Med bakgrunn i lokalpolitiske
vedtak om revisjon av Miljøpakke Trondheim legg Samferdselsdepartementet
i proposisjonen fram forslag om å forlenge innkrevjingsperioden
med fem år. I tillegg blir det foreslått nokre endringar i takst-
og rabattsystemet (Miljøpakke Trondheim trinn 3).
Staten, Sør-Trøndelag
fylkeskommune og Trondheim kommune underteikna i september 2016
ein bymiljøavtale for Trondheim for perioden 2016–2023. Det blir
tatt sikte på at avtalen blir revidert i 2018, basert på rammene
og føringane i Nasjonal transportplan 2018–2029.
Bymiljøavtalen omfattar
heile porteføljen til Miljøpakke Trondheim. Avtalen omfattar også
prosjekt/tiltak som blir finansierte med belønningsmidlar, og prosjekt/tiltak
på riksveg som blir finansierte med midlar frå ramma til programområdetiltak
i byområde med bymiljø-/byvekstavtalar. Gjennom ordninga med statleg
tilskot til store fylkeskommunale kollektivinfrastrukturprosjekt
vil staten dekke halvparten av dei samla kostnadene ved prosjektet
MetroBuss i Trondheim, trinn 1.
Den foreslåtte revisjonen
av Miljøpakke Trondheim er ifølgje dei lokale partane ein viktig
føresetnad for å nå nullvekstmålet i bymiljøavtalen. Prosjektporteføljen
frå trinn 2 ligg fortsatt til grunn, men dei auka inntektene vil
bidra til at kommunen og fylkeskommunen kan finansiere sin del av
prosjektet MetroBuss. I tillegg vil dei bidra til knutepunktsutvikling
og utvikling av eit samanhengande nett for gåande og syklande i
tråd med arealdelen i Trondheim kommune sin kommuneplan. Den foreslåtte
takstauken vil også bidra til å redusere trafikkveksten. Vidare
vil midlane bli nytta til å sikre realisering av dei prosjekta som
inngår i Miljøpakke Trondheim, mellom anna riksvegprosjekta E6 Jaktøya–Klett–Sentervegen
og rv. 706 Nydalsbrua (tidlegare Sluppen bru) med tilknytingar.
Saken er lokalpolitisk
handsama i Trondheim kommune og Sør-Trøndelag fylkeskommune.
Grunnlagsdokumentet
for revisjon av Miljøpakke Trondheim blei sendt på høyring til dei
andre kommunane i Trondheimsregionen 13. mai 2016. Melhus, Klæbu,
Skaun og Stjørdal kommunar har uttalt seg til dokumentet. Kommunane
stiller seg i utgangspunktet positive til eit trinn 3 av Miljøpakken,
men samstundes blir det fremja ein del ønskje om endringar som det
ikkje blir tatt stilling til i denne omgangen.
Prosjekta i Miljøpakke
Trondheim blir prioriterte gjennom porteføljestyring. Dette inneber
at tiltaka blir prioriterte på grunnlag av ei samla vurdering basert
på bidrag til måloppnåing, disponible midlar, samfunnsøkonomisk
lønsemd, planstatus og kapasitet på planlegging og gjennomføring.
Det kan bli gjort endringar innafor pakken for å sikre rasjonell
framdrift og økonomistyring. Ved kostnadsauke i prosjekta/tiltaka
skal porteføljen reduserast.
Prioriteringar og
rapportering vil bli lagt fram for Stortinget i samband med dei
årlege budsjetta.
Etter at Stortinget
har fatta vedtak om forlenga innkrevjingsperiode og endringar i
takst- og rabattsystemet for Miljøpakke Trondheim trinn 3, vil det
bli inngått ein tilleggsavtale mellom Vegdirektoratet og bompengeselskapet
i tråd med føresetnadene som er lagt til grunn i proposisjonen.