Samferdselsdepartementet legg i proposisjonen fram forslag om delvis bompengefinansiering av Vossapakko i Hordaland.

Vossapakko omfattar prosjekta Øvre Granvin–Voss grense og Mønshaug–Palmafoss på rv 13, og omlegging av E16 utanom Voss sentrum. I tillegg inngår ombygging av kryss på E16 ved Stanghelle og miljømessig opprusting av eksisterande E16 i Voss sentrum.

Samferdselsdepartementet viser til at det er blitt arbeidd med ei Vossapakke gjennom mange år. Departementet legg no fram eit opplegg for fullfinansiering av Vossapakko i tråd med NTP 2010–2019 etter at det har vore stor kostnadsauke sidan saka blei lagt fram til lokalpolitisk behandling i 2004/2005.

Vossapakko er omtalt i St.meld. nr. 24 (2003–2004), St.prp. nr. 1 (2008–2009), St.prp. nr. 37 (2008–2009) og St.meld. nr. 16 (2008–2009) Nasjonal transportplan 2010–2019.

Den lokalpolitiske behandlinga er nærare omtala i kapittel 4 i proposisjonen.

Omtale av utbygginga

Det ligg føre godkjente reguleringsplanar for alle prosjekta i Vossapakko. Heile utbygginga er på stamvegnettet.

Rv 13 Voss grense–Øvre Granvin (Skjervet) i Granvin kommune

Eksisterande veg på strekninga har i dag svært dårleg standard, med smal og svingete veg, stor stigning, dårleg bereevne og manglande tilbod for gåande og syklande. Prosjektet har ei totallengde på 6,5 km, av dette til saman 3,5 km i tunnel. Eksisterande rv 13 vil bli frigjort til lokalveg/gang- og sykkelveg. Bygging av rasteplass inngår i prosjektet.

Samferdselsdepartementet tilrår at Vossapakko blir lagt fram slik den er vedteken lokalt med miljøtunnel ved Øvre Vassenden. Dersom det etter vidare planlegging vert lokal tilslutning til å erstatte miljøtunnelen ved Øvre Vassenden med ein lengre tunnel som og sikrar mot ras øst for Øvre Vassenden, må dette behandlast som ei eiga sak. Samferdselsdepartementet vil komme tilbake til Stortinget med dette.

Ved Øvre Vassenden i Granvin er det lagt inn ein miljøtunnel på om lag 0,4 km i den godkjente reguleringsplanen.

Rv 13 Mønshaug–Palmafoss i Voss kommune

Eksisterande rv 13 mellom Mønshaug og Palmafoss i Voss kommune går gjennom landbruksområde med spreidd busetnad.

E16 utanom Voss sentrum (Voss kommune)

Prosjektet omfattar bygging av 3,4 km ny veg nord for Voss sentrum, av dette ein om lag 2,4 km lang tunnel. Prosjektet vil avlaste Voss sentrum for gjennomgåande trafikk, der særleg tunge køyrety og nattleg trafikk fører til miljøulemper. Det er sett av midlar til miljømessig opprusting av eksisterande E16 i Voss sentrum.

Tiltak på E16 i Vaksdal kommune

Det er sett av midlar til ombygging av kryss ved Stanghelle på E16 i Vaksdal.

Framdrift for utbygginga

Det blir lagt opp til anleggsstart på dei to prosjekta på rv 13 hausten 2009 og på E16 utanom Voss sentrum i løpet av 2010. Førebuingane til anleggsstart er kome lengst på rv 13-prosjekta. På E16 skal det gjennomførast prosjektering og eit omfattande grunnerverv. Det er venta at utbygginga skal stå ferdig i 2013.

Kostnadsoverslag, trafikkgrunnlag mv.

Det er gjennomført utvida ekstern kvalitetssikring av Vossapakko.

Samferdselsdepartementet legger til grunn ei styringsramme på 1 130 mill. 2009-kroner og kostnadsramme på 1 220 mill. 2009-kroner. Kostnadene for miljøtunnelen ved Øvre Vassenden i Granvin er framleis med i overslaget.

Samla trafikkgrunnlag (betalande ÅDT) er sett til 4 990 køyrety i basisåret 2007. Statens vegvesen tilrår vidare at det i finansieringsplanen blir lagt til grunn ein årleg vekst på 1 pst Samferdselsdepartementet er samd i dette.

Berekna netto nytte (NN) for alle dei tre store prosjekta samla og med delvis bompengefinansiering er - 580 mill. kroner. Netto nytte over totale kostnader (NN/K) er berekna til - 0,5.

Finansieringsopplegg

Finansieringa av Vossapakko er basert på bompengar og statlege midlar. Bomstasjonsopplegget omfattar ein bomstasjon på rv 13 nær kommunegrensa mellom Granvin og Voss og ein bomstasjon på E16 nær kommunegrensa mellom Voss og Vaksdal.

Det er førebels rekna ut at taksten vil bli om lag 38 kroner for lette køyrety og 75 kroner for tunge køyrety. Det er ein føresetnad at takstane blir justerte i samsvar med prisutviklinga.

Bomstasjonane er basert på Autopass-systemet.

For bomstasjonen på E16 nær kommunegrensa mellom Voss og Vaksdal er det relativt stor avstand mellom tyngdepunktet for utbygginga og bomstasjonen. Det er likevel relativt få sidevegar og lite busetnad mellom denne bomstasjonen og Voss. Det er dessutan lagt opp til kryssombygging på E16 i Vaksdal kommune. Det er lokalpolitisk tilslutning til bompengeopplegget. Samferdselsdepartementet meiner at opplegget kan aksepterast.

Det er rekna med at bompengeinnkrevjinga vil gi eit samla finansieringsbidrag på 910 mill. kroner, fordelt med 600 mill. kroner til å dekke delar av investeringskostnadene og 310 mill. kroner til å dekke renter. I tillegg kjem 90 mill. kroner til å dekke innkrevjingskostnader og kostnader til drift av bompengeselskapet. Finansieringskostnadene og innkrevjings- og driftskostnadene basert på føresetnadene i proposisjonen utgjer høvesvis 31 pst. og 9 pst. av brutto bompengeinntekter på 1 000 mill. kroner.

Andre føresetnader for finansieringsplanen går elles fram av kapittel 5 i proposisjonen.

Finansieringsplanen går fram av tabell 5.1 i proposisjonen.

Tabell 5.1 Forslag til finansieringsplan

* Statleg refusjon til bompengeselskapet.

Det er ein føresetnad at bompengeselskapet inngår bindande avtale om ei lågare lånerente enn 6,5 pst. for ein periode på 10–15 år. Samferdselsdepartementet føreset at dokumentasjon for avtale om rentenivå blir sendt Vegdirektoratet før anleggsstart.

Etter at Stortinget har gjort vedtak om delvis bompengefinansiering av Vossapakko, vil det bli inngått avtale mellom Vegdirektoratet og bompengeselskapet i tråd med gjeldande standardavtale og dei føresetnadene som er lagt til grunn i proposisjonen.