EØS-komiteen vedtok 26. oktober 2007 å endre vedlegg XI til EØS-avtala (Telekommunikasjonstenester) til òg å omfatte europaparlaments- og rådsforordning (EF) nr. 717/2007 av 27. juni 2007 om internasjonal gjesting i offentlege mobiltelefonnett i Fellesskapet og om endring av direktiv 2002/21/EF.

Føremålet med forordninga er å redusere dei høge prisane på internasjonal gjesting (roaming) i mobilnett i EU. Forordninga inneber ein prisreduksjon både på engros- og sluttbrukarnivået.

Internasjonal gjesting i mobilnett tyder at mobilnettilbydaren i ein stat ("tilbydaren av det vitja nettet") tilbyr bruk av mobiltenester til ein utanlandsk mobilnettilbydar ("tilbydaren av heimenettet"). Mobiltilbydaren i heimstaten kan då tilby ein abonnent å utføre og ta imot telefonsamtalar og andre mobiltenester (SMS, datatenester o.a.) i det vitjande mobilnettet.

Bakgrunnen for forordninga er at mobilbrukarar til no har opplevd urimeleg høge prisar på internasjonal gjesting i mobilnett. Det har òg vore ein stor prisvariasjon i dei ulike medlemsstatane. Verken engros- eller sluttbrukarprisane for gjesting i mobilnett innanfor EU-EØS-statane kan forsvarast ut ifrå dei underliggjande kostnadene for å tilby denne tenesta.

Høgstenivået på takstar mobilselskapa imellom (engrosprisar) og høgstenivået på takstar overfor mobilkundane (sluttbrukarprisar) skal setjast gradvis ned i tidsrommet 2007-2009.

Forordninga skal opphevast etter tre år, dvs. 30. juni 2010, men det er mogleg å lengje reguleringa dersom Kommisjonen presenterer eit nytt framlegg til regulering og Europaparlamentet og Rådet godkjenner dette.

Ettersom forordninga krev lovendring, vart avgjerda i EØS-komiteen teken med atterhald om samtykke frå Stortinget til godkjenning i medhald av § 26 andre leddet i Grunnlova.

I statsråd 12. oktober la Samferdselsdepartementet fram Ot.prp. nr. 3 (2007-2008) om lovendringar i ekomlova, der departementet gjer framlegg om å ta inn ei ny føresegn § 4-14 om internasjonal gjesting i mobilnett.

Den nye reguleringa vil innebere ein del nye oppgåver for Post- og teletilsynet og dei andre europeiske NRA-ane (regulatørane). Ein reknar likevel ikkje at dette vil auke ressursbruken i særleg grad, ettersom tilsynet alt etter det gjeldande regelverket har rutinar for innhenting av informasjon frå mobiltilbydarane. Post- og teletilsynet er brukarfinansiert, og eventuelle auka kostnader vil difor måtte finansierast av aktørane på marknaden.

Når endringa av EØS-avtala tek til å gjelde, er det ein føresetnad at nasjonale tilbydarar og sluttbrukarar m.a. får prisreduksjon i form av overgang til "eurotakst". Det er svært sannsynleg at både norske tilbydarar og norske sluttkundar vil tene på reguleringa. Samfunnsøkonomisk vil vinsten kunne verte stor.