EØS-komiteen vedtok 23. april 2004 å endre
vedlegg XIII (Transport) til EØS-avtala til å omfatte
europaparlaments- og rådsdirektiv (EF) nr. 2003/42
av 13. juni 2003 om rapportering av hendingar innan sivil luftfart.
Avgjerda inneheld ei innleiing og fire artiklar.
I innleiinga vert det vist til EØS-avtala, og særleg artikkel
98, som gjer det mogleg å endre vedlegga til avtala gjennom
avgjerd i EØS-komiteen.
Føremålet med direktivet er å leggje
tilhøva til rette for å få informasjon
om risiko for luftfartsulukker før slike ulukker og alvorlege
hendingar skjer. Det første steget i arbeidet for å få ned
ulukkesraten i luftfarten, var å gjennomføre undersøkingar
av ulukker og alvorlege hendingar som alt har skjedd, i medhald
av rådsdirektiv 94/54/EF av 21. november
1994 (undersøkingsdirektivet), om fastsetjing av grunnleggjande
prinsipp for undersøking av ulukker og alvorlege hendingar innan
sivil luftfart. Men det er få ulukker og alvorlege hendingar
som skjer, og undersøkinga av desse gjev avgrensa høve
til læring.
Rapporteringsdirektivet har som føremål å utfylle undersøkingsdirektivet
ved ein meir proaktiv tilnærmingsmåte. Direktivet
byggjer på røynsler som syner at det normalt ikkje
er éi einskild årsak til ei luftfartsulukke,
men ei rekkje årsaksfaktorar. Røynsler har synt at
rapporteringsviljen er god når det gjeld å melde
frå om tekniske manglar og andre tilhøve som ikkje
rapportøren sjølv er involvert i. Av frykt for
konsekvensane er flygarar, flygeleiarar og andre tilbakehaldne med å rapportere
om tilhøve der dei sjølve er innblanda. Dette
gjer det vanskeleg for luftfartsstyresmaktene å få inn
relevant informasjon i tide til å avdekkje veikskapar.
Direktivet byggjer på røynsler
frå havariundersøkingar som syner at menneskelege
faktorar, i ulik grad, er knytte til 80 pst. av ulukker og hendingar
innan sivil luftfart.
Skal rapporteringsviljen styrkjast, må frykta
for straff, inndraging av sertifikat, reaksjonar frå arbeidsgjevar
og uthenging i media reduserast eller fjernast gjennom rettslege
garantiar.
Direktivet legg grunnlaget for eit nytt system
for rapportering av luftfartshendingar som ikkje er å rekne som
alvorlege.
For å skape den naudsynte tilliten
til systemet blant rapportørane, er direktivet basert på ein
grunntanke om at dei innrapporterte opplysningane berre skal nyttast til
flytryggingsmessige føremål.
Det er ikkje venta at direktivet vil få administrative og økonomiske
konsekvensar av særleg omfang.
Gjennomføringa av direktivet i norsk
rett vil krevje endring i luftfartslova. Direktiv skal gjennomførast
i norsk rett i medhald av artikkel 7 bokstav b) i EØS-avtala.
Ettersom gjennomføringa i norsk rett
krev lovendring, vart avgjerda i EØS-komiteen teken med
atterhald for samtykke frå Stortinget, i samsvar med § 26 andre
leddet i Grunnlova.
Samferdselsdepartementet vil fremje ein eigen
odelstingsproposisjon med dei naudsynte lovendringane.
Utenrikskomiteen melder i brev av 27. oktober
2004 ingen merknader til foreløpig innstilling fra samferdselskomiteen.
Komiteen, medlemmene fra Arbeiderpartiet, Sigrun Eng, Bjørgulv Froyn, Oddbjørg Ausdal Starrfelt og Tor-Arne Strøm, fra Høyre, Hans Gjeisar Kjæstad, lederen Petter Løvik, Mathias Råheim og Åse Versland, fra Fremskrittspartiet, Thore A. Nistad og Kenneth Svendsen, fra Sosialistisk Venstreparti, Geir-Ketil Hansen og Heidi Sørensen, fra Kristelig Folkeparti, Odd Holten og Kari Økland, og fra Senterpartiet, Jorunn Ringstad, har ingen merknader, viser til proposisjonen og rår Stortinget til å gjøre slikt
vedtak:
Stortinget gjev samtykke til godkjenning av avgjerd i EØS-komiteen nr. 41/2004 av 23. april 2004 om innlemming i EØS-avtala av direktiv 2003/42/EF om rapportering av hendingar innan sivil luftfart.
Oslo, i samferdselskomiteen, den 28. oktober 2004
Petter Løvik
leder |
Hans Gjeisar Kjæstad
ordfører |