Unn Aarrestad (Sp):
Eg vil få stilla
samferdselsministeren følgjande spørsmål:
Det har vore ein sterk auke i
trafikkdrepne i år. Kvart femte liv kunne vore spart dersom me hadde ei
betre opplæring i fyrstehjelp, hevdar trafikkmedisinar Inggard Lereim i
bladet Motor nr. 3 1995. Styresmaktene har nå valt å ta bort
fyrstehjelpsopplæringa frå føraropplæringa.
Vil statsråden medverka til at me får
ei betre føraropplæring også med omsyn til fyrstehjelp ved
trafikkulukker?
Statsråd Kjell Opseth:
Alle som tek
førarkort, skal kunne livreddande førstehjelp. Dette går fram av
Vegdirektoratet sine læreplanar og av lærebøkene for førarprøva. Spørsmål
om førstehjelp er også ein del av den teoretiske prøva. Dette har vore
regelen sidan 1989. Styresmaktene har såleis ikkje endra kravet til
førstehjelp som ein del av førarprøva.
Fram til 1. februar i år var det
likevel slik at alle som gjekk opp til førarprøva for førarkortklasse B som
elev ved køyreskule, måtte gjennomgå fire timar førstehjelp. Tilsvarande
krav om obligatorisk opplæring var det ikkje for dei som gjekk opp til
førarprøva som privatist. Det nye opplegget for føraropplæring klasse B set
same krav om opplæring til alle som skal ta førarkort.
Representanten Unn Aarrestad viser til
trafikkmedisinar Inggard Lereim, som har hevda at kvart femte liv kunne vore
spart ved trafikkulukker om vi hadde betre opplæring i førstehjelp.
Korkje Samferdselsdepartementet eller
Vegdirektoratet har dokumentasjon på at dette er rett. Departementet bad
likevel direktoratet i februar i år å sjå nærare på nytta av obligatorisk
kurs i førstehjelp. Direktoratet skal m.a. sjå nærare på reglane på dette
området i andre land, og vurdere dei undersøkingane som finst om effekten av
at slik opplæring er gjord obligatorisk.
Unn Aarrestad (Sp):
Eg takkar for
svaret, som eg oppfatta som å vera noko unnvikande.
Internasjonale undersøkingar syner at
50 % av dei som døyr i trafikkulukker, døyr på skadeplassen eller på veg til
sjukehuset. Ei vesentleg årsak til dette er mangelfull førstehjelp eller at
det ikkje vert gitt førstehjelp frå medtrafikantar. Undersøkingane syner
òg at utdanninga har vore for svak. Frykta for å gjera noko overfor eit
ulukkesoffer botnar ofte i mangelfull kunnskap og mangelfull tru på eigne
kunnskapar. Det er rekna ut at samfunnskostnadene ved trafikkulukker i
Noreg er ca 21 milliardar kr årleg, og i tillegg kjem alle tragediane for
familie og omgivnader som aldri kan prisast i kroner.
Så til spørsmålet: Kan statsråden sjå
at det òg er god samfunnsøkonomi med god førstehjelpsopplæring i
føraropplæringa?
Statsråd Kjell Opseth:
Det må stå
representanten Aarrestad fritt å vurdere det svaret som er blitt gitt, men
det er eit forsøk på å ha eit ryddig forhold til også føraropplæring. Vi er
alle saman opptekne av å få redusert ulukkene på vegane våre og også å
avgrense skadane dersom ulukker oppstår. Men å gjennomføre tiltak dersom vi
ikkje er sikre på at desse har nokon effekt, er iallfall ikkje ein nytte for
samfunnet. Så får vi vente og sjå om denne obligatoriske opplæringa i
førstehjelp har nokon reell verknad på skadeomfanget på vegane våre. Det er
så langt vi kan sjå, framleis ikkje dokumentert.
Unn Aarrestad (Sp):
Eg lurer av og til
på kor mykje dokumentasjon som skal til før ein trur på det. Eg veit at ei
arbeidsgruppe vart nedsett av Sosialdepartementet i 1989 for å sjå på bl.a.
dette, og det vart behandla vidare i Samferdselsdepartementet i 1993. Av
dei mange konklusjonane kom det fram at undervisninga i fyrstehjelp til
førarkortinnehavarar var utilstrekkeleg.
Då kan ein lura på om det er av di
statsministeren i valkampen i 1993 sa at førarkortet skulle verta
rimelegare, at samferdselsministeren nå prøver å spara på alle hald. Når
det skal vera obligatorisk med glattkjøring og mørkekjøring, kvifor skulle
det ikkje då vera obligatorisk òg med fyrstehjelpopplæring? Eg vil spørja
igjen: Vil ikkje statsråden medverka til at denne opplæringa vert gjord
obligatorisk igjen?
Statsråd Kjell Opseth:
La meg få gje
uttrykk for at det ikkje er særleg tvil om at føraropplæringa var blitt for
dyr. Dei tiltaka som no er gjennomførte, er gjennomførte for å kombinere ei
billegare ordning og ei betre ordning. Det er vi nokså overtydde om at vi
får til.
Dersom det blir dokumentert at
obligatorisk opplæring i førstehjelp på f.eks. fire timar, har ein effekt på
for det første talet på trafikkulykker og for det andre omfanget av dei
ulykker som skjer, vil vi sjølvsagt gå inn for at opplæringa blir gjord
obligatorisk. Men det er så langt ikkje dokumentert, same kva
representanten Aarrestad måtte meine om det, så vi får sannsynlegvis fleire
rundar på dette her i salen, etter det eg kan forstå. Men vi må vite kva vi
innfører, dersom vi skal innføre dette som ei obligatorisk ordning.