Petter Løvik (H):
Eg tillèt meg å
stille følgjande spørsmål til kyrkje-, utdannings- og forskingsministeren:
Det såkalla TAF-prosjektet, eit
samarbeidsprosjekt mellom skule og næringsliv i Hordaland, gir etter eit
fireårig løp både fagbrev og spesiell studiekompetanse. Erfaringane så
langt viser at både elevane og bedriftene som har gjennomført opplegget, er
svært godt nøgde.
Vil statsråden opne for at tilsvarande
opplegg kan settast i gang også i andre fylke?
Statsråd Jon Lilletun:
TAF-prosjektet
starta i Hordaland fylkeskommune ved Nordhordland vidaregåande skule i 1992.
Stortinget bad om at prosjektet skulle vidareførast i Reform 94. Prosjektet
vart avgrensa til inntak til grunnkurs i 1995, 1996 og 1997, men vart
seinare utvida til også å gjelde inntaka i 1998 og 1999. Prosjektet er òg
utvida med ein klasse på Stord yrkesskule og tekniske fagskule med inntak
til grunnkurs i 1998 og 1999. På bakgrunn av ei evaluering som vart gjord i
1997, har eg bede fylkeskommunen om å gje ei oppsummering av erfaringane.
Dette vil eg ta med i ei melding til Stortinget om Reform 94 våren 1999.
I tillegg til søknadene om utviding av
prosjektet frå Hordaland fylkeskommune har det kome søknader frå Rogaland,
Buskerud og Møre og Romsdal fylkeskommunar om å få delta i prosjektet. Alle
søknadene er innvilga, men avgrensa til inntak til grunnkurs i 1998 og 1999.
Departementet har òg fått forespørslar frå enkeltskular. Desse er formidla
til dei aktuelle fylkeskommunane.
Eg finn det ikkje riktig å opne for ei
vidare utviding av prosjektet no. Eg meiner at ei eventuell utviding må
kome på bakgrunn av Stortingets behandling av saka neste vår.
Eg meiner at vi her har prøvd å finne
ein kombinasjon av det representanten Løvik tidlegare har etterlyst.
Samstundes som ein har blikket festa på ei større evaluering som skal leggje
dei permanente planane, har eg, når noko som vert prøvd ut i skulen,
fungerer så godt som dette prosjektet, opna for at dei som er ferdige til å
setje i gang, har fått anledning til det i åra fram til vi får den totale
evalueringa. Det har vore linja til departementet i denne saka.
Petter Løvik (H):
Eg takkar
statsråden for svaret. Prosjektet med eit fireårig løp i vidaregåande skule
som gir både fagbrev og spesiell studiekompetanse, vart i 1994 forsøkt
stoppa av dåverande statsråd. Stortingsfleirtalet meinte heldigvis noko
anna, og dette opplegget har blitt ein stor suksess. Både bedriftene,
elevane og lærarane har svært gode erfaringar, og eg synest det er positivt
at statsråden no har opna litt på det vi tidlegare har diskutert i denne
sal, nemleg om forbetringar innanfor Reform 94 skal vente til den store
evalueringa.
Eg håper at dei nye prosjekta som er i
gang, vil gi dei same positive resultata, og eg håper at statsråden meiner
det same no som statsråd som han tidlegare meinte som stortingsrepresentant,
at dette er eit prosjekt som vi bør satse på, der både næringslivet,
bedriftene og elevane har gått inn svært motiverte i dette arbeidet.
Statsråd Jon Lilletun:
Eg kan
bekrefte at statsråden meiner det same no som han gjorde som
stortingsrepresentant, og det er grunnen til dei opningane som er gjevne til
nye skular.
Det er ikkje tvil om at erfaringane
frå det fyrste prosjektet var svært vellukka både med tanke på at vi treng å
styrkje yrkesfaga og at ein treng sterke yrkesfagelevar som òg kan få
studiekompetanse, for å sikre tilgangen til ingeniørhøgskulane. Det var
òg fleire gode erfaringar her.
Samstundes trur eg det er viktig at vi
no får drege med oss utviklinga i dei nye prosjekta, om dette faktisk ser ut
til å festne seg på fleire skular som ein god måte å gjere det på. Det vil,
i den gjennomgangen som vi skal ha neste år, gje oss eit endå betre grunnlag
til å etablere dette som ei permanent ordning.
Slik som eg ser det i dag, er det
ingen grunn til at dette ikkje skal verte ei fast etablert ordning, men det
får vi ta stilling til når saka vert forelagd Stortinget.