Departementet gjer i proposisjonen framlegg om endringar i opplæringslova og privatskolelova. Framlegga gjeld utvida rett til vidaregåande opplæring for vaksne, endra plassering av føresegna om tilpassa opplæring, innføring av rett til særskild språkopplæring for minoritetsspråklege elevar i vidaregåande opplæring, utvida mandat til Foreldreutvalet for grunnskolen, utvida rett til teiknspråkopplæring i grunnskolen og lovfesta plikt for skoleeigar til å gi elevar gratis frukt og grønsaker.
Forslaga er i hovudsak ei oppfølging av tiltak varsla i St.meld. nr. 16 (2006-2007) … og ingen sto igjen, jf. Innst. S. nr. 164 (2006-2007). Det er også gjort nokre opprettingar og rettstekniske endringar som ikkje inneber realitetsendringar i gjeldande rett.
Departementet drøftar, men går ikkje inn for, eit forslag under høyringa om å endre føresegnene om sakshandsaming for spesialundervisning og spesialpedagogisk hjelp.
Departementet tek sikte på at lovendringane skal ta til å gjelde 1. august 2008, med unnatak av forslaget om å utvide mandatet til Foreldreutvalet for grunnskolen, som er meint å gjelde frå 1. januar 2009.
Departementet gjer framlegg om å lovfeste at alle som ikkje har
nytta retten til vidaregåande opplæring som ungdom, får rett til
vidaregåande opplæring som vaksne frå og med det året dei fyller
25 år. I dag er det berre vaksne fødde før 1978 som har slik rett.
Departementet gjer òg framlegg om at unge som ønskjer det, kan
få vidaregåande opplæring etter reglane som gjeld for vaksne. Unge
i alderen 20 til 23 år vil med dette kunne få ei opplæring som er
tilpassa deira livssituasjon. Det er eit vilkår at det ligg føre særlege
grunnar. Departementet strekar under at hovudregelen framleis er
at dei unge tek opplæring etter opplæringslova § 3-1 og vaksne etter
§ 4A-3.
Departementet reknar med at lovendringa på lengre sikt vil føre
til at mellom 800 og 1 000 fleire vaksne enn i dag vil vere i vidaregåande
opplæring kvart år. Departementet legg derfor til grunn at lovendringa
vil innebere ein meirkostnad for fylkeskommunane på om lag 50 mill.
kroner per år. Hausteffekten i 2008, dvs. 21 mill. kroner, er lagd
inn i rammetilskottet til fylkeskommunane, jf. kap. 572 post 60, på
budsjettet for Kommunal- og regionaldepartementet for 2008.
Departementet gjer framlegg om at minoritetsspråklege elevar
i vidaregåande opplæring skal ha rett til særskild språkopplæring
på same måten som elevane i grunnskolen i dag. Denne språkopplæringa skal
vere ei overgangsordning fram til elevane har tilstrekkeleg dugleik
i norsk til å følgje den vanlege opplæringa. Retten skal først og
fremst gjelde for særskild opplæring i norsk. Men føresegna fastset
òg rett til morsmålsopplæring og/eller tospråkleg fagopplæring,
i tillegg til den særskilde norskopplæringa. Dette vil gjelde nykomne
eller andre minoritetselevar. Det er eit vilkår at slik opplæring
er nødvendig.
Særskild norskopplæring og tospråkleg fagopplæring skal vere
eit tilbod ved den skolen der eleven går til vanleg. Morsmålsopplæringa
kan leggjast til ein annan skole. Målet med desse framlegga er å
sikre minoritetsspråklege elevar så god dugleik i norsk som mogleg.
I valet av metode må ein ta utgangspunkt i dei behova den einskilde
eleven har, tilpassa dei praktiske føresetnadene som finst i fylkeskommunen.
Departementet ser det slik at framlegget ikkje vil leggje nye
økonomiske plikter på fylkeskommunen. Elevar i vidaregåande skolar
har rett til spesialundervisning dersom dei ikkje har eller ikkje
kan få tilfredsstillande utbytte av det vanlege opplæringstilbodet.
Retten til spesialundervisning kan innebere rett til særskilt tilrettelagd
språkopplæring dersom eleven har behov for det. Framlegget vil såleis
føre til ein reduksjon i talet på elevar som får spesialundervisning og
ein samtidig auke i talet på elevar som får særskild språkopplæring.
Departementet gjer framlegg om å utvide retten til opplæring
i og på teiknspråk. Elevar i grunnskolen skal etter dette framlegget
ha rett til slik opplæring dersom dei etter ei sakkunnig vurdering
har behov for grunnskoleopplæring i og på teiknspråk. I dag er det berre
elevar med teiknspråk som førstespråk som har slik rett. Om slikt
behov ligg føre, vil vere ei skjønnsvurdering i høve til om eleven
skal få gjennomført ei forsvarleg grunnskoleopplæring. Dersom den
pedagogisk-psykologiske tenesta ikkje sjølv har naudsynt fagkompetanse,
må ein hente hjelp utanfrå.
Departementet reknar ikkje med at tiltaket skal ha økonomiske
eller administrative konsekvensar. Elevar som i dag har behov for,
men ikkje rett til, teiknspråkleg opplæring, vil ha rett til slik
opplæring som spesialundervisning for å få tilfredsstillande utbytte
av opplæringa. Kostnadene knytte til høvesvis spesialundervisning
og opplæring i og på teiknspråk for desse elevane vil etter departementet
si vurdering i stor grad vere dei same.
