Fiskeri- og kystdepartementet legg med dette fram
ei melding til Stortinget om dei fiskeriavtalane Noreg har med andre
land. Ei slik melding skal leggjast fram årleg. Meldinga vart første gong
lagt fram i 1995. Vi viser i den samanheng til St.meld. nr. 49 (1994–1995)
om dei årlege fiskeriavtalane Noreg inngår med andre land, der Fiskeridepartementet
la vekt på å gje ei omtale av det rammeverket som vart inngått i
tilknyting til utvidinga av den norske økonomiske sona på 1970-talet,
og som ligg til grunn for dei årlege kvoteforhandlingane. Desse
avtalane er ikkje særskilt omtalte i denne meldinga.
Meld. St. 40 (2012–2013) omtalar kvoteavtalane for
2013, og norsk deltaking i fleirsidig fiskerisamarbeid og i regionale
forvaltningsorganisasjonar. Meldinga gjer vidare greie for bestandsutrekning,
rådgjeving, tilstandsrapportar og langsiktige forvaltningsplanar
for dei viktigaste bestandane som Noreg deler med andre land. Meldinga
omtalar òg dei kontrolltiltaka som er sette i verk for å kontrollere
norsk og utanlandsk fiske på avtalte kvotar, i tillegg til kontrollsamarbeidet
med andre land og tiltak mot ulovleg, urapportert og uregulert fiske.
Til sist gjev meldinga ei oversikt over i kva grad norske og utanlandske
fiskarar utnytta kvotane sine i 2011 og 2012, og kva slags fartøygrupper som
fiskar på dei kvotane Noreg har i sonene til andre land.
Kvoteavtalane for 2013 finst på Fiskeri- og
kystdepartementet sine heimesider: http://www.regjeringa.no/fkd
I fiskeriforhandlingane med Russland om ein kvoteavtale
for 2013 har partane bestemt ein totalkvote for nordaust-arktisk
torsk på 1 000 000 tonn, som er ein auke frå 2012. I tillegg vart
det fastsett ein kvote på kysttorsk på 21 000 tonn. Partane justerte
i 2009 den etablerte forvaltningsstrategien ved at det er lagt inn
ein mekanisme som skal sikre at kvotefastsetjinga òg tek høgde for
periodar med sterk vekst og oppskriving av bestanden. Det er sett
av ein torskekvote til tredjeland på 139 520 tonn. Med overføring av
ein del av den russiske kvoten til Noreg, er den samla norske kvoten
av torsk nord for 62°N på 418 740 tonn. Som følgje av tilbakeføring
av unytta tredjelandskvote på 25 600 tonn er den samla norske kvoten
av torsk nord for 62°N på 465 340 tonn, inklusive kysttorsk. Forskingskvoten
på 7 000 tonn er ikkje medrekna. I tillegg står det att 2 000 tonn
torsk frå tredjelandskvoten som ikkje er fordelt.
Totalkvoten for hyse er fastsett til 200 000
tonn for 2013. Dette er 118 000 tonn lågare enn i fjor, og 38 000
tonn lågare enn forvaltningsstrategien tilseier. Kvoten er redusert
for å bremse vidare nedgang i bestanden. Med overføring av ein del av
den russiske kvoten til Noreg, er den samla norske kvoten av hyse
nord for 62°N på 94 154 tonn. Som følgje av tilbakeføring av unytta
tredjelandskvote på 3 084 tonn, er den samla norske kvoten av hyse
nord for 62°N på 97 238 tonn. Forskingskvoten på 4 000 tonn er ikkje
medrekna.
