I proposisjonen foreslår Helse- og omsorgsdepartementet lovendringar som gir fleire pasientgrupper rett til nødvendig tannhelsehjelp i den offentlege tannhelsetenesta. Pasientgruppene det gjeld, er unge vaksne frå og med 21 til og med 24 år, personar som på grunn av rusmiddelavhengigheit mottar tenester etter helse- og omsorgstjenesteloven § 3-2 første ledd nr. 6 bokstav b eller der pårørande mottar tenester etter helse- og omsorgstjenesteloven § 3-6 nr. 2, pasientar i legemiddelassistert rehabilitering (LAR) i medhald av spesialisthelsetjenesteloven § 3-16 og innsette i fengsel i kriminalomsorga. Departementet foreslår òg å oppheve ei føresegn i tannhelsetjenesteloven om prioritering mellom pasientgrupper i den offentlege tannhelsetenesta. I tillegg foreslår departementet endringar i skuldkravet for føretak ved ilegging av lovbrotsgebyr etter alkoholloven og legemiddelloven.