Fiskeri- og kystdepartementet fremmar i denne proposisjonen
forslag til endring i lov 6. juni 2008 nr. 38 om forvaltning av
viltlevande marine ressursar (havressurslova) § 22 andre ledd om sports-
og rekreasjonsfiske.
Forslaget går ut på å innføre ein heimel som
gjer det mogleg å gje dispensasjon frå dei generelle reiskapsføresegnene
for sports- og rekreasjonsfiske i havressurslova § 22 første ledd.
Endringa vil medverke til at det blir enklare å gje løyve til aktivitetar
som kan fremme og ta vare på kystkulturen.
Departementet sitt høyringsnotat vart sendt
på høyring. I høyringssvara var Norges Fiskarlag, Norges Kystfiskarlag,
Norsk Sjømannsforbund, Sunnmøre og Romsdal Fiskesalslag og Fiskekjøpernes
Forening sterkt kritiske til forslaget. Dei viser mellom anna til
at dette vil gå ut over yrkesutøvarane, at ei slik ordning kan bli utnytta
ved at kostnadene med å drive og halde ved like fartøy blir finansiert
gjennom fiske og at ordninga vil måtte føre med seg strenge sikkerheitskrav
som kan vere vanskeleg å følgje opp.
Departementet meiner det er viktig å leggje
til rette for at kystkulturen vår blir teken vare på og fremma på
best mogleg måte. Det skal berre vere høve til å gje dispensasjon
i dei tilfelle der slike reiskapar skal nyttast for å fremme og
ta vare på kystkultur. Det er ein føresetnad at det blir følgd ein
streng praksis med omsyn til kven som skal få slik dispensasjon.
Dispensasjon skal berre gjevast til museum, foreiningar, stiftingar
og liknande som har som særskilt formål å fremme og ta vare på kystkultur.
Dette bør gå fram av vedtektene til den som søkjer om dispensasjon.
Vidare skal dispensasjon berre gjevast i «særskilte tilfelle». Det vil òg kunne setjast vilkår for
dispensasjon.
Forslaget fører ikkje til materielle kostnader
for næringa. Forslaget har ikkje nemnande økonomiske eller administrative
konsekvensar.
Komiteen, medlemmene fra Arbeiderpartiet,
Else-May Botten, Ingrid Heggø, Odd Omland og Knut Storberget, fra
Høyre, Frank Bakke-Jensen, Ingunn Foss, Gunnar Gundersen og Ove
Bernt Trellevik, fra Fremskrittspartiet, Morten Ørsal Johansen,
Øyvind Korsberg og Jørund Rytman, fra Kristelig Folkeparti, Line
Henriette Hjemdal, fra Senterpartiet, lederen Marit Arnstad, og fra
Venstre, Pål Farstad, viser til at Prop. 185 L (2012–2013)
omhandlar innføring av ein heimel i havressurslova som gjer det
mogleg å gje dispensasjon frå dei generelle reiskapsføresegnene
for sports- og reakreasjonsfiske. Komiteen har merka
seg at endringa vil medverke til at det blir enklare å gje løyve
til aktivitetar som kan fremme og ta vare på kystkulturen.
Komiteen har også merka seg at
Norges fiskarlag, Norges Kystfiskarlag, Norsk sjømannsforbund, Sunnmøre
og Romsdal Fiskesalslag og Fiskekjøpernes Forening er kritiske til
framlegget av di dei meiner ei slik ordning kan gå ut over yrkesutøvarane
og bli utnytta ved at kostnadane med drift og vedlikehald på fartøy
vert finansierte gjennom fiske, og dei påpeikar òg at tryggingskrava
vert vanskelege å overhalde.
Komiteen er samd i at det er
viktig å leggje til rette for at kystkulturen vår vert teken vare
på og fremma på best mogleg måte. Komiteen har merka
seg at dette også vil vera positivt for å fremja det lokale reiselivet
gjennom å leggje til rette for opplevelsesturisme.
Komiteen er vidare samd i at
det skal vera ein streng praksis med omsyn til kven som skal få slik
dispensasjon, og at dispensasjon kun skal gjevast til museum, foreiningar,
stiftelsar og liknande som har som særskilt formål å fremme og ta
vare på kystkulturen.
Komiteen er kjend med at det
gjeld ei øvre omsettingsgrense på kr 50 000 pr. kalenderår for fangst
som er teken med fartøy som ikkje er merkeregistrert, eller frå
land, og at det kan setjast som vilkår at fangsten ikkje vert omsett.
Komiteen vil peike på at også
omsynet til yrkesfiskarane må vege tungt og at eit omsettingsforbod
må vurderast i kvart enkelt tilfelle for å ivareta både yrkesutøvarane
og omsynet til dei andre aktørane.
Komiteens tilråding fremmes av en samlet komité.
Komiteen har for øvrig
ingen merknader, viser til proposisjonen og rår Stortinget til å
gjøre følgende
vedtak til lov
om endring i havressurslova
I
I lov 6. juni 2008 nr. 38 om forvaltning av viltlevande
marine ressursar blir det gjort følgjande endring:
§ 22 andre ledd skal lyde:
Departementet kan i forskrift gjere unntak frå føresegnene
i første ledd for bruk av landnot. Departementet kan også
gjere unntak frå føresegnene i første ledd i særskilte tilfelle
der det er nødvendig for å fremme kystkulturformål.
II
Lova gjeld frå den tid Kongen fastset.
Oslo, i næringskomiteen, den 19. desember 2013
Marit Arnstad
|
Ingrid Heggø
|
leder
|
ordfører
|