Ei hovudsak for samarbeidet mellom Noreg og Russland
om forvaltning og kontroll i Barentshavet i 2012 har, som i 2011,
vore arbeidet for ein styrka kontroll med uttak og omlasting av fisk
i Barentshavet. I samband med forhandlingane om ein kvoteavtale
for 2013 vart partane einige om å vidareføre arbeidet med å bekjempe det
ulovlege fisket i Barentshavet og Norskehavet, og vidareføre og
implementere ei rekkje av dei tiltaka partane tidlegare har vore
einige om. I 2009 avtalte partane felles maskevidde, og i 2010 kom
partane fram til felles minstemål og prosedyrar og kriterium for
stenging og opning av fiskefelt. Torskebestanden i nord er i svært god
forfatning, og for 2011 og 2012 vart det ikkje registrert nokon
fangst utover fastsette kvotar i Barentshavet. Partane vart samde
om at arbeidet med spørsmål knytt til utkast av fisk og arbeidet
med å lage retningslinjer for å gjennomføre inspeksjon av fiskefartøy
i Barentshavet og Norskehavet skal vidareførast i arbeidsgrupper.
I forhandlingane om ein kvoteavtale mellom Noreg
og EU for 2013 vart kvoten på torsk i Nordsjøen sett til 26 475
tonn. Kvoten må sjåast i samanheng med arbeidet for å betre beskatningsmønsteret
og redusere det reelle uttaket av torsk. I tråd med forvaltningsplanane
er totalkvoten for hyse auka til 45 041 tonn, medan seikvoten er
auka til 91 220 tonn. Nordsjøsildbestanden er i god forfatning.
Totalkvoten vart sett på 478 000 tonn, som inneber ein auke på 18
pst. frå 2012. Noreg har for 2013 òg inngått kvoteavtalar med EU
om fisket i Skagerrak/Kattegat og om svensk fiske i den norske delen
av Nordsjøen.
Noreg har vidare inngått ein tosidig kvoteavtale for
2013 med Grønland. Det er for 2013 òg utveksla kvotar med Island
i tråd med «Smottholavtalen» og den tilhøyrande tosidige avtalen,
òg trepartsavtalen er vidareført mellom Noreg, Island og Grønland
om regulering av lodde i området mellom Island, Grønland og Jan
Mayen. På same måte som i fjor vart det ikkje inngått ein bilateral
avtale med Færøyane for 2013 grunna usemje om makrellspørsmålet.
Det vart òg i 2012 gjennomført fempartsforhandlingar
om norsk vårgytande sild mellom Noreg, Island, Færøyane, EU og Russland.
Færøyane ønskte ein større del av kvoten for 2013 og dei andre partane
ville ikkje redusere sin del av totalkvoten til fordel for Færøyane.
Difor klarte ikkje partane å bli samde om ein ny fempartsavtale.
Det vart i staden inngått ein firepartsavtale, utan Færøyane, for
2013. Det vart òg underteikna ein kyststatsavtale for kolmule for
2013.
Partane vart heller ikkje i 2012 einige om ein makrellavtale
for 2013. Noreg og EU har ein bilateral avtale og har halde fram
forhandlingane om ein ny kyststatsavtale som inkluderer Færøyane
og Island, med Russland som observatør.
Partane i NEAFC (Den nordaustatlantiske fiskerikommisjonen)
er einige om reguleringstiltak for fiske av uer i Irmingerhavet
og Norskehavet i 2013.
Noreg har òg i 2012 delteke i ulike møte i globale
og regionale fiskeriforvaltningsorganisasjonar som CCAMLR (Konvensjonen
for bevaring av levande marine ressursar i Antarktis), ICCAT (Den
internasjonale konvensjonen for bevaring av atlantisk tunfisk) og
SEAFO (Den søraustatlantiske fiskeriorganisasjon).
Noreg har òg i 2012 delteke i ulike møte i både IWC
(Den internasjonale kvalfangstkommisjonen), og NAMMCO (Den nordatlantiske
sjøpattedyrkommisjonen).
Noreg har i ei årrekkje hatt særskilte kontrollavtalar
med dei viktigaste samarbeidspartane i fiskerisektoren, mellom anna
med Russland og EU-landa. Den siste avtalen vart inngått med Spania
i januar i år. Dermed har Noreg på plass avtalar med alle land som
har interesser i norske havområde.
Norske styresmakter har dei seinare åra innført ei
rekkje tiltak for å hindre ulovleg, urapportert og uregulert fiske.
Eit sentralt tiltak har vore den såkalla «svartelistinga» av fartøy
som har drive uønskt aktivitet i område utanfor norsk jurisdiksjon.
