Modulf Aukan (KrF):
Eg tillèt meg å
stilla følgjande spørsmål til sosialministeren:
Etter gjeldande reglar tek det 1.560
veker før ein har opptent full fiskarpensjon. Dette tilsvarar 30 år i aktiv
teneste på fiske. Mange starta fiske alt i 15-årsalderen. Dei vil dermed
ha opptent full pensjon ved fylte 45 år. Sjølv om ein betaler fram til
fylte 60 år, vil pensjonen verta den same.
Kan statsråden tenkje seg å sjå på
dette regelverket på nytt?
Statsråd Magnhild Meltveit Kleppa:
Pensjonstrygda for fiskarar er ei kollektiv pensjonsordning som blir
finansiert av næringa sjølv gjennom medlemspremie, avgift på omsetnad av
fisk og utbytte av fond.
Ordninga vart gjennomgått så seint som
i 1994. Norges Fiskarlag og Norsk Sjømannsforbund var då einige om at
ordninga skulle halda fram som ei pliktig pensjonsordning for fiskarar som
står på blad B i fiskarmanntalet. Eg viser til Ot.prp.nr.24 (1992-1993) og
Stortinget si handsaming av denne.
I ei pliktig kollektiv pensjonsordning
er det vanleg at medlemene betaler premie heilt fram til pensjonsalderen,
som i pensjonstrygda for fiskarar er 60 år.
I ei slik kollektiv ordning får den
einskilde såleis ikkje utbetaling fullt ut i samsvar med det som er
innbetalt, slik som i individuelle private pensjonsforsikringar. I
kollektive ordningar er oppteningstida ein utmålingsregel for full pensjon.
Plikta til å betala medlemspremie er ei anna sak. Eg viser t.d til den
kollektive pensjonstrygda for sjømenn og Statens Pensjonskasse der alle må
betala medlemspremie fram til pensjonsalderen. Det same gjeld i
folketrygda.
Fiskarane si ordning er såleis ikkje
spesiell. Det spesielle er at fiskarane ikkje blir trekte for premien av
ein arbeidsgjevar, men må betala den sjølv.
I åra frå 1972 til 1993 var det ikkje
noka lovføresegn med heimel til å krevja inn premien. Mange som hadde
betalt full oppteningstid, kunne dermed la vera. I praksis vart dermed
ordninga frivillig, noko som vart sterkt kritisert av Riksrevisjonen. Eg
viser til Dok.nr.1:03 (1993-1994) frå Riksrevisjonen, der det heiter at
manglande premiebetaling for fiskarar som har full oppteningstid, har ført
til tap for trygda. Riksrevisjonen går ut frå at lovbestemt medlemsavgift
heretter vert rett rekna ut og kravd inn.
På denne bakgrunn vart det i 1994
innført ein reaksjonsregel i fiskarpensjonslova. Denne fører til at den som
ikkje betaler skyldig medlemspremie, skal strykast frå blad B i
fiskarmanntalet.
Med den gjeldande kollektive
pensjonstrygda vil eg tru det er vanskeleg å stansa innbetalinga av
medlemspremie når oppteningstida er ute, eller halda fram med å auka
pensjonen utover dagens oppteningstid på maksimum 30 år.
Eg vil likevel nemna at Norges
Fiskarlag no vurderer ordninga nærmare, med sikte på å gå over til ei meir
individuell privat løysing. Det vil m.a kunne innebera at ein vurderer
opplegg som gir større samsvar mellom inn- og utbetaling i pensjonsordninga.
Utgreiinga skal vera ferdig til hausten.
Dette er såleis ei sak vi nok kjem
attende til.
Modulf Aukan (KrF):
Eg takkar
sosialministeren for svaret. Dette er, som det vart sagt, ei ordning som er
sjølvfinansierande. Det offentlege har derfor, slik eg har oppfatta det,
ingen økonomiske utteljingar av denne ordninga.
Eg vil likevel leggja til at ordninga
med fiskarpensjon kan slå noko skeivt ut slik den vert praktisert i dag. Eg
tenkjer da både på dei som alt i 45-årsalderen har innbetalt fullt beløp, og
som eigentleg ingenting ekstra får om dei held fram med å betale fram til
fylte 60 år. Like eins der fiskaren fell frå når han er 59 år - slik eg har
forstått ordninga, vil dei etterlatne i eit slikt tilfelle ikkje få noko
utbetalt. Dette synest ikkje å vera rimeleg. Eg er derfor glad for at
statsråden her signaliserer at arbeid er i gang med tilleggsytingar på
privat basis.
Det naturlege spørsmålet vert da: I
høve til kva tidshorisont kan ein tenkje seg at saka kan verta behandla?
Statsråd Magnhild Meltveit Kleppa:
Eg
vil peika på at representanten Modulf Aukan her viser eksempel som gjer det
naturleg å drøfta nærmare dagens ordning. Det er nok både desse forholda
som er nemnde, og andre sider ved pensjonstrygda for fiskarar som gjer at
Norges Fiskarlag ser nærmare på ordninga slik ho er i dag. Dei skal vera
ferdige med utgreiinga si til hausten.
Eg trur eg vil ta stilling til kva
tidspunkt det her kan bli ei avklaring, når denne utgreiinga er ferdig. Det
eg kan seia, er at dette er ei sak som vi kjem tilbake til.