Nærings- og handelsdepartementet legg i proposisjonen
fram forslag til endringar i lov 19. juni 2009 nr. 101 om erverv
og utvinning av mineralressurser (mineralloven). Forslaget er ei
teknisk endring som er nødvendig for at Statens innkrevingssentral
(SI) skal ha heimel til å foreta tvungen innkrevjing av tvangsmulkt
og lovbrotsgebyr (overtredelsesgebyr) etter mineralloven §§ 66 og
67, til fordel for staten.
Mineralloven tok til å gjelde 1. januar 2010
saman med forskrift til lova.
Etter mineralloven § 66 første ledd kan Direktoratet
for mineralforvaltning med Bergmesteren for Svalbard (Direktoratet
for mineralforvaltning) treffe vedtak om tvangsmulkt for å sikre
at føresegnene i lova eller vedtak i medhald av lova vert gjennomført.
Mineralloven § 67 gir Direktoratet for mineralforvaltning heimel
til å pålegge den som har brote føresegner gitt i eller i medhald
av lova å betale eit pengebeløp til statskassa (lovbrotsgebyr).
I forskrift 23. desember 2009 nr. 1842 til mineralloven
er det gitt føresegner om utmåling av tvangsmulkt og lovbrotsgebyr, saksbehandlingsreg-lar,
klagerett, ettergiving av pålagt tvangsmulkt og lovbrotsgebyr og
om inndriving av pålagt tvangsmulkt og lovbrotsgebyr.
Etter at mineralloven og forskrifta tok til
å gjelde har Direktoratet for mineralforvaltning sett nærare på
korleis ein mest mogleg effektivt kan følgje opp føresegnene, når
det gjeld den praktiske oppfølginga etter at det er konstatert lovbrot
og fatta avgjerde om tvangsmulkt eller lovbrotsgebyr. I samråd med
departementet har direktoratet kome fram til at den mest effektive måten
å gjere dette på vil vere at SI står for sjølve innkrevjinga, både
når det gjeld den frivillige og den tvungne inndrivinga av tvangsmulkt
og lovbrotsgebyr. Det er tatt inn føresegner i forskrift til minerallova
§ 6-6 som gir SI heimel til å stå for den frivillige inndrivinga
av tvangsmulkt og lovbrotsgebyr, jf. forskrift 23. juni 2010 nr.
963 om endring i forskrift til minerallova. For at SI også skal
kunne stå for den tvungne inndrivinga av tvangsmulkt og lovbrotsgebyr,
er dei avhengige av eksplisitt lovheimel i minerallova.
Forslaget inneber ikkje at Direktoratet for
mineralforvaltning gir frå seg myndigheit og overlet til SI å ta
avgjerd om tvangsmulkt eller lovbrotsgebyr skal påleggjast. Det
vil framleis vere Direktoratet for mineralforvaltning som tek avgjerd om
dette. Forskjellen blir at direktoratet, etter at det er fatta vedtak
om å påleggje tvangsmulkt eller lovbrotsgebyr, sender over kravet
til SI som følgjer opp saka og tek ansvaret for at tvangsmulkta
eller lovbrotsgebyret vert innbetalt til og tilfell staten.
Endringsforslaget vil ikkje få vesentlege administrative
og økonomiske konsekvensar. Pålagt tvangsmulkt og lovbrotsgebyr
tilkjem statskassa. Ved at SI får ansvaret for inndrivinga vil ressursar
i Direktoratet for mineralforvaltning bli frigjorde. Direktoratet
for mineralforvaltning har i dag ikkje kostnader i samband med SI
si hjelp med frivillig innkrevjing av tvangsmulkt og lovbrotsgebyr,
med unntak for namsgebyr der dette er nødvendig. Sjølv om Direktoratet
for mineralforvaltning må betale SI for tenesta dei tilbyr ved tvangsinnkrevjing,
vil ressursane direktoratet får frigjort veie opp for desse kostnadene.
Det er også grunn til å tru at tvangsmulkta og lovbrotsgebyret vert
gjort opp meir effektivt med SI som innkrevjar enn om direktoratet
gjer det.