Forslagsstillarane viser til at det i Ot.prp. nr. 17 (2001-2002)
blei fremma forslag om at dagpengeperioden blei avgrensa til 26
veker, men at personar som i permitteringstida går på arbeidsmarknadstiltak
i regi av eller i samarbeid med arbeidsmarknadsetaten, kan avslutte
tiltaket sjølv om tiltaket går utover 26 veker.
Kommunalkomiteen slutta seg i innstillinga samrøystes
til forslaget, og det blei seinare samrøystes vedteke.
Komiteen presiserte likevel at ein ville følgje utviklinga
nøye, og at ein om nødvendig ville kunne endre
lova dersom denne endringa ville føre til store negative
konsekvensar for arbeidstakarane eller at arbeidsløysa
blei vesentleg større.
Nå har lova verka i vel fire månader, og så langt ser
konsekvensane for arbeidstakarane ut til å vere relativt
små. Derimot er mange urolege over kva konsekvensane kan
bli for enkelte bransjar. Det gjeld leverandørindustrien
innanfor offshorebransjen og asfaltbransjen.
Med bakgrunn i erfaringane så langt, meiner forslagsstillarane
at det ikkje er nokon grunn for å gå tilbake til
det gamle regelverket.
Det er behov for overgangsordningar slik organisasjonane innanfor
dei gjeldande bransjane har bede om. Overgangsordningar vil kunne
gjere overgangen til nytt regelverk meir smidig og kunne sikre stabilitet omkring
det nye regelverket. Dersom ikkje slike overgangsordningar kjem
på plass, er forslagsstillarane redde for at dei gjeldande
bransjane må seie opp personar med verdfull kompetanse,
og som så kan forsvinne frå bransjane. Dette vil
særleg gjelde yngre personar med kortast ansiennitet.
På denne bakgrunnen blir det i dokumentet fremma følgjande
forslag:
"Vedtak til mellombels lov
om overgangsreglar i lov 6. mai 1988
nr. 22 om lønnsplikt under permittering
I
§ 1
Arbeidstakarar som var i ein løpande permitteringsperiode
per 31. desember 2001, skal behandlast etter regelverket slik det
gjaldt før lovendringa av 21. desember 2001 så lenge
permitteringa varer.
§ 2
For arbeidstakarar som per 31. desember 2001 ikkje var
i ein løpande permitteringsperiode, skal reglane bli tillempa
slik at permitteringstid før 1. januar 2002 ikkje blir
teken med i utrekninga av kvoten på 26 veker i lønnspliktlova § 3
nr. 2 første ledd og folketrygdlova § 4-7.
Ingen kan i medhald av denne føresegna få ein
større kvote enn det som ville fylgd av lønnspliktlova
og folketrygdlova slik dei lydde før lovendringa.
§ 3
For asfaltbransjen gjeld ei kvote på 36 veker
i lønnspliktlova § 3 nr. 2 første
ledd og folketrygdlova § 4-7.
§ 4
Føresegnene i §§ 1
og 2 gjeld til 1. juli 2003. Føresegna i § 3
gjelder til 1. januar 2004.
II
Lova tek til å gjelde straks."