Noregs Bank vart skipa i 1816 og er ein av dei eldste sentralbankane
i verda. Alt i november 1814 vart banken skriven inn i Grunnlova:
Paragraf 110 slo då fast at «Norge beholder sin egen Bank og sit eget
Penge- og Myntvæsen». Med denne føresegna skulle Noreg sikrast eit
sjølvstendig pengestell òg under personalunionen med Sverige. Ordlyden
i § 110 låg fast heilt fram til 1911. Då vart paragrafen nytta til
grunnlovsfesting av Statens Reservefond. I Sverige har dei på si
side den eldste sentralbanken i verda (frå 1668), og Sveriges Riksbank
har vore grunnlovsfest – omtala i Regeringsformen – i fleire hundre
år. Den finske grunnlova (vedteken i 1999) inneheld òg føresegner
om Finlands Bank.
Forslagsstillarane meiner at den norske grunnlova – som før 1911
– bør nemna Noregs Bank og såleis stadfesta at vi har ein sentralbank
i landet. Dette grunnlovsframlegget byggjer på ei statsrettsleg og
historisk utgreiing om grunnlovsfesting av Noregs Bank som Finansdepartementet
gjorde opptak til i 2011. Arbeidet vart gjort av professorane Eivind
Smith (jus) og Aanund Hylland (samfunnsøkonomi og avgjerdsteori)
ved Universitetet i Oslo og levert den 22. desember 2011. Utgreiingane
fylgjer som vedlegg til dette grunnlovsframlegget.
Dei to siste hundreåra har det vorte skipa sentralbankar i alle
sjølvstendige statar. I nyare tid har òg Den europeiske sentralbanken
kome til og vorte traktatfest. Både nasjonalt og overnasjonalt er
desse særmerkte institusjonar: Dei har einerett på preging av mynt
og utferding av setlar, dei er långjevarar i siste instans, og den
siste internasjonale finanskrisa har vist tydeleg den avgjerande
rolla sentralbankar har i det økonomiske samfunnslivet.
I Noreg er sentralbanken lovregulert i sentralbanklova, som går
attende til 1816. Ho vart mykje revidert i 1892 og seinast i 1985.
Etter den nogjeldande føremålsparagrafen (§ 1) skal Noregs Bank «være
et utøvende og rådgivende organ for penge-, kreditt- og valutapolitikken.
Den skal utstede pengesedler og mynter, fremme et effektivt betalingssystem
innenlands og overfor utlandet og overvåke penge-, kreditt- og valutamarkedene.»
Oppgåvene til sentralbanken har skift gjennom tidene. Det same
gjeld tilhøvet mellom Noregs Bank og styresmaktene. Slik vil det
alltid vera; vi tek ikkje til ords for å grunnlovsfesta sjølve den
gjeldande modellen. Men det er på høg tid å gjera banken meir synleg
som sentral statsinstitusjon i det norske konstitusjonelle demokratiet.
Ein konstitusjon skal gje føresegner om opphavet til statsmakta,
om utdeling av makta og om korleis ho skal kontrollerast. Såleis
skal ei grunnlov skipa og regulera hovudfunksjonen til ulike statsmakter,
fyrst og fremst den lovgjevande, iverksetjande og dømande makta.
Men ei grunnlov bør òg syna fram og regulera sentrale trekk ved
styringssystemet. Innskrivinga av parlamentarismen (§ 15) og regjeringa si
opplysningsplikt overfor Stortinget (§ 82) i Grunnlova i 2007 er
døme på grunnlovsendringar med dette føremålet. Forslagsstillarane
meiner difor at det å skriva Noregs Bank inn i Grunnlova er i godt
samsvar med den jamne, men varsame revideringa av Grunnlova dei
siste åra. Det er verdt å nemna at Grunnlova vår allereie inneheld
føresegner om andre viktige institusjonar, som Riksrevisjonen og
Sivilombodsmannen. I andre land er lista over grunnlovsfeste institusjonar
lang.
