Til Stortinget
Openheit er eit av dei berande prinsippa i demokratiet. Føremålet
med offentleglova slik ho er i dag, er å leggje til rette for at
offentleg verksemd er open og gjennomsiktig, for slik å styrke organisasjons-
og ytringsfridomen, den demokratiske deltakinga, rettstryggleiken
for den enkelte, tilliten til det offentlege og kontroll frå ålmenta.
Det kongelege hus mottek i 2015 227,6 mill. kroner over statsbudsjettet.
Ein stor del av dette er pengar som går til utøving av kongefamilien
sitt offisielle virke. Likevel har ikkje offentlegheita godt nok
høve til å kontrollere denne pengestraumen.
Då spørsmålet om innsynsrett i kongehuset var oppe i handsaminga
av ny offentleglov, Ot.prp. nr. 102 (2004–2005), la departementet
til grunn at Kongen er å rekne som eit offentleg organ når han utøver myndigheit
i statsråd eller på noko vis utøver offentleg myndigheit utanfor
statsråd, medan kongehuset og Det kongelege hoff elles fell utanfor
lova sitt verkeområde. Verken i odelstingsproposisjonen eller i justiskomiteen
si omtale (Innst. O. nr. 41 (2005–2006)) har spørsmålet om innsynsrett
i kongehuset under offentleglova vore gjenstand for grundig politisk
handsaming basert på ei ordentleg utgreiing. I staden konkluderte
komiteen ganske enkelt med at «selv om deler av kongehusets aktivitet
er av offentlig karakter, skal forhold relatert til Kongehuset behandles
på en skånsom og forsvarlig måte» (s. 19).
Det framstår som uheldig at kongehuset skal vere heva over innsyn
og ettersyn. I anna offentleg verksemd vert openheit sett som ein
styrke for den enkelte institusjon og for ålmenta sin tillit til
denne. Forslagsstillarane har vanskeleg for å sjå kvifor kongehuset skal
vere noko unnatak.
Kongen er å rekne som eit offentleg organ når han utøver myndigheit
i statsråd eller på noko vis utøver offentleg myndigheit utanfor
statsråd. Etter offentleglova § 17 kan talar og reiseprogram frå
medlemmar av kongehuset bli unnateke frå offentlegheit fram til talen
er halden og reisa er gjennomført eller reiseprogrammet er offentleggjort.
Og etter offentleglova § 22 vert det stilt opp unnatak for opplysningar
om førebelse budsjettrammer frå Det kongelege hoff.
Fråsegnene i førearbeida og gjeldande praksis om at lova ikkje
gjeld for andre dokument, samsvarar dårleg med at lova har desse
unnataksreglane. Ein kan difor stille spørsmål ved det rettskjeldemessige grunnlaget
for å unndra dokument om pengebruk i kongehuset frå offentlegheit.
I 2009 ratifiserte Noreg Tromsø-konvensjonen, som er den første
bindande internasjonale konvensjonen som anerkjenner ein generell
rett til innsyn i offentlege dokument som er i henda til offentlege
styresmakter. Konvensjonen har framleis ikkje tredd i kraft, då
dette føreset ratifikasjon frå minst ti land. Til no har sju land
ratifisert konvensjonen. Tromsø-konvensjonen inneheld minstekrav
for innsyn i offentlege dokument, og føreset at signatarlanda bør
ha reglar som gjev meir innsyn enn det som følgjer av konvensjonen.
Dette går fram av artikkel 3, § 1 nr. 22 som seier:
«Respecting the spirit of this Convention means provision of
the wides possible access to official documents and not hindering
such access by a misapplication of the limitations laid down in
Article 3.»
Trass i dette valde Noreg, då Noreg ratifiserte konvensjonen
i 2009, å gje ei særleg fråsegn med tanke på kongehuset:
«In accordance with Article 3, paragraph 1, of the Convention,
the Government of Norway declares that communication with the reigning
Family and its Household shall also be included among the possible limitations.»
Av monarkia som har ratifisert konvensjonen, er Noreg det einaste
som har reservert seg på denne måten. Sverige har ikkje ein slik
reservasjon, og i land med presidentembete, til dømes Finland, er
desse ikkje unnateke.
Noreg tek også del i Open Government Partnership (OGP), som er
eit frivillig, internasjonalt samarbeid mellom ulike regjeringar
og sivilsamfunnet. OGP er i praksis eit virkemiddel for nasjonale
reformmiljø som har som mål å gjere offentleg forvaltning meir open,
meir ansvarleg og meir lydhøyr overfor borgarane. I Noreg sin siste
handlingsplan for OGP, punkt 3.1, tek Noreg mål av seg å vere «one
of the most open countries in the world».
Kongehuset er mottakar av store offentlege overføringar kvart
år, og har viktige oppgåver på vegner av Noreg. Det er i seg sjølve
ein faktor som gjer det legitimt og nødvendig med uavhengig kontroll.
Innsyn i pengestraumar er ein avgjerande reiskap for at ein slik
kontroll skal vere reell. Dagens praksis gjev ikkje rett til å krevje
innsyn utover dei tilfelle der Kongen utøver myndigheit, i eller
utanfor statsråd. Dette snevre bruksområdet gjer at media, borgarar
og samfunnet for øvrig er avskorne frå å drive grundig og uavhengig
kontroll. Både Tromsø-konvensjonen og førearbeida til offentleglova
understrekar kor viktig det er med innsyn, og kor grunnleggjande
dette er for kontroll, tillit, engasjement og deltaking. I lys av dette,
og i tråd med Noreg sin målsetnad om å vere eit av dei mest opne
landa i verda, er det påfallande at ein har vald å leggje seg under
normene ein elles praktiserer rundt statens verksemd når det kjem
til kongehuset sitt virke.
Alle har krav på eit privatliv. Dette gjeld sjølvsagt også medlemmar
av kongefamilien. Innsynsrett etter offentleglova bør difor avgrensast
mot reint private gjeremål som feriar, daglegliv osv. Det bør like
fullt vere eit mål å få på plass ei lovregulering som sørgjer for
at det er hemmeleghald som må grunngjevast, ikkje openheit. Difor
bør offentleglova sitt verkeområde utvidast til å gjelde all utøving
av offisielle oppgåver i kongehuset, herunder pengebruk knytt til
tilsetjingar, eigedomar og eventuell forretningsdrift. Alle sider
av kongehuset sitt offisielle virke bør som utgangspunkt vere omfatta
av dei same reglane om openheit som andre delar av statleg forvaltning.
På denne bakgrunnen legg forslagsstillarane fram følgjande
forslag:
Stortinget ber regjeringa leggje fram forslag om at dokument
knytt til utøving av kongehuset sine offisielle oppgåver vert underlagt
reglane i offentleglova.
6. april 2016