Tellef Inge Mørland (A): Når kan ein vente at ekspressbussnæringa vil få utbetalt den varsla koronastøtta, og korleis vil regjeringa fylgje opp denne næringa framover, no som ein igjen har innført strengare koronatiltak?
Begrunnelse
Ekspressbussane er ein viktig del av infrastrukturen vår. Under tittelen «Byråkratisk sommel knekker politisk velvilje» i Nationen 8. november, skriv leiinga i Konkurrenten.no at dei framleis ikkje har fått utbetalt nokon koronakompensasjon. Dei er heller ikkje kjende med at andre ekspressbusselskap har fått dette.
Allereie 29. mai vart det tatt initiativ til ei støtteordning som skulle gjelde i perioden frå juni til august for ekspressbussbransjen. Vedtak vart fatta i Stortinget og pengar løyvd til ordninga.
No i november melder aktørar i bransjen at dei framleis ikkje har fått utbetalt støtta, og for Konkurrenten.no sin del står i verste fall 60 arbeidsplassar i fare. Dette er ei viktig distriktsbedrift lokalisert i Evje og Hornnes kommune.
Det synest underleg at det har tatt så lang tid å få utbetalt ei slik støtte, som det har vore brei politisk semje om. No som nye koronatiltak igjen medfører aukte restriksjonar på reiser, må ein kunne forvente at dette nok ein gong vil skape store utfordringar for denne næringa.