Spørsmål

Gunhild Berge Stang (V): Vil ferjeavløysingsmidlar i framtida ta omsyn til den reelle kostnadsauken i ferjedrifta eller vil den årleg bli indeksregulert, og meiner statsråden det er god praksis av fylkeskommunen å rekne inn framtidige vedlikehaldsutgifter når ein utreknar kostnadene for samband?

Begrunnelse

Sokn og Fjordane er eit ferjefylke og ferjene er avgjerande både for at folk kan bu i fylket og for næringslivet. Atløysambandet er eit av få vegprosjekt i Noreg som kan fullfinansierast ved å vri pengebruk frå ferjesubsidiering til bygging av veg. Historisk har utgiftene til drift av ferja til Atløy auka frå 11,6 mill. kr. i 2008 til 18,9 mill. kr. i 2010, og er planlagd til 25 mill. kr. i 2016. Ferja til Atløy var ein riksveg fram til 2010 då Sogn og Fjordane fylkeskommune tok over ansvaret. Den vanskelege økonomiske situasjonen i Sogn og Fjordane fylkeskommune hindrar Staten i å bruke pengar på eit lønnsamt vegprosjekt. Reglar for ferjeavløysingsmidlar på fylkeskommunale ferjesamband blir også opplevt av mange som uklare, det er derfor behov for klarare retningslinjer.

Svar

Jan Tore Sanner: I samband med handsaminga av kommuneproposisjonen for 2015, der ny kostnadsnøkkel for fylkeskommunane vart lagt fram, ønskte Stortinget at det vart greidd ut ei ferjeavløysingsordning for fylkesferjer innanfor inntektssystemet. Kommunal- og moderniseringsdepartementet og Samferdselsdepartementet ser no nærare på korleis ein kan utforme ei slik ordning. Som nevnt i statsbudsjettet vil Regjeringa kome med ei vurdering av ei ferjeavløysingsordning for fylkesvegferjer i kommuneproposisjonen for 2016, som blir lagt fram 12. mai. Eg kan difor ikkje gå nærare inn på konkret utforming no.