Komiteen, medlemene frå Arbeidarpartiet, Gunvor
Eldegard, Sigrun Eng, Steinar Gullvåg, Sigvald Oppebøen Hansen og
Arne L. Haugen, frå Framstegspartiet, Hans Frode Kielland Asmyhr,
Kåre Fostervold og Øyvind Korsberg, frå Høgre, Torbjørn Hansen og
Elisabeth Røbekk Nørve, frå Sosialistisk Venstreparti, Inge Ryan,
frå Kristeleg Folkeparti, Ingebrigt S. Sørfonn, frå Senterpartiet,
leiaren Ola Borten Moe, og frå Venstre, Leif Helge Kongshaug,
viser til Ot.prp. nr. 70 (2008–2009) om lov om tjenestevirksomhet.
Loven gjennomfører Europaparlaments- og rådsdirektiv 2006/123/EF
av 12. desember 2006 om tenester i den indre marknaden (tenestedirektivet),
som ei følgje av at Stortinget den 23. april 2009 ga sitt samtykke
til at tenestedirektivet skal innlemmast i EØS-avtala.
Komiteen viser til Regjeringa si behandling av tenestedirektivet,
jf. St.prp. nr. 34 (2008–2009). I tillegg viser komiteen til
Stortinget sitt vedtak og dei enkelte parti sine merknader, jf.
Innst. S. nr. 196 (2008–2009).
Komiteen har merka seg dei gjennomgangane som
er gjort av alle departement for å avdekka dei konsekvensane tenestedirektivet
vil ha for Noreg, og eventuelle behov for lovendringar som følgjer
av direktivet. Gjennomgangane viste at det i liten grad er naudsynt
med endringar i lovverket. Denne lova gjennomfører dei pliktene
som følgjer av tenestedirektivet.
Komiteen merker seg at om lag 80 prosent av all
norsk handel skjer med EØS-landa, og at den norske lova vil gjera
det enklare å etablere seg og yte tenester i Noreg.
Komiteen viser til at det blir lagt til grunn
at gjennomføring av tenestedirektivet i norsk rett ikkje har betyding
for organisering og finansiering av offentlege tenester og for muligheitene
for å løyse samfunnsmessige oppgåver gjennom offentleg sektor. Dette
vert følgt opp i denne lova.
Komiteen viser til at det også blir lagt til grunn at
tenestedirektivet ikkje endrar muligheitene til å sette i verk tiltak
mot sosial dumping, og at Regjeringa sin innsats på dette området
vil halde fram. I odelstingsproposisjonen peikar departementet på
at ingen offentlege etatar har gitt innspel som tilseier at tenestedirektivet
vil gjere det naudsynt med lov – eller praksisendringar på deira
ansvarsområde på det arbeidsrettslege området.
Regjeringa tek sikte på at lova skal tre i kraft frå 28. desember
2009, som er fristen for å gjennomføre tenestedirektivet i norsk
rett.