Samferdselsdepartementet legg i proposisjonen fram
forslag om utbygging og finansiering av Samferdselspakke for Kristiansandsregionen fase 1.
Samferdselsdepartementet er positiv til at lokale styresmakter
vil vidareføre satsinga på samferdselstiltak i Kristiansandsregionen
gjennom ei ny Samferdselspakke fase 1. I tillegg til at ny rv 456 vil
betre tilkomsten til bydelen Vågsbygd vil tiltaka innafor mjuk pakke
føre til ei stor betring i framkomme og tryggleik for gåande og syklande
trafikantar gjennom vidareutviking av samanhengande hovudnett for
gang- og sykkeltrafikken i regionen. Kollektivtilbodet blir betra gjennom
vidare utbygging av kollektivnettet, og det er også prioritert midlar
til trafikktryggleikstiltak. Tiltaka vil gi eit betre tilbod for
miljøvennlege transportformer. Pakka vil bidra til at Kristiansand
får eit transportsystem der ein lettare kan veksle mellom å vere
bilist, kollektivtrafikant og syklist.
For å kome i gang så snart som råd med prosjekt og
tiltak som er kome lengst i planlegginga, er det lokal semje om
å leggje fram samferdselspakka i to fasar. Den lokalpolitiske behandlinga
er nærare omtala i pkt. 3 i proposisjonen.
I Samferdselspakka, fase 1, inngår prosjektet rv 456
Kolsdalen–Lumberkrysset (Vågsbygdveien) i Kristiansand samt ei rekke
tiltak innafor dei ulike programområda i kommunane Kristiansand,
Søgne, Songdalen og Vennesla i Vest-Agder og Birkenes og Lillesand
i Aust-Agder. Midlane til programområda vil i stor grad bli nytta
til bygging av samanhengande gang- og sykkelvegnett i Kristiansandsregionen.
I tillegg inngår midlar til planlegging av prosjekt og tiltak med
sikte på vidareføring av samferdselspakka (fase 2).
Prosjekt og tiltak er kostnadsrekna til om lag 1 800
mill. 2009-kroner, jf. tabell 2.1 i proposisjonen.
Tabell 2.1 Aktuelle prosjekt og tiltak innafor Samferdselspakke
for Kristiansandsregionen fase 1
| Mill.
2009-kroner |
Rv 456 Kolsdalen–Lumberkrysset
| 1 080 |
Mjuk pakke | 420 |
Tiltak langs rv
41/451 Timenes–Kjevik | 120 |
Bomstasjonar | 20 |
Planlegging og førebuing av
fase 2 | 160 |
Sum | 1 800 |
Rundt ein tredel av busetnaden i Kristiansand kommune
er i Vågsbygd, og bydelen har også tunge næringsområde. Rv 456 har
i dag to felt, kryss i plan og fleire direkte avkøyrslar. Det er vesentlege
problem med kø i rushtida. I perioden 1999–2009 er det registrert
21 ulykker med ein drepen, to hardt skadde og 32 lettare skadde.
Prosjektet omfattar bygging av 2,2 km ny firefelts
veg frå kryss med E39 i Kolsdalen, om lag 1,5 km vest for Kristiansand
sentrum, til Lumberkrysset, sentralt i bydelen Vågsbygd.
Kristiansand kommune vedtok reguleringsplanane
for prosjektet i mai og i september 2007 og ei mindre reguleringsendring
13. mai 2009. Samferdselsdepartementet legg til grunn ei styringsramme
på 1 080 mill. 2009-kroner og ei kostnadsramme på 1 220 mill. 2009-kroner.
Netto nytte (NN) er rekna til om lag 500 mill. kroner. Netto nytte
pr. investert krone (NN/K) er rekna til om lag 0,3.
Det er planlagt å starte anleggsarbeida på rv
456 Kolsdalen–Lumberkrysset hausten 2010, med fullføring hausten
2013.
Det er føresett om lag 420 mill. kroner til
tiltak innafor dei ulike programområda. Hovudsatsinga innafor mjuk
pakke er gang- og sykkelvegar, kollektivtrafikktiltak, trafikktryggleikstiltak, miljøtiltak
og mindre utbetringar. I tillegg er det føresett midlar til planlegging
og grunnerverv.
Totalt er det foreslått å bygge om lag 25 km
nye gang- og sykkelvegar.
Det er lagt opp til å setje av midlar til tiltak
i kollektivnettet både i Kvadraturen og i Kristiansandsregionen
generelt.
Fv 303 mellom Kristiansand og Songdalen er også
føreslått utbetra.
Mjuk pakke vil gi betre framkome og tryggleik for
gåande, syklande og kollektivtrafikantar og vil gjennom dette leggje
betre til rette for å erstatta bilturar med miljøvenleg transport
i Kristiansandsregionen. I underkant av halvparten av ramma på 420
mill. kroner er planlagt investert i Kristiansand kommune, medan
det er foreslått investeringar i storleiksorden 30–60 mill. kroner i
kvar av dei fem andre kommunane.
Det føresette finansieringsbidraget i eksisterande
bompengeordning var oppnådd 1. juli 2008. Gjennom behandlinga av
St.prp. nr. 45 (2007–2008) og St.prp. nr. 72 (2008–2009) har Stortinget
vedteke å vidareføre eksisterande innkrevjingsordning for å unngå
opphald i innkrevjinga til den nye samferdselspakka er behandla.
Dette er venta å gje 6–7 mill. kroner i inntekt pr. månad etter
at driftskostnader er trekt frå, fram til ny ordning trer i kraft.
Det er lagt opp til å nytte om lag 80 mill. kroner av desse midla til
tiltak innafor mjuk pakke innan utgangen av 2009.