Fartøy som har delteke i ulovleg, urapportert og uregulert fiske
i internasjonalt farvatn, vert nekta lisens i Noreg si økonomiske
sone. Ein kan vidare nekte desse fartøya å føre norsk flagg under
visse vilkår, og vidare nekte dei å lande fangst i norske hamner.
Dei norske fartøya har nytta kvoten på fellesbestandane
torsk, hyse, blåkveite og lodde nord om 62ºN godt i 2011 og 2012.
Med unntak av lodde i 2011 og reker i 2012 nytta Noreg lite av sonetilgangen
i russisk økonomiske sone i 2011 og 2012.
I Nordsjøen vart heile den norske kvoten av fellesbestanden
sild hausta i 2011 og 2012. Seikvoten vart godt utnytta i 2011 medan
det stod igjen 18 pst. av kvoten i 2012. Torskekvoten vart nytta
godt begge åra.
I EU sitt farvatn vart den norske kolmulekvoten nytta
godt begge åra. Norske linefartøy fiska store delar av botnfiskkvotane
av blålange, lange og brosme både i 2011 og 2012. Kvotane på sild, tobis
og brisling vart òg godt nytta.
Det norske fisket i Skagerrak var i hovudsak konsentrert
om reker 2011 og 2012.
På grunn av usemje i makrellforvaltninga vart det
ikkje inngått bilateral avtale mellom Noreg og Færøyane i 2011 og
2012. Difor har norske fartøy ikkje fiska i færøyske farvatn i 2011
og 2012.
Noreg utnytta botnfiskkvotane ved Island godt
i både 2011 og 2012.
I 2011 og 2012 fiska Noreg kvoten på norsk vårgytande
sild i NØS, i internasjonalt farvatn og ved Jan Mayen. I 2012 vart
det òg fiska 655 tonn sild til agn i færøysk sone. I 2011 fiska
Noreg heile 47 314 tonn sild i internasjonalt farvatn, mot 4 315
tonn i 2012.
I loddefisket ved Island, Grønland og Jan Mayen sesongen
2011/2012 starta loddefisket i grønlandsk sone i juli 2011, for
så å halde fram i islandsk sone vinteren 2012. Kvoten vart godt utnytta.
Sesongen 2012/2013 vart det ikkje grunnlag for å opne for eit sommarfiske.
Dei norsk fartøya fiska i januar og februar 2013, og kvoten vart
òg her godt utnytta.
I 2011 og 2012 fiska norske fartøy kolmule i
EU-sona, i internasjonalt farvatn og i NØS. Noreg kan overføre 10
pst. av den norske kyststatsdel inkludert ei overføring på 0,5 pst.
frå EU.
I 2011 og 2012 vart kyststatane ikkje einige
om forvaltning av makrell. Noreg og EU vart difor einige om ein
bilateral avtale om forvaltning av makrell desse åra. Frå og med
2011 er det innført kvotefleksibilitet over årsskiftet i fisket
etter makrell.
Noreg utnytta torskekvoten i NAFO (Den nordvestatlantiske
fiskeriorganisasjonen) godt både i 2011 og 2012.
Når det gjeld forvaltninga av norsk vårgytande sild
vart kyststatane i 2008 einige om å innføre kvotefleksibilitet over
årsskiftet frå og med 2008. Det vart opna for å føre over inntil
10 pst. av ubrukt kvote til neste år. Det vart òg gjeve høve til
å forskottere inntil 10 pst. på neste års kvote. Alt fiske utover
kvote skal trekkjast frå kvoten neste år. Færøyane og Noreg var
dei einaste landa som i 2011 og 2012 fiska på forskot på 2012- og
2013-kvoten. Noreg fiska 25 624 tonn på forskot i 2011 og 19 437
tonn på forskot i 2012. EU, Island og Russland overførte unytta
kvantum til 2012 og 2013.
Russland utnytta 64 pst. av torskekvoten i norsk økonomisk
sone (NØS) i 2011, i 2012 utnytta dei 72 pst. Russland fiska 88
pst. av hysekvoten sin i NØS i 2011, medan dei i 2012 hadde ei utnytting
på 90 pst. Dei fiska 115 124 tonn og 103 412 tonn norsk vårgytande
sild i område under norsk jurisdiksjon i 2011 og 2012.