Departementet gjer framlegg om at kommunane får ei lovpålagd
plikt til å halde elevane med gratis frukt og grønsaker i skoletida.
Ordninga skal gjelde alle elevar på skolar med ungdomssteg, det
vil seie ungdomsskolar (8.–10. årssteget) og kombinerte skolar (1.–10.
årssteget).
Bakgrunnen for å lovfeste ei plikt er tilbakemeldingar om at
kommunar har nytta midlar Regjeringa tidlegare har sett av til dette,
til andre føremål. I 2008 vart det løyvd til saman 218 mill. kroner
til frukt og grønsaker. Det vart i utrekninga her teke omsyn til
at det ville vere administrative kostnader knytte til ordninga.
Av dette vart i underkant av 210 mill. kroner lagde inn i rammetilskotet
til kommunane og resten fordelte til statlege skolar og private
grunnskolar som var godkjende etter privatskolelova.
Denne lovregelen, som vert å presisere nærmare i føresegn, skal
etter framlegget ta til å gjelde frå 1. august 2008. Framlegget
om lovfesta plikt til å ha ei ordning med gratis frukt og grønsaker
gjeld også privatskolelova.
Departementet gjer framlegg om å utvide mandatet til Foreldreutvalet
for grunnskolen (FUG), slik at utvalet også skal ta opp saker som
gjeld første steget i vidaregåande opplæring. Utvalet skal no ikkje
berre gi foreldre informasjon og støtte knytt til opplæringa i grunnskolen,
men òg til foreldre som har ungdom på første steget i vidaregåande
opplæring. Målet er å gjere foreldra betre rusta til å vere gode
samarbeidspartnarar for ungdommane i ei overgangstid då dei skal
ta mange val og då støtte frå foreldra blir særleg viktig.
Departementet ser det ikkje som nødvendig å utvide talet på medlemer
i FUG sjølv om mandatet blir utvida til også å gjelde første året
i vidaregåande opplæring. Ved oppnemninga av nye medlemer i FUG f.o.m.
1. januar 2008 vart det lagt til grunn at det mellom medlemmene
i utvalet skal finnest kompetanse knytt til det første året i vidaregåande
opplæring.
Departementet foreslo i høyringsnotatet at opplæringslova § 5-3
blir endra slik at kravet om sakkunnig vurdering ikkje skal vere
eit ufråvikeleg og absolutt krav før vedtak om spesialundervisning
blir gjort. Berre når det er nødvendig for at saka skal bli godt nok
opplyst, vurdert etter den generelle utgreiings- og informasjonsplikta
forvaltningsorganet har etter forvaltningslova § 17, skal det etter
forslaget vere eit slikt krav. Forslaget er grunngitt med at ei
slik endring vil leggje til rette for at den samla kompetansen i
skolen og PP-tenesta kan bli nytta optimalt og målretta for elevar
med særskilt behov. Ved å frigjere ressursar til systemretta arbeid
i skolen kan den ordinære opplæringa i større grad dekkje det generelle behovet
for tilpassa opplæring, og behovet for spesialundervisning og spesialpedagogiske
tiltak bli redusert.
Departementet sende eit tilsvarande forslag til høyring hausten
2004. Også den gongen møtte forslaget ein del motstand i høyringa.
Forslaget vart halde oppe i Ot.prp. nr. 57 (2004-2005), men forkasta
av eit fleirtal under handsaminga i Stortinget. I Innst. O. nr.
105 (2004-2005) vart det uttalt følgjande:
"Dette flertallet mener at elevenes rett til en individuell
opplæringsplan, og skolens plikt til å utarbeide en slik plan, er
nært knyttet til at det skal foreligge en sakkyndig vurdering før
det blir gjort vedtak om spesialundervisning. Den individuelle opplæringsplanen
skal legge til grunn vurderingene i den sakkyndige utredningen.
Dette flertallet viser til at den individuelle opplæringsplanen
er "kontrakten" mellom skolen og elevene/foreldrene. Den skal legges
til grunn for samarbeidet om den enkelte elev og gi grunnlag for
organisering og evaluering av opplæringen."
Vidare heiter det same stad:
"Stortinget ber Regjeringen legge frem en grundig gjennomgang
av spesialundervisningens plass i norsk skole, herunder en vurdering
av ressursbruk og resultater samt det statlige støttesystemets organisering
og virksomhet."
Denne oppmodinga har Regjeringa følgt opp gjennom oppnemninga
av Midtlyngutvalet. Utvalet har eit breitt mandat og skal m.a. på
bakgrunn av analysar og vurderingar leggje fram konkrete forslag
til betre organisering av og effektiv ressursbruk i ei framtidig
heilskapleg tiltakskjede for barn, unge og vaksne med behov for
spesialpedagogisk hjelp.
Målsetjinga med høyringsforslaget var i all hovudsak å frigjere
ressursar som kunne nyttast meir målretta for elevar med særskilte
behov. Høyringsfråsegnene viser at det kan vere grunn til å stille spørsmål
ved om ein når denne målsetjinga gjennom lovforslaget. Forslaget
har fått relativt liten tilslutning i høyringa. Departementet vel
derfor å leggje avgjerande vekt på dei innvendingane som er komne frå
høyringsinstansane.
Departementet vil på denne bakgrunnen ikkje fremje forslaget
i denne proposisjonen om å endre i føresegnene om sakshandsaminga
for spesialundervisning og spesialpedagogisk hjelp.