Spørsmål

Frank Edvard Sve (FrP): Kan Møre og Romsdal fylkeskommune starte opp bompengeinnkrevinga på Fv 659 Nordøyvegen etter tidligare vedteken bompengeproposisjon 140S, eller er det gjeldande vedtak i Prop.93S og takstgrunnlaget der som må gjennomførast ved opninga av Nordøyvegen hausten 2022?

Begrunnelse

Viser til behandlinga av Prop. 93S finansiering av prosjekt FV659 Nordøyvegen i Møre og Romsdal fylkeskommune.
Det har i ettertid av behandlinga av denne proppen, kome påstandar frå SP i Møre og Romsdal som hevdar at det er mulig å starte bompengeinnkrevinga på Nordøyvegprosjektet med tidligare vedteke bompengeproposisjon. Dette er Prop. 140 S (2016-2017).
Eg har oppfatta systemet ikring slike saker at ein vedteken bompengeproposisjon er grunnlaget for opptak av bompengelån og at vedtekne bompengetakstar vert sett i gang ved opning av vegsambandet.
Eg har også oppfatta systemet ikring dette slik, at dersom Møre og Romsdal fylkeskommune vil nytte ekstrainntekter frå eventuelt endra ferjeavløysingsmidlar eller frå overskot i drifta til å kutte bompengetakstane, må fylkeskommunen søkje regjeringa om endring av vedteken og gjeldande bompengeproposisjon.

Svar

Jon-Ivar Nygård: Prop. 93 S (2021–2022) set Prop. 140 S (2016–2017) til side. Det er Prop. 93 S (2021– 2022) som no gjeld for fv. 659 Nordøyvegen. Ved opninga av Nordøyvegen hausten 2022 skal derfor bompengeinnkrevjinga starte opp etter Prop. 93 S (2021–2022).
Eg er kjent med at det frå lokalt hald vurderast om reduserte kostnadar i prosjektet Nordøyvegen kan nyttast til å redusere bompengetakstane. I henhold til Prop. 93 S (2021–2022) skal kostnadsfordelinga mellom bompengar og fylkeskommunale midlar følgje angitt prosentfordeling, men dersom fylkeskommunen ynskjer å nytte sin del av innsparinga til å redusere bompengeselskapet si gjeld med påfølgjande lågare bompengetakstar, har eg ikkje merknader til det.