Hovudtyngda av EU sitt fiske i Nordsjøen og
i Skagerrak skjer på botnfiskartar (torsk, hyse, sei o.a.), sild,
makrell, kviting, raudspette og tobis. Ifølgje offisiell fangststatistikk
har EU i dei seinare åra hatt relativt god utnytting av torske-
og seikvotane sine i Nordsjøen. Utnyttinga av dei fastsette kvotane
i Skagerrak har òg vore gjennomgåande høg for EU.
Grunna usemje om makrell vart det ikkje inngått kvoteavtalar
mellom Færøyane og Noreg for 2011 og 2012. Færøyane fekk like fullt
tilgjenge til å fiske kolmule og sild gjennom høvesvis fempartsavtalen
og kolmuleavtalen. Færøyske fartøy fiska 18 pst. av sildekvoten
nord om 62°N i 2012, medan dei i 2011 fiska 50 pst. av sildekvoten
nord om 62°N.
Grønland utnytta torskekvotane godt i 2011 og 2012.
Grønlandske fartøy fiska 440 tonn sei i 2011, og 680 tonn sei i
2012.
Island fiska 99 pst. av torskekvoten i NØS nord om
62°N i 2011. I 2012 utnytta Island 100 pst. av denne kvoten. Islandske
fartøy fiska 38 pst. av sildekvoten nord om 62°N i 2011, medan dei
ikkje fiska av sildekvoten nord om 62°N i 2012. Island har dei siste
åra fiska ein større del av silda i si eiga sone.
I hovudsak utnyttar Sverige dei bilaterale kvotane
sine godt i norsk del av Nordsjøen. Fisket deira er i stor grad
retta mot kvotane av torsk, sei, makrell, sild og reker.
Det er tre overordna mål som ligg til grunn
for Noreg sin medverknad i dei ulike forhandlingsprosessar og internasjonale
ressursforvaltningsfora:
Å fremje norske prinsipp
for forvaltning av levande marine resursar, i første rekkje prinsippet om
berekraftig forvaltning basert på best tilgjengeleg vitskapleg kunnskap
og prinsippet om økosystembasert forvaltning.
Å sikre Noreg ein rettferdig del ved kvotefordeling
av felles regulerte bestandar, i første rekkje basert på sonetilhøyrselprinsippet.
Å sikre tilfredsstillande kontroll og handheving innan
dei forvaltningsregime som Noreg deltek i.
Det er særleg to saksfelt som har fått mykje merksemd
dei seinare åra. For det første vil meldinga gjere greie for kampen
mot ulovleg, urapportert og uregistrert fiske og fiskerikriminalitet.
Dette er ei sak regjeringa har arbeidd med i fleire år, og dette
arbeidet vil halde fram. For det andre er det naturleg å omtale
særskilt internasjonale havmiljøprosessar der Noreg etter kvart
har fått ei sentral rolle.
Utvidinga av nasjonal fiskerijurisdiksjon til
200 nautiske mil på slutten av 1970-talet førte såleis til ein overgang
frå fleirsidige forhandlingar innan ramma av NEAFC til forhandlingar
mellom dei kyststatane som saman har suverene rettar til fiskebestandane.
Dette inneber at såkalla tredjeland, som ikkje har kyststatsrettar
i det aktuelle området, ikkje tek del i avgjerder om forvaltninga
av bestandane slik dei gjorde tidlegare.
Kyststatane har ei plikt til å fremje ei forsvarleg ressursforvaltning
som samstundes skal ta omsyn til dei økonomiske behova til kystbefolkninga.
Norske styresmakter legg vekt på dette når den norske fiskeripolitikken
vert utforma. I tråd med dette fører Noreg årleg tosidige og fleirsidige
forhandlingar med ei rekkje land om forvaltning og vern av fiskebestandar,
om gjensidig fangstløyve og fiskekvotar, og om einsidig løyve for
fiskarar i nokre land til å fiske i dei norske 200 nautiske mil-sonene.
