Komiteen, medlemene frå Arbeidarpartiet,
Tove Elise Madland, Cecilie Myrseth, Even A. Røed og Truls Vasvik,
frå Høgre, Sandra Bruflot, Erlend Svardal Bøe og leiaren Tone Wilhelmsen
Trøen, frå Senterpartiet, Lisa Marie Ness Klungland og Hans Inge
Myrvold, frå Framstegspartiet, Bård Hoksrud og Morten Wold, frå Sosialistisk
Venstreparti, Marian Hussein, frå Raudt, Seher Aydar, frå Kristeleg
Folkeparti, Olaug Vervik Bollestad, og frå Pasientfokus, Irene Ojala,
syner til at proposisjonen føreslår endringar i legemiddelloven
og fremjar forslag til vedtak om samtykke til innlemming av EU sin
forordning (EU) 2019/6 om legemiddel til dyr i EØS-avtalen.
Komiteen gjer merksam på at
denne innstillinga gjeld forslaget om samtykke til innlemming av
forordninga om lækjemiddel til dyr. Forslag om endringar i legemiddelloven
vert handsama i ei eiga innstilling. Det har ikkje kome skriftlege
innspel innan fristen til saka til helse- og omsorgskomiteen.
Komiteen merkar seg at føremålet
med den nye forordninga er å auke tilgjengelegheita av lækjemiddel til
dyr, effektivisere godkjenningsordningane, stimulere til auka konkurranseevne
og innovasjon, bidra til ein meir effektiv indre marknad og å styrkje
arbeidet til EU med å nedkjempe antimikrobiell resistens (AMR).
Komiteen merkar seg vidare
at forordninga vil erstatte direktiv 2001/82/EF som tidlegare har
danna grunnlaget for regulering av forsyningskjeda for lækjemiddel
til dyr, av dette krava for tilverking, marknadsføring, import,
eksport, forsyning, distribusjon, lækjemiddelovervaking, kontroll
og bruk av lækjemiddel til dyr.
Komiteen har elles ingen merknader
til saka og sluttar seg på grunnlag av dette til innlemming i EØS-avtalen
av forordning (EU) 2019/6 om lækjemiddel til dyr.