Forslagsstillarane gjer framlegg om at Noregs Bank atter vert
grunnlovsfest i samhøve med både den norske konstitusjonelle soga
og den særmerkte og sentrale plassen banken har i statsapparatet.
Framlegget er ikkje meint å avskjera høvet til politisk styring
av målet for verksemda til banken eller dei rammene Noregs Bank
elles skal arbeida innanfor: Det tek ikkje sikte på å endra funksjonen
eller rolla til Noregs Bank. Meininga med ei stutt og stadfestande grunnlovsfesting
er å tydeleggjera at banken er ein hjørnestein i den norske statsskipnaden.
Ei grunnlovsfesting vil òg kunna medverka til å auka bankens relative
status og gje trygd for Noregs Banks truverde som ein demokratisk
lovregulert, uavhengig institusjon både i Noreg og andsynes utlandet.
Det skal nemnast at grunnlovsframlegget – ifylgje utgreiinga til
professor Eivind Smith – er nøytralt med tanke på norsk medlemskap
i Den europeiske unionen (medrekna den økonomiske og monetære unionen).
Det same gjeld for andre former for internasjonalt valutasamarbeid.
Grunnlovsparagrafane 76 og 112 gjer klårt at både regjeringa
og kvar tingmann har rett til å setja fram grunnlovsframlegg. Etter
1905 har ulike regjeringar fremja fleire enn femti stortingsproposisjonar om
grunnlovsendringar. Dei fleste vart lagde fram før den andre verdskrigen.
Etter 1945 har norske regjeringar gjort framlegg om å endra Grunnlova berre
fire gonger. Såleis har det vorte politisk sedvane at grunnlovsendringar
er noko Stortinget steller med. Grunnlovsframlegget vårt er i samsvar
med denne skikken.
Dei grundige utgreiingane til Eivind Smith og Aanund Hylland
er ikkje eit førearbeid i vanleg tyding, men utgjer likevel eit
vitskapleg grunnlag for dette framlegget. I utgreiinga si vurderer
professor Smith kvar ei ny føresegn bør stå, og korleis ho bør lyda.
Om det fyrste skriv han mellom anna at
«[e]n eventuell grunnlovsfesting kan tenkes strukturert i samsvar
med det etablerte mønster for arbeidsdelingen mellom lovgivende
og utøvende makt. Dette kunne tilsi en bestemmelse om institusjonens
eksistens på et passende sted i grunnloven del B (om den utøvende
makt). Der er § 33 i dag ledig. Paragrafens plassering umiddelbart
etter bestemmelsene om statsrådsbehandling, men foran bestemmelsene
av dynastisk karakter, kan være passende også i et systematisk perspektiv.»
Sjølve ordlyden bør etter forslagsstillarane sitt skjøn vera
minimalistisk. Det er nok å slå fast at Noregs Bank er sentralbanken
i landet.
Framlegget kjem i tre ulike språkversjonar: på norsk-dansk anno
1903 (den gjeldande konstitisjonelle målforma), bokmål og nynorsk.
Dei to siste alternativa er i samsvar med eit vedtak Stortinget gjorde
den 21. mai 2012 om å be Stortingets presidentskap leggja til rette
for tospråkleg modernisering av Grunnlova i neste valbolk. Framlegga
tek såleis høgd for at Grunnlova kan liggja føre på moderne bokmål
og nynorsk før Stortinget handsamar framlegget om å grunnlovsfesta
Noregs Bank.
Til sist: Det ville vera symbolsk svært høveleg om forslaget
vart handsama og avgjort i samband med 200-årsjubileet for Noregs
Bank i 2016. Forslagsstillarane meiner dessutan at kontroll- og
konstitusjonskomiteen i arbeidet med tilrådinga si bør invitera
både hovudstyret og representantskapet i Noregs Bank til å koma
med sine vurderingar av framlegget.