Stortinget gav 11. juni 1996 samtykke til ratifikasjon
av FN sin havrettskonvensjon av 10. desember 1982 og FN-konvensjonen
av 4. desember 1995 om fiske på det opne hav, som supplerer FN sin
havrettskonvensjon av 10. desember 1982. FN-avtalen om fiske på
det opne hav forpliktar òg til samarbeid om forsvarleg forvaltning
av vandrande og langt migrerande bestandar. Noreg har difor i aukande
grad teke del i samarbeidet i ulike relevante internasjonale organisasjonar.
Noreg og Russland skreiv den 15. september 2010
under ein avtale om maritim avgrensing og samarbeid i Barentshavet
og Polhavet. Avtalen betyr at det omfattande og gode norsk-russiske fiskerisamarbeidet
vert vidareført. Avtalen regulerer òg samarbeid om utnytting av
moglege grenseoverskridande petroleumsførekomstar i desse havområda.
Avtalen tredde i kraft den 7. juli 2011.
Den 28. august 2009 vart det semje om ein tekst for
ein global bindande avtale om hamnestatstiltak for å førebyggje,
hindre og eliminere ulovleg, urapportert og uregulert fiske. Generalforsamlinga
i FAO vedtok avtalen 22. november 2009, og Noreg skreiv under avtalen
same dagen. Avtalen trer i kraft når 25 statar har slutta seg til. Forslag
til vedtak om samtykke til ratifikasjon av avtalen vart fremma for
Stortinget i Prop. 54 S (2010–2011), og vedteke 26. april 2011.
I februar 2013 vart det semje om globale retningslinjer
for flaggstatsansvar under FAO. Retningslinjene er forhandla fram
gjennom tre tekniske konsultasjonar under FAOs fiskerikomité (COFI),
og skal leggjast fram for tilslutning på neste sesjon i COFI. Retningslinjene
inneheld kriterium for evaluering av flaggstaten, som mellom anna
omfattar krav om at flaggstaten har implementert bindande internasjonalt
regelverk og hindrar eigne fartøy frå å delta i UUU-verksemd.
Ulovleg, urapportert og uregulert fiske (UUU-fiske)
er ei alvorleg utfordring for ei forsvarleg utnytting av fiskebestandane
og for marine økosystem både lokalt, nasjonalt, regionalt og globalt.
UUU-fiske skjer ikkje berre på bestandar som Noreg som kyststat
har eit forvaltningsansvar for, men over heile verda. Den overnasjonale
karakteren som UUU-aktiviteten ofte har, gjer at vi må ha ei brei
tilnærming for å løyse problema.
Primært vert UUU-fiske handtert internasjonalt gjennom
FN sin matvareorganisasjon (FAO) og i dei regionale fiskeriforvaltningsorganisasjonane
(RFMOar).
Havressurslova gjev utvida heimlar i kampen mot
UUU-verksemd og opnar mellom anna for å kunne straffe eigne borgarar
og juridiske personar for handlingar utførde i jurisdiksjonsområda til
andre land. Vidare innfører lova tvangsmulkt og lovbrotsgebyr, og
ny forskrift om bruk av tvangsmulkt og lovbrotsgebyr ved brot på havressurslova
tok til å verke 1. mars 2012.
I 2012 vart det gjennomført eit forprosjekt
for å kartleggje informasjonsbehova innanfor ressurskontroll og
akvakulturtilsyn regionalt, sentralt og hos Kystvakta. Det har resultert
i at det i 2013 er starta eit nytt prosjekt, Prosjekt systemkartlegging.
Dette prosjektet skal leggje grunnlaget for eit framtidig kontroll-
og tilsynssystem, gjennom å utarbeide kravsspesifikasjonar retta
mot relevant informasjon frå tilsyns- og kontrollarbeid, informasjon
frå eiga sakshandsaming og informasjon frå inspeksjonar og revisjonar. Elektronisk
system for operasjonell risikovurdering, ELORV, vil vere ein del
av dette arbeidet. Ferdig utvikla vil systemet risikovurdere aktørane
i fiskerinæringa kontinuerleg og bidra til at dei rette objekta,
både på hav og land, vert kontrollerte. Resultatet vil verte ein
meir treffsikker ressurskontroll og dermed ein effektivisert kontrollinnsats
både ved landing og i etterfølgjande kontrollar (omsetningskontrollar).
