vera busette
i Noreg. Forslagsstillarane meiner dette er ein demokratisk uheldig
inkonsekvens i Grunnlova som bør rettast opp uavhengig av synet
på kva følgjer opprettinga vil ha for mandatfordelinga.
Forslagsstillarane meiner utrekningsgrunnlaget for mandatfordelinga
til Stortinget må vera den same gruppa som har røysterett ved stortingsval.
Forslagsstillarane føreslår difor at paragraf 57 i Grunnlova
vert endra slik at utanlandske borgarar ikkje skal reknast med ved
mandatfordelinga til Stortinget.
På dette grunnlaget vert det fremja følgjande
framlegg:
§ 57 femte ledd skal lyda:
Talet på stortingsrepresentantar som skal veljast frå kvart valdistrikt,
blir utrekna på grunnlag av høvet mellom talet på norske borgarar
og flatevidda i distriktet på den eine sida og talet på norske borgarar
og flatevidda i heile riket på den andre sida. I denne utrekninga
gjev kvar borgar 1 poeng og kvar kvadratkilometer 1,8 poeng. Utrekninga
skal gjerast kvart åttande år.
–
Det antall stortingsrepresentanter som skal velges fra hvert
valgdistrikt, beregnes på grunnlag av forholdet mellom distriktets
antall norske borgere og areal på den ene siden og hele rikets antall
norske borgere og areal på den andre siden. I denne beregning gir
hver borger 1 poeng og hver kvadratkilometer 1,8 poeng. Beregningen
skal foretas hvert åttende år.
Per Olaf Lundteigen | | Helge Thorheim |
Referert i Stortingets møte 30. september 2016.
«Forslaget blir under presidentens ansvar å bekjentgjøre ved
trykken for å komme til avgjørelse på første, annet eller tredje
storting etter neste valg.»
Olemic Thommessen |
president |
30. september 2016