Bakgrunn
Tilbringartenesta til Oslo lufthamn har vore ein stor suksess.
Tilbodet er eit av dei mest nytta og mest populære togtilboda i
landet.
Etter innføringa av jernbanereforma har planen vore at tilbringarteneste
skal konkurranseutsetjast etter at Flytoget si kontrakt går ut i
2027. I staden valde regjeringa å slå saman Vy og Flytoget, og direktetildele
kontrakt for trafikken på Austlandet til VY. Dermed vil den særskilde
tilbringartenesta forsvinne.
Flytoget har over mange år jobba seg opp til å bli eit selskap
med svært nøgde kundar. Det har vore eit veldrive selskap, som også
har drive med innovativ utvikling – til det beste for dei reisande.
Tilliten til norsk jernbane er svært låg. Dei siste åra har norske
togkundar opplevd svært mange forseinkingar og kanselleringar. Dette
er det mange årsaker til, mellom anna manglande vedlikehald, mangel
på materiell og infrastruktur. Likevel er det verdt å merke seg
at samtidig som tilliten til norsk jernbane har falle, har Flytoget
halde fram med å vere eit svært populært tilbod. Flytoget har den
eldste togparken, men har på grunn av godt vedlikehald og god styring
vesentleg mindre utfordringar enn dei andre aktørane.
Et stabilt, og forutsigbart togtilbod er svært viktig for å få
fleire til å velje kollektivt. Ved ei avvikling av tilbringartenesta,
og Flytoget som selskap, er det ei frykt for at fleire vil velje
andre transportmiddel til og frå Oslo lufthamn. Samtidig vil tilliten
til norsk jernbane falle ytterlegare.