Å overvake aktiviteten i Barentshavet er framleis
prioritert og det er laga ei løysing for å koordinere risikovurderingar
i sann tid i området. Dette skjer i samarbeid mellom Kystvakta,
Forsvaret og Fiskeridirektoratet. Arbeidet vert gjort i form av
dagleg overvaking, innhenting av informasjon, risikoanalysar og
analysar av totaluttak. Analysane av totaluttaket vert gjort i samarbeid med
Russland.
Delar av UUU-verksemda er rein kriminell verksemd
og vert omtala som fiskerikriminalitet. Slik verksemd kan omfatte
både økonomisk kriminalitet, miljøkriminalitet og organisert kriminalitet.
Ein ser òg at fiskerikriminalitet i ein del tilfelle har bindeledd
til anna kriminell verksemd som smugling av narkotiske stoff, menneskehandel,
korrupsjon og økonomisk kriminalitet. Den globale kampen mot fiskerikriminalitet
er komplisert og involverer både politiet, påtalemakta og kontrollstyresmaktene.
I arbeidet må det leggjast til rette for samarbeid mellom politiet
i seljar- og kjøparland for å etterforske eventuelle kriminelle
tilhøve.
Fiskeriforvaltningas analysenettverk (FFA) vart etablert
i 2009, og er eit konkret tiltak mot organisert kriminalitet knytt
til ulovleg fiske (Meld. St. 7 (2010–2011) «Kampen mot organisert
kriminalitet»). FFA er òg eit av fleire tiltak mot fiskerirelatert
kriminalitet i regjeringas handlingsplan mot økonomisk kriminalitet
frå 2011. FFA skal sikre eit tettare samarbeid mellom ulike etatar
og bidra med oppdaterte, tverrsektorielle analysar innanfor saksområdet.
I tillegg til å produsere analysar om ulovleg uttak av fisk frå havet,
legg prosjektet òg vekt på annan fiskerirelatert kriminalitet som
til dømes ulovleg kapitalflyt som stammar frå omsetning av ulovleg
fanga fisk. Prosjektet er samansett av fagpersonar frå Politidirektoratet,
ØKOKRIM, Fiskeridirektoratet, Kystvakta, Kystverket, Toll- og avgiftsdirektoratet
og Skattedirektoratet.
Noreg arbeider både nasjonalt og internasjonalt for
at forvaltning av marine ressursar skjer i tråd med anerkjente prinsipp
som mellom anna berekraftig bruk, føre-var-prinsippet og økosystembasert
forvaltning. Dette gjeld i våre eigne fiskerisoner, i internasjonalt
farvatn og i andre nasjonars fiskerisoner. For å kunne nå dette
målet for ressursforvaltninga, trengst det informasjon om og kontroll
med alt ressursuttak i norske jurisdiksjonsområde. Fysisk kontroll
med fiskeaktivitet er ein sentral del av det norske systemet for
kontroll og handheving. Dette inneber kontroll på alle nivå, til
havs, under landing og ved omsetning av fiskefangstar.
I Noreg har Fiskeridirektoratet ansvaret for
ressurskontrollen saman med Kystvakta og salslaga. I internasjonale
samanhengar vert det norske systemet med nært samarbeid mellom Fiskeridirektoratet,
Kystvakta og salslaga ofte framheva som ein vellukka modell for
ressurskontroll.
Utanlandske styresmakter har kontrollansvaret når
norske fartøy leverer fangst i utanlandske hamner og når norske
fartøy fiskar i jurisdiksjonsområda til desse landa. Hamnestatskontrollen som
vart innført i NEAFC frå 1. mai 2007 og i NAFO i 2009, gjev norske
styresmakter eit kontrollansvar når det gjeld å verifisere fangst
ved landingar frå norske fartøy i NEAFC- og NAFO-landa sine hamner.
