Folketrygdfondet er eit statleg særlovselskap som
har som oppgåve å forvalta Statens pensjonsfond Norge (SPN) og Statens
obligasjonsfond på vegner av Finansdepartementet. Verksemda i dei
to fonda er regulert gjennom overordna forvaltingsmandat som er
fastsette av departementet, medan styret i Folketrygdfondet er ansvarleg
for den operative forvaltninga. Målet for Folketrygdfondet si forvaltning
av SPN er høgast mogleg avkastning målt i norske kroner. Den finansielle
målsetjinga for Statens obligasjonsfond er høgast mogleg avkastning
over tid innanfor det regelverket som gjeld for forvaltninga. Samstundes
skal det takast omsyn til meininga med fondet om å medverka til
auka likviditet på, og betre kapitaltilgang til, kredittobligasjonsmarknaden
i Noreg. Finansdepartementet følgjer opp Folketrygdfondet si forvaltning
av dei to fonda gjennom kvartalsvise møte.
Folketrygdfondet si forvaltning av SPN er omtala
i Meld. St. 15 (2010–2011) Forvaltninga av Statens pensjonsfond
i 2010, der departementet også gjer greie for sine vurderingar av
dei oppnådde resultata i forvaltninga. Folketrygdfondet si forvaltning
av Statens obligasjonsfond er omtala i avsnitt 8.4 i denne meldinga.
Folketrygdfondet skal for 2010 utarbeida ein årsrapport
og halvårsrapport om forvaltninga av SPN, i tillegg til ein årsrapport
om forvaltninga av Statens obligasjonsfond. Årsrapportane frå Folketrygdfondet
følgde som utrykt vedlegg til Meld. St. 15 (2010–2011).
I samsvar med § 13 i lov om Folketrygdfondet har
departementet, etter ein offentleg konkurranse der tilbydaren med
det totalt sett økonomisk mest fordelaktige tilbodet fekk tilslaget,
peika ut ein ekstern revisor til å revidera rekneskapen for Folketrygdfondet,
inkludert forvaltinga av SPN. Det er òg inngått ein avtale med
revisor om eit attestasjonsoppdrag for å stadfesta at forvaltinga
av SPN er i samsvar med forskrift og retningsliner som er fastsette
av departementet. Riksrevisjonen skal følgja opp og føra tilsyn
med Finansdepartementet som forvaltar av Statens pensjonsfond og
eigar av Folketrygdfondet, jf. riksrevisjonsloven § 9.
Departementet har i ei eiga forskrift fastsett nærare
reglar om korleis rekneskapen for Folketrygdfondet, inkludert SPN,
skal førast, jf. forskrift 10. november 2008 nr. 1264 om årsregnskap
m.m. for Folketrygdfondet inkludert Statens pensjonsfond Noreg.
Etter lov om Folketrygdfondet § 12 skal årsrekneskapen og årsmeldinga
til Folketrygdfondet godkjennast av departementet og leggjast fram
for Stortinget. Finansdepartementet godkjende årsrekneskapen og
årsmeldinga 24. mars 2011.
Ein viser til meldinga for nærare omtale av
SPN og Statens obligasjonsfond, samt til omtale av leiing og administrasjon
i Folketrygdfondet.
Komiteen viser til
de respektive partiers merknader i innstillingen fra finanskomiteen Innst.
436 S (2010–2011) jf. Meld. St. 15 (2010–2011) Forvaltningen av
Statens pensjonsfond i 2010, og tar redegjørelsen til orientering.