Det er behov for å ruste opp rv 41/rv 451 mellom Timenes
og Kjevik flyplass. Det er derfor sett av om lag 120 mill. kroner
til tiltak langs denne strekninga.
I fase 2 legg lokale styresmakter opp til bygging av
ny E39 mellom Gartnerløkka og Søgne samt ytterlegare satsing på
tiltak innafor dei ulike programområda. Det vil også bli vurdert
å gjennomføre tiltak for å redusere veksten i biltrafikken. Før
fase 2 kan leggjast fram, skal det gjennomførast ei konseptvalutgreiing
(KVU) som grunnlag for kvalitetssikring i tidleg planfase (KS1).
Departementet legg til grunn at bruk av midlar
til vidare planlegging og førebuing av ei eventuell Samferdselspakke
for Kristiansandsregionen fase 2 blir utsett til regjeringa har
tatt stilling til saka gjennom behandling av KS1.
Det er sett av om lag 160 mill. kroner til planlegging
og førebuing av ein eventuell fase 2 av samferdselspakka.
Bompengeopplegget for samferdselspakka byggjer
i stor grad på dagens ordning, med vidareføring av innkrevjinga
i eksisterande fem bomstasjonar. Det er rekna med 5 pst. eingongsbortfall
av trafikk ved overgangen frå eksisterande til ny bompengeordning
grunna bortfall av periodeabonnement og at takstane blir dobla.
Det er gjennomført ekstern kvalitetssikring
av trafikkgrunnlaget som ligg til grunn for finansieringa av samferdselspakka.
I dei lokale vedtaka er det lagt til grunn at
samferdselspakka skal finansierast med statlege midlar innafor ramma
til øvrige riksvegar og bompengar. Som følgje av forvaltningsreforma er
dei aktuelle riksvegstrekningane i regionen i hovudsak føresett
omklassifiserte til fylkesvegar frå 2010. Det er derfor lagt til
grunn at føresette statlege midlar til pakka blir dekka av Aust-
og Vest-Agder fylkeskommunar.
87 pst. av investeringskostnadene er føresett dekka
med bompengar. Finansieringsplanen er vist i tabell 5.1 i proposisjonen.
Det er lagt til grunn at omfanget av utbygginga blir
tilpassa den økonomiske ramma for Samferdselspakke fase 1. All kostnadsauke
må følgjeleg løysast innafor dei økonomiske rammene for pakka.
Tabell 5.1 Forslag til finansieringsplan
Mill. 2009-kroner
| 2006–2009 | 2010–2013 | 2014–2017 | Sum |
Fylkeskommunale
midlar Vest-Agder | 0 | 122 | 100 | 222 |
Fylkeskommunale
midlar Aust-Agder | 0 | 10 | 8 | 18 |
Bompengar | 80 | 1 280 | 200 | 1 560 |
Sum | 80 | 1 412 | 308 | 1 800 |
Bompengeopplegget og basisføresetnader er nærare
omtala i pkt. 5 i proposisjonen.
Finansieringsopplegget for samferdselspakka byggjer
i stor grad på vidareføring av eksisterande innkrevjingsopplegg
i Kristiansand sentrum. Dette omfattar fem automatiske bomstasjonar
med einvegs innkrevjing på tilfartsvegane til sentrum: E18, E39,
rv 9, fv 1 Sødalsveien, samt på kommunal veg Tretjønnveien. Til
saman utgjer desse ein tett ring rundt sentrum.
Regjeringa har merka seg at det er lagt opp
til 30–50 pst. rabatt i fase 1. Hovudregelen for nye bompengeringar
i by skal vere flat rabatt, avgrensa til brikkebrukarar. Denne regelen
skal nyttast ved framtidige endringar av rabattsystemet i Kristiansand.
Med basisføresetnadene er innkrevjingsperioden rekna
til om lag 8 år. Dette inneber ein auke på om lag eitt år i høve
til det som er lagt til grunn i dei lokalpolitiske vedtaka. Bompengane
skal dekke renteutgifter på om lag 220 mill. kroner og innkrevjingskostnader
på 80 mill. kroner, i tillegg til utbyggingskostnader på 1 560 mill. kroner.
Samla bompengeinntekter er følgjeleg venta å utgjere om lag 1 860
mill. kroner.
Det er inngått ein avtale mellom Samferdselsdepartementet
og Kristiansandsregionen ved Vest-Agder fylkeskommune og Kristiansand
kommune om belønningstilskott til betre kollektivtransport og mindre
bilbruk for perioden 2009–2012. For slike fleirårlege avtaler gjeld
atterhald om Stortingets årlege løyvingar. Det er eit mål at biltrafikken
gjennom bomringen skal reduserast med 5 pst. i avtaleperioden. Den
samla biltrafikken i området skal ikkje auke frå og med 2010, og
helst reduserast.
Kristiansand kommune og Vest-Agder fylkeskommune
har fatta vedtak om garanti for eit bompengelån på tilsamen 350
mill. kroner, fordelt med 50 pst. på kvar.
Med bakgrunn i NTP 2010–2019 og avtalen med lokale
styresmakter om belønningstilskott legg Samferdselsdepartementet
særskilt vekt på dei lokale vedtaka om å skjerma mjuk pakke ved eventuell
kostnadsauke på veganlegga. Det er såleis ein føresetnad at mjuk
pakke blir minst så stor som det er lagt til grunn i denne proposisjonen.
Etter at Stortinget har gjort vedtak om finansierings-
og utbyggingsplan for Samferdselspakke for Kristiansandsregionen
fase 1 vil det bli inngått avtale mellom Vegdirektoratet og bompengeselskapet
i tråd med gjeldande standardavtale og dei føresetnadene som er
lagt til grunn i proposisjonen.