Noreg skal òg hente inn slik verifisering ved landingar frå utanlandske
fartøy i norske hamner.
Frå 2006 har ein hatt elektronisk overvaking
av kvalfangsten. Inspektørbasert kontroll vert no gjennomført på
stikkprøvebasis på kvalfangstfartøya. For å få løyve til å delta
på selfangst er det eit krav at fartøyet har inspektør om bord under
heile fangsten. Det er ein viktig del av kontrolloppgåva å sjå til
at avlivinga skjer i samsvar med regelverket. I andre fiskeri har
Fiskeridirektoratet sett i verk ei ordning med inspektørar om bord
på enkelte norske og utanlandske fartøy i kortare eller lengre periodar.
På enkelte artar går det føre seg eit omfattande fiske i indre norske farvatn.
Det er difor ei ordning der inspeksjonsfartøy frå Fiskeridirektoratet
er til stades på desse fiskefelta.
Kystvakta har direkte tilgang til dei opplysningane
som er lagra i databasane i Fiskeridirektoratet. Opplysningane vert
under kontroll på feltet haldne opp mot opplysningane som går fram
av fangstdagboka til fartøyet, eventuelle sluttsetlar og innhaldet
i lasterommet eller lastetankane på fartøyet. Når desse opplysningane
ikkje er i samsvar med kvarandre kan Kystvakta reagere med åtvaring,
fartøyet kan haldast tilbake, eller saka kan meldast til politiet,
alt etter kor grov krenkinga er.
Kontroll med ressursuttaket på felles fiskebestandar
krev eit nært samarbeid mellom dei landa som deler ressursane. Eit
slikt samarbeid er inngått med begge dei to partane som Noreg deler
viktige fiskeressursar med: Russland og EU. Noreg har òg inngått
avtalar om kontroll direkte med enkelte medlemsland i EU og fleire
andre statar.
Kontrollavtalen som vart underteikna mellom Noreg
og Portugal 16. februar 2006, representerte ei oppdatering av slike
avtalar, og er den første avtalen Noreg inngår som òg omfattar gjensidig
rapportering av landingar av fisk frå tredjelands fartøy. Etter
dette tidspunktet er eksisterande avtalar reviderte etter tur for
å få med tredjelands fartøy. Dette er frå norsk side eit viktig
bidrag i arbeidet med å få kontroll med det ulovlege fisket i Barentshavet
og med landingar av fisk til europeiske hamner. Den nye generasjonen
av kontrollavtalar inneber òg at partane skal samarbeide om å kjempe
mot ulovleg fiske. Den siste avtalen vart inngått med Spania 23. januar
2013. Dermed har Noreg på plass avtalar med alle land som har interesser
i norske havområde.
Satellittsporing av fiskefartøy var eit viktig framsteg
i kontrollarbeidet. Det ligg no føre satellittsporingsavtalar mellom
dei landa som har felles fiskeriinteresser i Nordaust-Atlanteren.
Utvida sporing og elektronisk fangstrapportering
er viktige element i samband med kontroll generelt og i kampen mot
ulovleg fiske. Noreg og EU signerte 23. februar 2010 ein avtale
om elektronisk utveksling av fangst- og aktivitetsdata ved fiske
i kvarandre sine soner. Med bakgrunn i denne avtalen vart alle fartøy
over 15 meter pålagde å rapportere fangst- og aktivitetsdata elektronisk
ved fiske i kvarandre sine soner frå og med 1. januar 2011. Det
er vidare avtalt at fartøy over 12 meter som fiskar i Skagerrak
skal ha posisjonsrapportering og elektronisk rapportering frå 1. januar
2013. Formålet med avtalen er òg å harmonisere rapporteringspliktene
i norske farvatn og EU-farvatn så langt som mogleg. Noreg har inngått
tilsvarande avtalar med Island og Russland. Avtalen med Island tredde
i kraft 1. januar 2013 for norske fartøy. Frå 1. juni 2013 vil avtalen
få verknad for islandske fartøy. Avtalen med Russland trer i kraft
1. juli 2013.