Spørsmål

Helge André Njåstad (FrP): Når vil statsråden svare ut saka slik at ein kan skjerme lokaltrafikken for bompenger på sidevegane til E39 mellom Os og Bergen?

Begrunnelse

Det var møte mellom departementet og lokale krefter 28. august 2024 om alternativ bompengeopplegg på sidevei mellom Os og Bergen. Konklusjonen på dette møtet var at fylkeskommunen og kommunane sender brev der dei presiser kva løysing som er ønskelig. Denne lokale løysinga er også i tråd med merknad under stortingsbehandling om at det måtte vurderast skjerming av lokaltrafikken. Nå venter man lokalt kun på avklaring fra departementet for å få på plass ein løysing som ivaretar det lokale ynskje.

Svar

Jon-Ivar Nygård: Prop. 134 S (2013-2014) Utbygging og finansiering av E39 Svegatjørn-Rådal i Vestland (daværende Hordaland) vart fremma for Stortinget i 2014 i tråd med lokalpolitiske vedtak. Sidan dei lokale vedtaka for prosjektet vart fatta i 2010 har det vore diskusjonar knytt til fritak for bompengebetaling for lokale trafikantar. I bompengeopplegget som vart vedteke av Stortinget i 2014, vart det ikkje lagt opp til fritak for lokaltrafikken. Komiteen i Innst. 37 S (2014-2015) bad likevel om at det måtte sikrast løysingar som gir betre samanheng mellom betaling og nytte for lokale trafikantar som ferdast på sidevegane. Prosjektet opna for trafikk hausten 2022 utan spesifikke tiltak for lokaltrafikken.
Det har vore eit lokalpolitisk initiativ for å finne treffsikre tiltak for lokale trafikantar. Regjeringa har følgt opp dette ved at Samferdselsdepartementet i juni 2022 gav Statens vegvesen i oppdrag å utgreie alternativ for å sikre betre samanheng mellom nytte og betaling for lokaltrafikken.
Statens vegvesen har gjort eit omfattande arbeid der det vart lagt stor vekt på å finne løysingar som balanserer lokale omsyn på den eine sida og prinsipp for bompengefinansiering og bompengeselskapet sin økonomi på den andre sida. Det er vurdert fleire alternativ, mellom anna fjerning av bomstasjonar på sidevegar, innføring av passeringstak, samt ei prøveordning med to bomstasjonar på sideveg og omvendt timesregel.
Ordninga med omvendt timesregel legg opp til at dei som berre passerer éin bomstasjon på sidevegen betaler ein sterkt redusert takst, av Statens vegvesen førebels anslått til å vere seks kr per passering for taksgruppe 1, medan dei som passerer begge bomstasjonane innan ein time betaler same takst som på hovudvegen. Ei slik løysing opprettheld insentiva for bruk av den nye hovudvegen og sikrar samtidig betre samanheng mellom nytte og betaling for lokale trafikantar ved å redusere bompengebelastninga på sidevegane betydeleg. Denne løysinga vart konkretisert i januar 2023, då departementet bad Statens vegvesen om å konkretisere utgreiinga med to bomstasjonar på sideveg med omvendt timesregel.
Statens vegvesen oversendte forslag til justert bompengeopplegg på sidevegane basert på omvendt timesregel til lokale myndigheiter i september 2023. Dette forslaget har enno ikkje vore behandla lokalpolitisk slik det er krav om i bompengesaker. Lokale myndigheiter har i møte med departementet uttrykt at dei er usamde i forslaget frå Statens vegvesen då dei ønskjer å ha fritak for lokaltrafikken på sidevegane og oversendte sitt alternative forslag til bompengeopplegg for prosjektet til Samferdselsdepartementet i september 2024.
Sidan det ikkje er semje mellom dei to forslaga, må Samferdselsdepartementet vurdere korleis dette skal handterast vidare.