Eg syner til brev frå Næringskomiteen
av 21. februar d.å. vedkomande forslag frå stortingsrepresentantane Olav
Gunnar Ballo, Hallgeir H. Langeland, Heidi Sørensen og Åsa
Elvik om å forvalte kongekrabben som ein uønska
introdusert art - dokument 8:29 (2002-2003).
Eg har følgjande svar på dei
spørsmåla som Næringskomiteen stiller
i brevet:
1. Under høyring
i komiteen fredag 21. februar 2003 vart det sagt at Gråsoneavtalen
også regulerer forvaltninga av kongekrabben. Kva konkret
dreier dette seg om?
"Avtalen mellom Norge og Sovjetunionen om en midlertidig
praktisk ordning for fisket i et tilstøtende område
i Barentshavet", eller "Gråsoneavtalen" som den også blir
kalla, blei underteikna av Noreg og Sovjetunionen 11. januar 1978.
Den tok til å gjelde med ein gong, og har sidan blitt fornya
på årleg basis.
Koordinatene for "Gråsona" er følgjande:
1. 7040’N–3204,6’Ø | 5. 7318’N–3330’Ø |
2. 7130’N–3000’Ø | 6. 7250’N–3630’Ø |
3. 7400’N–3000’Ø | 7. 7050’N–3630’Ø |
4. 7400’N–3330’Ø | |
Ordningane for utøving av fisket som
avtala fastset gjeld altså berre innafor dette området.
I artikkel 7 c) i avtala står følgjande:
"Intet fartøy skal fange og oppbevare ombord Kamchatka-krabbe.
Tilfeldig oppfisket Kamchatka-krabbe skal omgående i levende
tilstand bringes tilbake i sjøen." Gråsoneavtala fastset
altså eit utkastpåbod for konge-krabbe i området spesifisert
ovanfor.
I artikkel 8 i avtala står like fullt
følgjande: "Endringer i paragrafene 6 og 7 samt tilleggsvilkår
for tredjelands fiske skal avtales innen rammen av den blandede norsk-sovjetiske
fiskerikommisjon." I samsvar med Gråsoneavtala kan altså Den
blanda norsk-russiske fiskerikommisjonen vedta å endre
utkastpåbodet for kongekrabbe.
2. Kva er den folkerettslege
statusen til Gråsoneavtala?
Gråsoneavtala er ein bilateral, folkerettsleg
bindande avtale mellom Noreg og Russland. Avtala blei godkjend av
Stortinget 9. mars 1978. Avtala er tidsavgrensa, men har sidan 1978
blitt forlenga for eit år om gongen ved brevveksling mellom
Noreg og Russland, siste gong til 1. juli 2003.