Spørsmål

Geir Pollestad (Sp): Kva tid vil utgreiinga om norske løns- og arbeidsvilkår i norske farvann vera ferdig?

Begrunnelse

Det er no eit år sidan stortinget påla regjeringa å utgreie norske løns- og arbeidsvilkår i norske farvann.
I Stortingsdebatten 21. juni 2017 sa dåverande næringsminister Monica Mæland:

"jeg kan love at vi ikke trenger lang tid på disse utredningene.
Det finnes utredning på 1970-tallet, på 1980-tallet, på 1990-tallet og på 2000-tallet. Vi vet svaret på veldig mange av disse spørsmålene, så det skal ikke ta lang tid."

Det er ynskjeleg å få vite kva som er gjort i saka så langt. Og "ikke trenger lang tid" er vanlegvis ikkje eit omgrep som vert nytta om noko som tek meir enn eit år.

Svar

Torbjørn Røe Isaksen: Både tidlegare næringsminister Monica Mæland og eg har ynskt å gjennomføre gode og grundige prosessar med arbeidsgjevar- og arbeidstakarsida. Eg hadde eit nytt møte med partane 2. mai 2018 for å diskutere mandatet for utgreiinga om norske løns- og arbeidsvilkår. Mandatet er no ferdig, og eit utgreiingsoppdrag vil om kort tid leggjast ut på offentleg anbod. Me tek sikte på at utgreiinga skal vere ferdig fyrste halvdel av 2019. I mandatet går det mellom anna fram at partane skal inngå i ei referansegruppe. Gruppa skal medverke til at relevante problemstillingar vert belyste. Referansegruppa skal konsulterast ved oppstart av oppdraget, ved ein midtvegsgjennomgang, og i sluttfasen. Prosessen knytt til utforminga av mandatet har teke noko tid, men eg synest det har vore viktig å sikre ein grundig prosess der partane er involverte.